အံက်သာ၊ ဂိတုမာတ် ၅၊ ၂၀၂၀
ပေဲါရုဲမာဲဂှ် ကြပ်ကၠုၚ်ရ ၂၀၂၀ ဏံ ဗော်မန်ဂှ် နွံမွဲဗော်ရ “မွဲဗော်ဓဝ်ရတှေ် ဇၞးမာဲဏောၚ် ခၞက်လဝ်မြေက်ဂွံရ” အဃောဗော်မန်တံ ကောံတၟိတၟိတေံ ရမျာၚ်နူဂကူမန်တံ ဗြုတိတ်ဒၟံၚ်ဗွဲမဂၠိုၚ် ဂွံမိၚ်ကေတ်ရ။
အခိၚ်လၟုဟ် ကြပ်တိုန်ပေဲါရုဲမာဲ ဗီုလဵုရမျာၚ်ဗြုတိတ်ကၠုၚ် နူသၟန်ပါၚ်ညးဍုၚ်ကွာန်တံ ညးတာလျိုၚ်ဗော်မန်က္ဆံၚ်ၚ်တံ ထေက်ကဵုသ္ဒးက္လၚ် ထေက်ကဵုသ္ဒးပမိၚ်ရ။ ညးဍုၚ်ကွာန်တံ ဒှ်ဓဝိၚ်အိုတ်ဟီုဂှ် အလံၚ်အမာတ်ဒေသညးတံရ၊ အလံၚ်အမာတ်ဗီုလဵု သ္ပဒတန်ကဵုညးတံဂှ် ညးတံ မၚ်က္လၚ်မံၚ်အိုတ်ရ၊ ဗော်ပရေၚ်ဍုၚ်ကွာန်တံလေဝ် အမာတ်ဗော်မန်တှေ် မန်တံစုတ်ကဵုမာဲတွဵုဏောၚ် လ္ပတော်သာသာသ္ပံသ္ပံညိ၊ နူသၞာံ(၂၀၁၀) စဵုကဵုစိုပ်အခိၚ်တ္ၚဲဏံ မန်ပိုဲက္လိဂွံလဝ်အမာတ် (ဝါ) ဆဵုဂဗလဝ်အမာတ်မန်(၁၆+၄=၂၀) တုဲရ၊ ဇၟာပ်ဒှ်အမာတ်မန်ဂှ် ကၠောန်ကဵုမံၚ်ဒတုဲဖဵု သွက်ညးဍုၚ်ကွာန်မန် သွက်ဂကူမန်ဖအိုတ်ဟွံသေၚ်ဂှ် ညးဍုၚ်ကွာန်ဂကူမန်တံ ဂွံဆဵုကေတ်လဝ်နမတ်တုဲရ၊ ပူဂဵုသာ်လဵု ဒှ်အမာတ်သွက်ညးဍုၚ်ကွာန်ရောဂှ် ညးတံ ခါတ်အကာဲကေတ်တ် လေပ်တိုန်ဣရ၊ ဟိုတ်ဂှ်ရ ညးတာလျိုၚ်ဗော်မန်တံ ပရေၚ်ရုဲစှ်အလံၚ်အမာတ်ဂှ် သ္ဒးစွံသတိဇၞော်ဇၞော်ရောၚ်။
အဃောကၠာတဲ ညးဍုၚ်ကွာန်မန်တံ ဂွံမိၚ်ကေတ်မံၚ်ရမျာၚ် နူကဵုညးတာလျိုၚ်ဗော်က္ဆံၚ်ၚ်တံ “အလံၚ်အမာတ်မန်တံဂှ် သ္ဒးဒှ်အလံၚ်အမာတ်ညးဒေသတံ နွံပၟိက်ဒးစိုတ်ဂှ်ဟေၚ်” တုဲ ညးဍုၚ်ကွာန်ဒေသတံ မိပ်မံၚ်စိုတ်အိုတ်ရ၊ ညးဍုၚ်ကွာန်မန်တံဗွဲမဂၠိုၚ်ဂှ် ညးတံနွံပၟိက် ဒးစိုတ်ကဵု