ဗော်ကောန်ဂကူမန် MNP ကဵု ဗော်ဒဳမဝ်ကရေဇြဳအလုံရးမန် AMDP တံ ပံၚ်တောဲတုဲ ပ္ဍဲဂိတုမေ ၂၈ ဏံ ပံက်လဝ်တန်ဗ္တောန် သဘဴဓဝ်သဇိုၚ် သၞောတ်ဖေဝ်ဒရေဝ် ပ္ဍဲရုၚ်ဗော်ကောန်ဂကူမန် ဍုၚ်မုဟ်ဍုၚ်ရောၚ် သာ်ဝွံ ညးမၞုံတာလျိုၚ် နူဗော်ၜါလ္ပာ်တံ ဟီုရ။
“ကောန်ဗော်ပိုဲ သၟတ်ဗော်ပိုဲ သၟဝ်ဝ်တေံဖအိုတ် သွက်ဂွံပံၚ်တောဲအာညဳညဳသာသာဂှ် ဒးကၠိုဟ်ညးသ္ကံဏောၚ်၊ ဒးပတှေ်ကေတ်ညးသ္ကံဏောၚ်၊ မုဒှ်ရောဟီုတှေ် ပိုဲတံ မွဲဗော်ကဵုမွဲဗော် သွက်ဂွံပံၚ်ကောံဂှ် သၟဝ်ဝ်တေံ ဒးကၠိုဟ်လဝ် ပရေၚ်တံဏံဏောၚ်။ ညးမွဲကဵုညးမွဲ ဒးကၠောံက္ဍ ဍုက်ကေဝ် ဒးပတှေ်ညးသ္ကံဏောၚ်” သာ်ဝွံ နာဲသာန်တေန် ဖက်ဆောညးအုပ်ကာလၟိဟ် (၁) ဗော်ဒဳမဝ်ကရေဇြဳ အလုံရးမန် ဂးရ။
ပ္ဍဲတန်ဗ္တောန် ပွိုၚ် ၂ တ္ၚဲ နွံကဵုမၞိဟ်တိုန်စိုပ် ၜိုတ် ရ၀ တၠဂှ် ကောန်ဗော် နူၜါလ္ပာ်တံ တိုန်စိုပ်မွဲစွံတုဲ မၞိဟ်မွဲဗော်ကဵုမွဲဗော် ကၠောံက္ဍ ဍုက်ကေဝ် နွံကၠုၚ်ကဵုဓဝ်ပတှေ်ညးသ္ကံမ္ဂး ပေါဲသဳကၠဳ က္ဍိုပ်သ္ကိုပ်အဆံၚ်လ္တူတေံလေဝ် ပြေပြံၚ်က္လိတ်က္လောတ်မာန်ဏောၚ်စှေ်စိုတ် နာဲသာန်တေန် ဂး။
တုဲပၠန် သွက်ဂွံဆက်ကၠောန်အာ ပေါဲဆဵုဂဗသောၚ်က္လး နအလိုက်ပွိုၚ်ဍုၚ်ဂှ်လေဝ် ဖန်ဒၟံၚ်ဖိုဟ်တုဲ ကိစ္စပရေၚ်ပံၚ်ကောံဗော်ၜါ ဒိုအ်ကၠုၚ်လဝ်မွဲချိုန်ခဏဂှ်လေဝ် ဆက်ကၠောန်အာပၠန်ဏောၚ်၊တုဲပၠန် ဂိတုဂျောန် ၜိုတ်ပထသတ္တဟဂှ်လေဝ် က္ဍိုပ်သ္ကိုပ်အဆံၚ်လ္တူၜါလ္ပာ်တံ ညံၚ်ဂွံဒှ်ဆဵုဂှ် ပ္ညဳလဝ်တုဲဣရရောၚ် နာဲသာန်တေန် ဂး။
“နကဵုကောန်ဂကူပိုဲ အခါရကၠောန်ဗော်မန် ညံၚ်ဂွံဒှ်မွဲဗော်မ္ဂး လ္တူကမၠောန်က္ဍိုပ်သ္ကိုပ်ဗော်ၜါလ္ပာ်တံ ပ္ညဳပ္ညပ်သဳကၠဳကၠုၚ်လဝ်ဂှ် ကောန်ဗော်တံ ညံၚ်ဂွံတီကၠိုဟ်ကၠးလဝ်၊ တၚ်နွံပၟိက်ပ္ဍဲအရာပံၚ်ကောံဗော်ၜါဂှ် ကောန်ဗော်ၜါလ္ပာ်တံလေဝ် ညံၚ်ဂွံဍုက်ကေဝ် ညံၚ်ဂွံနွံကဵုဓဝ်ပတှေ်ညးသ္ကံ ညာတ်ကေတ်သာ်ဏံတုဲ ပိုဲတံဖန်ဇန်လဝ်ဗီုဏံ” သာ်ဝွံ နာဲသာန်လှာၚ် ကမ္မတဳရေၚ်တၠုၚ်ကေၚ်ကာဗဟဵု ဗော်ကောန်ဂကူမန် ဟီုရ။
ကမၠောန် ဗော်ကောန်ဂကူမန် ကဵု ဗော်ဒဳမဝ်ကရေဇြဳအလုံရးမန်တံ ကၠောန်ဒၟံၚ်ပရေၚ်ပံၚ်ကောံလၟုဟ်ဂှ် ၜိုတ်ထ္ၜးဝေၚ်ဗီု၊ ကၠောန်မံၚ်ကဵုအဆံၚ်အလံၚ်တုဲ တံၚ်ဗဇာဒၟံၚ်အခိၚ်ဏောၚ် မၞိဟ်လ္ၚဵုတံဟီုဂးကၠုၚ်ဗီုဏံနွံ၊ ဆ္ဂး လဟီုတံ ဗီုလဵုနွံနွံ စပ်ကဵုကိစ္စပရေၚ်ပံၚ်ကောံဏံတုဲ ကမၠောန်နွံကဵုဂုန်ဖဵုဍာံတှေ် ပံၚ်ကၠောန်အာညးသ္ကံဏောၚ် နာဲသာန်လှာၚ် ဂးရ။
အ္စာ ကၠိုဟ်ကၠးလဝ် ပရေၚ်ဖေဝ်ဒရေဝ် နူကဵု Federal Training Team ကေုာံ ဌာန်ကောံမှာဇန်မန် တွဵုရးမန်ဂှ် ဗော်မန်ၜါဗော် ကော်ဘိက်အာတ်မိက်အရီုဗၚ်တုဲ ပံက်တန်ဗ္တောန်ဏံဏောၚ် သာ်ဝွံ မာံဆာန်ထေက် နူဌာန်ကောံမှာဇန်မန် ဟီုကဵုဌာန်ပရိုၚ်မန်ရ။