ပ္ဍဲတွဵုရးဍုၚ်မန်ဝွံ သတ်သဳဠဴဂမၠိုၚ် ညံၚ်ဂွံပလံၚ်သွံပ္တိတ် ဇရေၚ်ဗွဝ်ဖျာဍုၚ်သၟာၚ်မာန်ဂှ် တၠပညာနူကၟိန်ဍုၚ် ဂျာမနဳတံ ကၠောန်ဗဒှ် တန်ဗ္တောန်နဲကဲပညာ ပရေၚ်တဵုလွဳ ပွိုၚ် (၃) တ္ၚဲ၊ ဂိတုနဝ်ဝေမ်ဗာ (၂၈-၃၀)၊ ဒၞာဲၝောံခန်သွံရာန်ဗၞိက် (ကုန်စည်ဒိုၚ်)၊ ပ္ဍဲဍုၚ်မတ်မလီုရ။
ပ္ဍဲတွဵုရးဍုၚ်မန်ဝွံ ပွမတဵုလွဳထ္ၜိုတ်ဂှ် ဒှ်မံၚ်အဆံၚ်ပထမတုဲ ပရေၚ်တဵုလွဳသွံရာန် သတ်သဳဠဴဂှ် ဒှ်လၟေၚ်ပရေၚ်ပိုန်ဒြပ် အဆံၚ်ဒုတိယ တွဵုရးဂှ်ရ သွက်ဂွံသွံပ္တိတ် ဇရေၚ်ဍုၚ်သၟာၚ်မာန်ဂှ် ဒးကဵုတန်ဗ္တောန်ရောၚ် သာ်ဝွံ ဥက္ကဌဂကောံညးတဵုလွဳသွံပ္တိတ် သၞေဝ်ကေဝ်၊ ပ္ကဴ၊ သတ်ဆုသတ်ဒုန် ကၟိန်ဍုၚ်ဗၟာ ဥုအေတာန် ဟီုကဵု ဌာန်ပရိုၚ်မန်ရ။
တန်ဗ္တောန်နဲကဲပညာတဵုလွဳ သတ်သဳဠဴ (MNA)
ပ္ဍဲပွိုၚ်ဍုၚ်ကျာ်မြဟ်၊ မတ်မလီု၊ ၜဳကလေၚ်၊ ကျာ်ထဝ်တံဂှ် တဵုလွဳသတ်သဳဠဴဂၠိုၚ်အိုတ်တုဲ ညံၚ်ဂွံဒှ်ပရေၚ်ပိုန်ဒြပ် သွက်ရဲဂူဗ္ၚ(ညးတဵု)တံကီု၊ ညံၚ်ဂွံဒှ်ပရေၚ်ပိုန်ဒြပ် ဍာ်ဇမၠိၚ်ကီု၊ ညံၚ်ဂွံဂွံသတ်သဳဠဴ မဍိုက်ပေၚ်ကဵု ဍာ်ဒကေဝ်မာန်ကီုဂှ် တန်တဴဒၟံၚ်ကဵု နဲကဲပညာတဵုလွဳရောၚ်ဂှ်လေဝ် ဥုအေတာန် ဂးရ။
ပ္ဍဲကဵုတန်ဗ္တောန်ဂှ်ဝွံ နဲဂွံစုတ်ဝဲါ(မြေသြဇာ)ကီု၊ နဲကဲထိၚ်ဒဝ် လၟိဟ်သတ်တိတ်ကီု၊ နဲကဲထိၚ်ဒဝ် ညံၚ်ဟွံဒးစၟကီု ပါလုပ်မံၚ်ဂှ်ရ သွက်ညးတဵုလွဳ သတ်ဆုသတ်ဒုန်ဂမၠိုၚ်တံ ဒှ်အထံက်အရီု ဗွဲမဂၠိုၚ်ရောၚ်ဂှ် ညးတၠကၠအ်တဵုလွဳသတ်ဆု မတိုန်စိုပ်တန်ဗ္တောန်ဂှ်မွဲတၠ ဒဝ်ကျေန်တာန် ဟီုရ။
“တန်ဗ္တောန်ဏံဂှ် ဗီုကဵုအာန်တဳတံ ညးတၠကၠအ်တဵုလွဳသတ်ဆုတှေ် ဒှ်အထံက်အရီု ဗွဲမဂၠိုၚ်ဏောၚ်။ မုဒှ်ရောဟီုတှေ် နဲကဲပလေဝ်ပလေတ်တၞံတံ၊ နဲကဲသုၚ်စောဲဝဲါ(မြေသြဇာ)တံ၊ ဒးစၟတှေ် ဗီုလဵုဂွံကလေၚ်ပလေဝ်ရော၊ ယဝ်ရ အတိုၚ်နဲကဲညးတံဟီုဂှ် ကၠောန်ဗက်အာ သၞောတ်စှေ်စှေ်ဏောၚ်တှေ် လၟိဟ်တၞံလီုအောန်ဏောၚ်ဂှ် စၟဳကေတ်လဝ်ရ” သာ်ဝွံ ဒဝ်ကျေန်တာန် ဟီုရ။
ပ္ဍဲတွဵုရးဍုၚ်မန်ဝွံ လၟိဟ်ဨကတဵုလွဳ သတ်သဳဠဴ နွံ (၄၀၀၀) ပြၚ်ကီုလေဝ် ဟိုတ်နူစရာဲဍာ်ဒကေဝ်တတ်ထပါ် ဗွဝ်ဖျာဍုၚ်သၟာၚ် ဟွံစိုပ်ဏီဂှ်ရ ဂ္စါန်သၠုၚ်ပ္တိုန်မံၚ် စရာဲဍာ်ဒကေဝ်ရောၚ် ဂွံတီကေတ်ရ။
0 Comments