အမာတ်ညးတံတီညာတ် စုက်လုက်မံၚ်ကဵုညးတံလၟိုန် ဂွံဒၞဲါတုဲ ဟွံဝိုတ်ညးတံ၊ အခိၚ်ညးတံစိုပ်ကျာတ် ညာတ်မုက်ဗွဲမပြဟ် ဟွံကၠဟ်ထောံလဝ်ညးတံဂှ်ရ၊ ဆဂး လက္ကရဴဏံ ကြပ်တိုန်ကဵု ရုဲစှ်အလံၚ်အမာတ်ဏံ ရမျာၚ်ညးတာလျိုၚ်က္ဆံၚ်ၚ်တံ ပြံၚ်လှာဲအာ “အလံၚ်အမာတ်ဒေသတံဂှ် သ္ဒးဒှ်နူကဵုညးတာလျိုၚ်ဗော်ပွိုၚ်ဍုၚ်တံ ရုဲစှ်သ္ပကဵုဒတန်ဂှ်ဟေၚ်” ရောၚ် ညးဍုၚ်ကွာန်မန်တံ ဂွံမိၚ်ကေတ်တုဲ ညးတံ ဒှ်ကၠုၚ်ဓဝိၚ်ရ၊ အလံၚ်အမာတ် ညးတာလျိုၚ်ပွိုၚ်ဍုၚ်တံရုဲစှ်ဂှ် ဒှ်အလံၚ်ညးဍုၚ်ကွာန်တံ နွံပၟိက်ဒးစိုတ်ဂှ် ဒှ်မာန်ညိဟာ၊ အဝဵုရုဲစှ်အလံၚ်အမာတ်တံဂှ် ပ္ဍဲညးဍုၚ်ကွာန်တံ ပ္ဍဲခၟဳသၚ်ဆာန်ဂကူတံ ပ္ဍဲအကြာဂကောံမန်နာနာတံ ညိလေဝ်ဟၟဲရဟာဂှ် ဂလာန်သၟာန်သာ်ဏံ တိတ်ကၠုၚ်အကြာသၟန်ပါၚ် ညးဍုၚ်ကွာန်မန်တံရ၊ “အလံၚ်အမာတ် ညးတာလျိုၚ်ပွိုၚ်ဍုၚ်တံရုဲစှ်ဂှ် သ္ဒးဒှ်အလံၚ်အမာတ် ညးဍုၚ်ကွာန်တံ ဒးစိုတ်နွံပၟိက်ဂှ်ရောၚ်” “အလံၚ်အမာတ်ဗဟဵုရုဲစှ်သ္ပဒတန်ဂှ် သ္ဒးဒှ်အလံၚ်အမာတ် နူညးတာလျိုၚ်ပွိုၚ်ဍုၚ်တံ ဒးစိုတ်နွံပၟိက်ဂှ်ရောၚ်” ယဝ်ခါရ ဖျေံကဵုဗီုသာ်ဏံမ္ဂး ဒးရးလောန်ခ္ဍၚ်ရောၚ် မၞိဟ်ဗွဲမဂၠိုၚ် ဟီုဂးထံက်ထ္ၜးမံၚ်ရောၚ်။
ဍာ်ဒ္ကေဝ်အလံၚ်အမာတ် သွက်ဂွံလုပ်ဒုၚ်ရုဲအမာတ်ကီု ဒှ်အမာတ်တုဲ သွက်ဒးဒ္ဂေတ်ဗက်ကီု နူကဵုကမ္မတဳရေၚ်တၠုၚ်ကေၚ်ကာဗဟဵုတံ ချူဓဇက်လဝ်တုဲမံၚ်ရရရောၚ် ဖက်ဆောညးအုပ်ကာ (၁) ဗော်ညဳသၟဟ်မန် နာဲလျးတၟး သောၚ်က္လးမံၚ် ပ္ဍဲဌာန်ပရိုၚ်ဂၠိုၚ်ၚ်ကဵုဝါတုဲရ၊ အခိၚ်လၟုဟ်ဟီုမ္ဂး ကမ္မတဳရုဲစှ် အလံၚ်အမာတ်က္ဆံၚ်ဗဟဵုလေဝ် ဒက်ပတန်လဝ်တုဲဣရရောၚ် ဂွံတီကေတ်ရ၊ ဆဂး ဟိုတ်နူအခိၚ်ပြဟ်မံၚ်ဏီတုဲ ဟွံပံက်ထ္ၜးဖအိုတ်ဏီရောၚ် ညးထပ်ဟီုလဝ်နွံရ။
