ကွးဘာတန်ဗ္တောန်ပရိုၚ်၊ ဂိတုအံက်တဝ်ဗာ ၂၁၊ သၞာံ ၂၀၁၉
လိက်ပရိုၚ်သၞံၚ်တိုၚ် ဂွံအာဍာ်ဇမၠိၚ်မာန်ဂှ် ပ္ဍဲကဵုဂိတုကထိုန် (၁၃) စွေက်၊ ဂိတုနဝ်ဝေမ်ဗာ (၂၄) တေံမ္ဂး သွက်ဂွံကၠောန်ဗဒှ်အာ ပေဲါသဳကၠဳလိက်ပတ်မန်ကဵု မဳဒဳယာမန် ပ္ဍဲကဵုၝောံခန်ဝေၚ်ဇြဟတ်ဍုၚ်ရေဝ် နွံမံၚ်ရောၚ် ဂွံတီကေတ်ရ။
နူကဵုဌာန်ပရိုၚ်မန် သၞံၚ်တိုၚ်က္ဍိုက်ပ်တုဲ ပ္ဍဲကဵုပေဲါသဳကၠဳဏံဂှ် ဘိက်ပၟိၚ်လဝ် နာဲဟံသာ (ဒု-ဥက္ကဋ္ဌဗော်ဍုၚ်မန်တၟိ) ဒံက်တာအံၚ်နာၚ်ဥု (ဒု-ဥက္ကဋ္ဌကၠတ်ထဝ်တွဵုရးဍုၚ်မန်) နာဲကသုမန် သ္ကိုပ်ညးဒါန်လိက်ဌာန်ပရိုၚ်မန် ကေုာံ မိမြဟ်သြန် ဥက္ကဋ္ဌဂကောံသၟတ်မန်လညာတ်တၟိတံ နွံမံၚ်ရောၚ် ညးလလောၚ်ပရိုၚ် ဂကောံကၠောန်ဗဒှ် စၟတ်သမ္တီလိက်ပရိုၚ်သၞံၚ်တိုၚ် ပေၚ် (၂၀) သၞာံ နာဲပိုန်မန် ဟီုထ္ၜးရ။
နာဲပိုန်မန်ဂှ် “လိက်ပရိုၚ်သၞံၚ်တိုၚ် ပ္တိတ်မွဲဂိတုတှေ် ၜါအလန်၊ မွဲအလန်တှေ် ပိလ္ၚီဂှ် ကာလပိုဲပရးတှေ် ဍေံဟွံအိုတ်၊ သှေ်မံၚ်။ ပ္ဍဲမန်ပိုဲ ညးဗှ်လိက် အောန်စှေ်တှေ် အေလ္တူအောန်ဂှ်ရ ညံၚ်ဂွံသၠုၚ်ပ္တိုန်အသိၚ် ညးဗှ်လိက်မန်၊ မွဲတၚ်ပၠန်ဂှ် လိက်ပရိုၚ်ဏံ ဂွံအာဍာ်ဇမၠိၚ်မာန် ဗီုလဵုဂွံပခိုဟ်ရောဂှ် ပိုဲစုတ်လဝ် သီုကဵုပေဲါသဳကၠဳ” သာ်ဝွံ ညးဟီုရ။
ပ္ဍဲကဵုပေဲါစၟတ်သမ္တီ သၞံၚ်တိုၚ် ပေၚ် (၂၀) သၞာံဂှ် သီုကဵုကဏ္ဍလဟိၚ်စိုတ် နူကဵုသၟာဒယှေ်ဒွက်ဂဳတပံၚ်ကောံ၊ ထ္ၜပျးလှေ်ယေန်သၞာၚ် ကေုာံ ထ္ၜးပျးဝၚ်လိက်ပရိုၚ်တံ နွံရ။ ဒုၚ်သ္ဇိုၚ်ကဵု ရဲဒေသဍုၚ်ရေဝ်တုဲ နူကဵုညးဗှ်လိက်၊ ညးတာလျိုၚ်ဂကောံလိက်ပတ်တံသီုဖအိုတ် မၞိဟ် (၅၀၀) တၠ သွက်ဂွံဘိက်ပၟိၚ်အာနွံရောၚ်။
လိက်ပရိုၚ်သၞံၚ်တိုၚ်ဂှ် နူကဵုသၞာံ (၁၉၉၉) ဂိတုသေပ်တေမ်ဗာ ၉ (၉-၉-၉၉) တေံ စဒက်ပ္တန်လဝ်တုဲ သၞာံဏံဂှ် ပေၚ်ကၠုၚ် (၂၀) သၞာံဂှ်ရ ကၠောန်ဗဒှ် အသေအဟာန်ဇၞော်ဇၞော် ပ္ဍဲကဵုဍုၚ်ရေဝ်ဂှ်ရောၚ် ဂွံတီကေတ်ရ။
ဌာန်ပရိုၚ်မန်ဝွံ အစဳဇန်ဗလးရုပ်ရမျာၚ် ဘာသာမန်ကီု ရေဒဳယောကီု ပရိုၚ်မုက်လိက်လပှ်ကျာတံကီု တြးကဵုမံၚ်ရောၚ် ဂွံတီကေတ်ရ။
