ပ္ဍဲပွိုၚ်ဍုၚ်လှာဒကှ် တွဵုရးကရေၚ် ဍာ်ဇၞော်တုဲ ဒဵုကဵုဂျူလာၚ် (၃၁) သီုဍုၚ်ကျာ်ဍုၚ်မ္ဂး ဘာဗ္တောန်လိက် (၂၄) မ ဒးကၟာတ်လဝ်ယာယဳတုဲ လၟိဟ်သ္ၚိဗၠိုက် နွံ (၂၀၀) မကေုာံ မၞိဟ်ဒးပါဲဘဲဍာ်နွံ ၉၀၀ ပြၚ်ရောၚ် ဂွံတီကေတ်ရ။
“ဍာ်လုပ်စိုပ်ပ္ဍဲဘာယျတှေ် အာကၠုၚ်ဟွံလောဲ ဒးကၟာတ်လဝ်ဘာ။ ဘာဂှ်ဍာ်လုပ်တှေ် ဗ္တောန်လိက်ဟွံဂွံ၊ ကောန်ၚာ်တံလေဝ် အာကၠုၚ်ဝါတ် ဖေက်ဒှ်အန္တရာဲတုဲ ဒးကၟာတ်လဝ်” သာ်ဝွံ ဥူမျဵုအံၚ် သ္ကိုပ်ပရေၚ်အုပ်ဓုပ် ပွိုၚ်ဍုၚ်လှာဒကှ် ဟီုရ။
ၚ်ၚာ်ဗြဴကောန်ကွးဘာလ္ၚဵုတံ ဗီုဒးလုဲစဴဍာ် (Myat Oo Thar)
“စပ်ကဵုကိစ္စကၟာတ်ဘာဂှ် ကၠောန်လဝ်ကောံဓရီုကေုာံသ္ကိုပ်ပရေၚ်အုပ်ဓုပ်ကီုရ။ ဍာ်ဂှ် ဍေံစှေ်သိုက်က်ဏောၚ်” သာ်ဝွံ ဒဝ်ခေန်နှေန်မူ သ္ကိုပ်ပရေၚ်ပညာ ပွိုၚ်ဍုၚ်လှာဒကှ် ဟီုရ။
သွက်ညးဍုၚ်ကွာန်ဒးဘဲဍာ်ဇၞော် ပ္ဍဲတွဵုရးကရေၚ်ဂှ် ထံက်ပၚ်လဝ်ဇွောံမကီုရောၚ် ဒဝ်နဳနဳအံၚ် သ္ကိုပ်က္ဍိုက်ပ် နူဌာနက္ဍိုက်ပ်ပရေၚ်ဟံၚ်ပြာ်ကေုာံက္လေၚ်ဖျေံဒၞါဲဝဲါ တွဵုရးကရေၚ် ဟီုရ။
“သွက်ညးဍုၚ်ကွာန် ၉၀၀ တၠပြၚ် ဒးပါဲဘဲဍာ် ပ္ဍဲပွိုၚ်ဍုၚ်လှာဒကှ်ဏံဂှ် နူဌာနပိုဲ ထံက်ပၚ်လဝ် သ္ၚုကဵုကကဠာတံကီုရ” သာ်ဝွံ ဒဝ်နဳနဳအံၚ် ဂးရ။
သၟာၚ်နူဂှ်ပၠန် ပ္ဍဲဒေသဍုၚ်လှာဒကှ်ဂှ် တိဗ္ၚ ၁,၀၀၀ ဨကပြၚ်လေဝ် ဗၠိုက်မံၚ်ဍာ်ဏောၚ် ဂွံတီကေတ်နူဌာနက္ဍိုက်ပ် ဌာနပရေၚ်တဵုလွဳကီုရ။
ဟိုတ်နူဗြဲရိုပ်ဆက်ဒၟံၚ် နူဂျူလာၚ် ၂၆ တေံဂှ်ရ ဍာ်နူ ၜဳဟံၚ်ဒြဝ်၊ ၜဳဇၟိ၊ ၜဳဝၚ်ရော၊ ကြုၚ်ကွေန်ကျဳ၊ ကြုၚ်အကၠိတ် (ကြိတ်) တံ ဍာ်ကၟိုဟ်စှေ်ကၠုၚ်တုဲ သ္ၚိမၞိဟ်ကေုာံ ဝါဗ္ၚတံ ဗၠိုၚ်အာဍာ်ရ။
0 Comments