ညးစိုတ်လုပ်စကဵု ပရေၚ်ဍုၚ်ကွာန်တံ ပတိတ်မံၚ်ပုစ္ဆာ ပ္ဍဲကမ္မတဳရုဲစှ်အလံၚ်အမာတ်ဂှ် ညးသ္ပအမာတ်တံ ပါလုပ်မံၚ်ကီုဟာ၊ ဍာ်ဒ္ကေဝ်အလံၚ်အမာတ်တံဂှ်လေဝ် ဗီုလဵုချူဓဇက်လဝ်နွံရော၊ ရံၚ်ကဵုဍာ်ဒ္ကေဝ်လေပ်လိက်ဟာ ရံၚ်ကဵုဍာ်ဒ္ကေဝ်ပရေၚ်ဍုၚ်ကွာန်ဟာ ရံၚ်ကဵုဍာ်ဒ္ကေဝ်ကၠောန်ပရဟိတဟာ ရံၚ်ကဵုစိုတ်ဓာတ်စေတနာဟာ မိက်ဂွံတီမံၚ်အိုတ်ရ။
အဓိကမွဲဂှ် ညးစၞးအမာတ်ဟီုဂှ် ဍိုက်ပေၚ်ကဵုဍာ်ဒ္ကေဝ် သဗ္ဗအိုတ်သီုမ္ဂး မုလေဝ်သွက်ဂွံဒးဟီုဟၟဲရ၊ ဆဂး ဍာ်ဒ္ကေဝ်လေပ်လိက်ကီု ဍာ်ဒ္ကေဝ်ပရေၚ်ဍုၚ်ကွာန်ကီု ဍာ်ဒ္ကေဝ်ကၠောန်ကမၠောန်ပရဟိတကီု ဍာ်ဒ္ကေဝ်စိုတ်ဓာတ်စေတနာ သၠဲလးသၠုၚ်ပြဲကီု ပ္ဍဲပူဂဵုမၞိဟ်မွဲမွဲ ဂွံဍိုက်ပေၚ်မံၚ်ဖအိုတ်ဂှ် ဒှ်ဟွံမာန်ရောၚ်။
ဟိုတ်ဂှ်ရ ဍာ်ဒ္ကေဝ်ညးစၞးမွဲမွဲဂှ် ဒးရံၚ်ညာတ် ဍာ်ဒ္ကေဝ်ညးဍုၚ်ကွာန်မန် ဇကုလေပ်ဂှ် လုပ်အဝေါၚ်အဓိကေဇၞာ်မွဲရ၊ ညးစၞးဂှ် ရံၚ်ညာတ်ဍာ်ဒ္ကေဝ်ညးဍုၚ်ကွာန်လေပ်မှ တက်ကျာ၊ ဆက်ဆောံ၊ ပံၚ်ဖက်ကဵု ညးဍုၚ်ကွာန်ပြေပြံၚ်ရောၚ်။ ကျာ်တြဲနာဲညးလေဝ် တွံဓရ်ကဵု ညးလောကတံ ဒးသ္ၚဳဂၠိပ်ပူဂဵုတုဲမှ ဟီုတွံထ္ၜးဓရ် ကုညးလောကတံရ၊ ပိုဲမၞိဟ်တံလေဝ် တၠုၚ်လအာသာ်ဂှ်ကီုရ၊ လညာတ်ဇကုသၠုၚ်တုဲ ဟီုဂး၊ မံၚ်စံၚ်၊ ဆက်ဆောံသၠုၚ်အာ နူညးဍုၚ်ကွာန်တံမ္ဂး ညးဍုၚ်ကွာန်တံ ညာတ်အာလ္တူညးစၞးဂှ် မွဲဗီုမာန်ရ၊ ဒးထ္ၜးသက်သဳ ကေၚ်ဆဵုဂဗလဝ်မ္ဂး “ညးဍုၚ်ကွာန်ဒးဘဲဍာ်ဗၠိုက် ညးဍုၚ်ကွာန်တံဂှ် ဒးမံၚ်ဒဒိုက် စိုတ်ဓာတ်လေဝ်လီု ဂိုတ်ဂစာန်ကပှ်မံၚ်ကပေါတ် ကေတ်ဂၠိက်ဂၞိန်လေဝ် ကြပ်ဟွံဂတာပ်ရ၊ ညးစၞးအမာတ်တံ စိုပ်ကၠုၚ် ရပ်ကၠုၚ်အဆာ်ကဵု ပဠောံတိုက်ပုၚ် ကၠုၚ်ဗဵု ကၠုၚ်ပၞောန်လေပှာ်တဲတှေ် ပ္ဍဲညးတံ ဗီုလဵုဒးဒုၚ်စသိုၚ် ဗီုလဵုညးဍုၚ်ကွာန်တံ ညာတ်အာ လ္တူညးစၞးဂှ်ရော ချပ်ပဲါရံၚ်ညိ” တၠုၚ်လအာသာ်ဂှ်ကီု “အဃောညးဍုၚ်ကွာန်ဒှ်ဒဒိုက် ညးစၞးအမာတ်မွဲ ခါတ်ဂၠိက်ကရောံညးဍုၚ်ကွာန် ဂစာန်ရီုဗၚ်ညးမ္ဂး ညးတံ ဗီုလဵုဒးဒုၚ်စသိုၚ် ဗီုလဵုညးဍုၚ်ကွာန်တံ ညာတ်အာ လ္တူညးစၞးဂှ်ရော” ပိုဲကေၚ်တတ်ကၠောံ ဆဵုကၠုၚ်လဝ်နမတ်တုဲရ။
ဥပမာဗီုသာ်ဂှ်ကီု စက်တၟံချးတံ လညာတ်ဇကုသၠုၚ်မံၚ် ဂတာပ်ခေတ်မံၚ် ဇကုညာတ်တုဲ “တၟံချးဂှ် ခေတ်ဏံ ဍေံဟွံကဵုဒှ်ဂျိရ ဍေံကၠောန်က္ဆံၚ်သၠုၚ်မံၚ် လ္ပဖေက် ဍေံကၠောန်ကဵုသွက်ဒေသပိုဲ ဂွံတဴတက်ဏောၚ်” ဇကုမွဲဓဝ် လညာတ်သၠုၚ်မံၚ် ညးဂမၠိုၚ်ညာတ်ဗက်ဇကုဟွံစိုပ်တုဲ ကာလအိုတ်ကၞောတ် မုဇကုဒှ်အာ ဆဵုမံၚ်ရသေၚ်ဟာ၊ ဟိုတ်ဂှ်ရ ဍာ်ဒ္ကေဝ်အမာတ်ဂှ် ဒးခါတ်အကာဲ ပရေၚ်ဒုၚ်စသိုၚ်ညးဍုၚ်ကွာန်ဒးလေပ် ဇကုသၟး ဍာ်ဒ္ကေဝ်သၠုၚ်တုဲ ဍာ်ဒ္ကေဝ်၊ လညာတ်၊ ဉာဏ်သမ္တီညးဍုၚ်ကွာန် ဗက်ဍာ်ဒ္ကေဝ် လညာတ်၊ ဉာဏ်သမ္တီဇကုဟွံစိုပ် ဇကုကဵုညးညာတ် ဗီုဇကုညာတ် ကဵုညးတီ ဗီုဇကုတီကီုမ္ဂး ညးညာတ်အာဇကု ဟၟဲကဵုဍာ်ဒ္ကေဝ် ဒှ်အာဆအဖြေဟ်မွဲရ။ ဆဂှ်သၟးဟွံက ပရေၚ်ဒုၚ်စသိုၚ်ညးဍုၚ်ကွာန်တံဂှ် နကဵုအလဵုဇကုဇကု ဒးဘိုၚ်လုပ်ဒုၚ်စသိုၚ်မာန်ကီုမှ ညးဍုၚ်ကွာန် ထံက်ဂလာန်မာန်ရောၚ်။
အမာတ်ဍာ်ဒ္ကေဝ်လေပ်လိက်က္ဆံၚ်သၠုၚ်မ္ဂး ၜိုန်ဒှ်စရာဲကုအမာတ်ဂှ်ကီုလေဝ် ဟွံကၠုၚ်ဆဵုဂဗ ကုညးတၠဆန္ဒမာဲ မကဵုလဝ်ဇကုတံဂှ် ဟွံမာန်မံၚ်မွဲဏှေံမွဲဏှေံမ္ဂး ဒးဒုၚ်ဟီုဂရိုဟ်ကုညးဍုၚ်ကွာန်တံ “လေပ်ပညာသၠုၚ် မုဂွံပ ကၠောန်ရော ဟွံကၠောန်ကမၠောန်”ပၠန်ရ၊ “ကမၠောန်အမာတ်ဂှ် ဒးချူဓဇက်သၞောဝ် ပ္ဍဲကၠတ်ထဝ်ဏောၚ်၊ ကမၠောန်ပ္ဍဲကၠတ်ထဝ်တေံ ယှုက်မံၚ်ဟွံသာပုဟ်” ဗီုလဵုအမာတ်တံသောၚ်ၚ် ညးဍုၚ်ကွာန်တံ ဒုၚ်တဲမာန်ဟွံသေၚ် ဣဏံ ညးညးအဲအဲ ဆဵုမိၚ်လဝ်တုဲရ။
ညးစၞးအမာတ်တံဂှ် ဇၟာပ်ကောံဓရီုကၠတ်ထဝ်ကၟာတ် မ္ဒးစှ်ဆေဵုဂဗကဵု ညးဍုၚ်ကွာန်တံရ၊ ကာလအာဆဵုလေဝ် အာဆဵုဂဗကဵု မၞိဟ်ဇကုၜါပိကဵု ညးတာလျိုၚ်အုပ်ဓုပ်ကွာန်တံသၟး ဟွံရုမ်ဂပ်ရ၊ မ္ဒးတက်မံၚ်လံၚ်ဆာၚ် ကညာၚ်ကရေဲကဵု စက်သၠဲရမျာၚ်အလုံကွာန်တုဲ မ္ဒးဆဵုဂဗကဵု ညးဍုၚ်ကွာန်တံတုဲ ဒးသောၚ်က္လး ဒုၚ်စဳရေၚ်ကဵု ညးတံ ပရေၚ်ကမၠောန်ဇကုတုဲမ္ဂး ဒးသၟာန်ညးတံ ပရေၚ်ခက်ခုဲ၊ ပရေၚ်နွံပၟိက်၊ ကဵုညးတံပတိုန်ထ္ၜး ဗွဲမဗၠးၜးတုဲ ဒးက္လေၚ်သောၚ်က္လးကဵုညးတံ ညံၚ်ညးတံဂွံကၠး၊ ကမၠောန်ယဵုယိုက်ဏာဂွံတံဂှ် မ္ဒးယဵုယိုက်ဏာ သွက်ဂွံပတိုန်ထ္ၜး က္ဆံၚ်ၚ်တေံရ၊ တဲဍိုန်အိုတ် မွဲသၞာံမွဲဝါ ဒးဆဵုဂဗကဵု တၠဆန္ဒမာဲဇကုရောၚ်။
အကြာဂှ် ယဝ်ခါရ အကာဲအရာတၟေၚ် အကြာဒေသဆန္ဒမာဲဇကု ကတဵုဒှ်ဟိုတ်ဘဲအန္တရာဲမွဲမွဲသာ်မ္ဂး ကၠတ်ထဝ်ပံက်မံၚ်လေဝ် မ္ဒးစှ်ဆေဵုဂဗကဵု ညးဒေသ မကတဵုဒှ်ဟိုတ်တံဂှ်တုဲ မ္ဒးဘိုၚ်ပသောၚ်ကဵုရီုဗၚ် ကုညးတံကီုရောၚ် ဗီုသာ်ဏံ ရေၚ်တၠုၚ်ကဵုညးဍုၚ်ကွာန်တံမာန်မ္ဂး ညးစၞးအမာတ်ဂှ် လေပ်လိက်ပညာဟွံသၠုၚ်လေဝ် ညးဍုၚ်ကွာန်တံ ဒုၚ်တဲထံက်ဂလာန်ရ၊ ဓမံက်ရုပ်ရဴကမၠောန်သာ်ဏံလေဝ်မာန် လေပ်လိက်ပညာလေဝ်သၠုၚ်ပၠန်မ္ဂး မုသွက်ဂွံဒးဟီုဂးနွံရော တုပ်တဴညံၚ်ရဴမတ်မၞိက် ဖ္ဍုန်စုတ်လ္တူထဝ်ကီုရောၚ်။
ညးဍုၚ်ကွာန်ဗွဲမဂၠိုၚ်ဂှ် အမာတ်သ္ၚိကၟိန်နွံပ္ဍဲဒေသညးတံရ ညးတံနွံပၟိက်ဂၠိုၚ်ရောၚ် ဂွံတီကေတ်ရ၊ မုဟိုတ်ရောမ္ဂး အမာတ်သ္ၚိနွံပ္ဍဲဒေသတံဂှ် အခိၚ်ကၠတ်ထဝ်ဇူကောံဓရီုမ္ဂး ညးတံစဴဇူတဴ ပ္ဍဲသ္ၚိညးတံတုဲ နွံကြပ်ကဵုညးဒေသတံရ၊ အခိၚ်ဂှ်မ္ဂး အမာတ်ဟွံတိတ်နူသ္ၚိလေဝ် ညးတံ အာဂၠာဲအမာတ်စုက်ရ၊ ခရိတ်ဂၠံၚ်အာကဵုအမာတ်လေဝ် အိုတ်သာရဏောၚ်ဂှ် ညးဒေသဖါလိန်မွဲတၠ နာဲလေန် ဟီုဂးမံၚ်မွဲဏှေံမွဲဏှေံရ၊ ဗီုဂလာန်ညးဟီုဂှ် မၞိဟ်ဗွဲမဂၠိုၚ် ထံက်ဂလာန်ရ။
အကာဲအရာလက္ကရဴအိုတ်ဏံ ဂွံတီကေတ် ပ္ဍဲအရာပရေၚ်ရုဲစှ် အမာတ်ဏံ ပရေၚ်ညဳသၟဟ်လေဝ် စွံအဓိကတုဲ ဒးရုဲကီုရောၚ်သ္ဂးရ၊ ဗော်ညဳသၟဟ်မန်ဏံ ဟိုတ်နူပံၚ်ပ္ကောံလဝ် နူကဵုပိဗွိုၚ်တုဲ ကာလရုဲအလံၚ်အမာတ်လေဝ် သီုပိဗွိုၚ် ညံၚ်သ္ဂောံပါလုပ်ဂှ် သ္ဒးစွံသတိတုဲ မ္ဒးရုဲအာရောၚ်။ လ္တူအကာဲအရာဏံ ရံၚ်ကဵုပရေၚ်ညဳသၟဟ်တုဲရုဲဂှ် ရံၚ်လ္ပာ်ဗော်ဂှ် ၜိုန်ခိုဟ်ဒးရးကီုလေဝ် ရံၚ်လ္ပာ်ညးဍုၚ်ကွာန်မ္ဂး ဟွံဒးရး ဟွံခိုဟ်ရောၚ် မိက်ဂွံသ္ဂးရ။
မုဟိုတ်ရောမ္ဂး ဥပမာ- ပ္ဍဲပွိုၚ်ဍုၚ်မွဲဂှ် အပ္ဍဲဗွိုၚ်လ္ၚဵု မၞိဟ်အစောန်စရာဲဍာ်ဒ္ကေဝ် စဵုကဵုက္ဆံၚ်ညးဍုၚ်ကွာန်တံ ဂွံဒုၚ်တဲမာန်လေဝ်ဟၟဲ ရံၚ်ကဵုဗွိုၚ်ဂွံစုၚ်တုဲ ရုဲစုတ်ဏာအလံၚ်အမာတ် ညးဍုၚ်ကွာန်တံ ဟွံဒးစိုတ်မ္ဂး ဟွံဒှ်အထံက်အပၚ်ကဵု သွက်သ္ဂောံဇၞးမာဲသၟးဟွံက ဒှ်ပဋိပက္ခကဵု ပရေၚ်ရုဲစှ်အလံၚ်အမာတ် အကြာညးဍုၚ်ကွာန်မာန်ရ၊ မွဲသာ်ပၠန်ဂှ် ဗော်ပံၚ်ဒှ်အာမွဲတုဲရ မုဟိုတ် သ္ဒးပါ်မံၚ်ဗွိုၚ်ညးသ္ကံဏီရော လဟီုဏံ ညးချူလိက် ဒးမိၚ်မံၚ် မွဲဏှေံမွဲဏှေံရ၊ သောၚ်လေဝ် ဒးသောၚ်မံၚ် မွဲဏှေံမွဲဏှေံရ၊ သောၚ်တုဲ ညးလ္ၚဵုဒုၚ်တဲမာန် ညးလ္ၚဵုဒုၚ်တဲဟွံမာန် ဂွံဆဵုကေတ်ရ၊ လညာတ်ဟွံတုပ်ဂှ် ၜိုန်ဒှ်သဘာဝလိုက်ကီုလေဝ် ပရေၚ်ရုဲစှ်ညးစၞးအမာတ် ပွိုၚ်သၞာံဏံဂှ် သ္ပထောံပရေၚ်ဓမ္မတာ ဟီုထောံသာသာသ္ပံသ္ပံ ဟွံဂွံရ၊ ရုဲစှ်ဏာ အလံၚ်အမာတ်သာ်ဏံမ္ဂး ဆောံသီုကာယ ဂိသီုဂကူရောၚ်။
ဗော်ပရေၚ်ဍုၚ်ကွာန် မက္လိဂွံလဝ်အဝဵု(ဗော်မြာ်)တံ ပ္ဍဲဂိတုဂျောန်ဏံ သ္ပဒတန် အလံၚ်အမာတ် ပ္ဍဲဗော်ညးတံ အာစိုပ်ဒတုဲရောၚ် ပရိုၚ်တိတ်မံၚ်သာ်ဏံရ၊ ဗော်ညဳသၟဟ်မန်လေဝ် သွက်ဂွံသ္ပဒတန်မာန်ဂှ် ပွိုၚ်ဍုၚ်ညးကဵုညး စချဳဓရာၚ်မံၚ်လေဝ် ဂွံမိၚ်ကေတ်ရ၊ ဆဂး ဂိတုလဵု စွံလက္ကရဴအိုတ်ဂှ် ဟွံတီဏီရ။
သရုပ်ကၠေံ “သၟိက်မိက်ဂွံက္လိဂွံ အမာတ်ဂၠိုၚ်ၚ်မ္ဂး”ဏံမ္ဂး အကာဲအရာ လညာတ်ပရေၚ်ဍုၚ်ကွာန် ပ္ဍဲဂကူမန်ပိုဲ က္ဍိုပ်သ္ကိုပ်ဗော်ပရေၚ်ဍုၚ်ကွာန်ပိုဲတံ ဒးတီလဝ်ထေက်ရောၚ်၊ အကာဲအရာ ဟွံတုပ်ကဵုလောန်ကၠုၚ်လဝ်တံဂှ်တံဂှ်ရ၊ လောန်ကၠုၚ်တေံဂှ် ဂကူမန်တံ စၟဳကေတ်လ္တူဗော်မန်တံဟေၚ်တုဲ ဒှ်မံၚ်ညးစၞးနူဗော်မန်တှ်တေုဲ နကဵုတၚ်စၟဳစ မန်တံကဵုမာဲမာန်ဖအိုတ်ရ၊ လၟုဟ်ဂှ် သာ်ဂှ်ဟွံသေၚ်ရ၊ ပူဂဵုပ္ဍဲဗော်မန် ညးဍုၚ်ကွာန်မန်တံ ကေၚ်စၟဳစလဝ်ဂှ် ထ္ၜးလဝ်ကဵု ပညာကၠောန်ကမၠောန် ကုညးတံတုဲရ၊ ရမျာၚ်ညးဍုၚ်ကွာန်တံ ဗြုတိတ်မံၚ်သာ်လဵုရောဂှ် သ္ဒးတီလဝ်ရောၚ် တီတုဲ သ္ဒးပမိၚ်ကီုရောၚ်။
အလံၚ်အမာတ်ရုဲစှ်သ္ပဒတန်တံဂှ် သ္ဒးဒှ်ညးဒေသတံ ဒုၚ်တဲထံက်ဂလာန်တံဂှ်ရောၚ်၊ ညးတံ ဂွံထံက်ဂလာန်မာန်ဂှ် အလံၚ်အမာတ်ဂှ် ညးတံဒးတီကီုရောၚ်၊ ဆဵုဂဗပရေၚ်ဍုၚ်ကွာန်လေဝ် ဒးနွံရောၚ်၊ ဒုၚ်ယၟုတၠပညာ လေပ်လိက်သၠုၚ်သၟးတုဲ စိုတ်ဓာတ်ဟွံလှဲလး စေတနာဟွံဍိုက်ပေၚ် ကေၚ်ချဳဓရာၚ်လဝ်ဟၟဲမ္ဂး ညးဍုၚ်ကွာန်တံ ထံက်ဂလာန်မာန်ဟွံသေၚ်ရ၊ စိုတ်ဓာတ်သၟးလှဲလး၊ စေတနာသၟးခိုဟ်၊ ၜိုန်ချဳဓရာၚ်မာန်ကီုလေဝ် ပညာလေပ်လိက်ညိဟၟဲလေဝ် အာဂွံ ဟွံသေၚ်ရ၊ တဲဍိုန်အိုတ် ချူလိက်ဒုၚ်စဳရေၚ် ပတိုန်ကၠတ်ထဝ်ဒးမာန်ရောၚ်၊ လိက်ဒုၚ်စဳရေၚ် ဇကုချူပတိုန်လဝ်တံဂှ်လေဝ် ဇကုဒးဟီုဂး သဳကၠဳမာန် ၜိုတ်ဏံဂွံမ္ဂး ရုမ်ဂပ်မံၚ်ကီုရ။
လညာတ်ညးချူလိက်ဏံ သရုပ်တုဲဒးဟီုမ္ဂး မိက်ဂွံက္လိဂွံ အမာတ်ဂၠိုၚ်ၚ်မ္ဂး အလံၚ်အမာတ် သ္ၚိနွံပ္ဍဲဒေသရ/ဟၟဲပ္ဍဲဒေသရ၊ ပညာသၠုၚ်ရ/သဝ်ရဂှ် အဓိကကွေံဟွံသေၚ် အဓိကဍေံဂှ် အလံၚ်အမာတ် မလုပ်ဒုၚ်ရုဲမာဲ ပ္ဍဲဒေသဇကုလုပ်ဂှ် ညးဒေသတံ ဒုၚ်တဲထံက်ဂလာန်မာန်မ္ဂး ဂွံဖအိုတ်ရ၊ ညးဒေသတံ ဟွံဒုၚ်တဲ၊ ဟွံဒးစိုတ်၊ ထံက်ဂလာန်ဟွံမာန်မ္ဂး ဇကုအလံၚ်အမာတ်ဂှ် ဒှ်မံၚ်ဇကုထဝ် ဒယှ်တမ်ညဝ် သွဝ်မံၚ်လ္တူကျာလေဝ် မုဂွံပရော? သ္ဒးကေတ်သ္ပဒတန် အလံၚ်အမာတ် ညးဒေသတံ ဒးစိုတ်ထံက်ဂလာန်ဂှ်ဟေၚ်ရောၚ်။
အလံၚ်အမာတ်ညးဒေသတံ ထံက်ဂလာန်၊ နွံပၟိက်ဒးစိုတ်ဍာံဍာံဇေတ်တ်ဂှ် ဗီုလဵုဂွံတီ၊ ဗီုလဵုဂွံရုဲစှ်၊ ၜတ်ကၞာတ်ကဵု ပၞောန်လဵု၊ ဂြိုက်ကဵုကၞာဲဇာလဵုတုဲ ဂွံတီ၊ဂွံရုဲစှ်ဒးဂှ်ဟေၚ် အဓိကဇၞော်ရ၊ သ္ဂုတ်သွာတ်နဲကဲရုဲစှ်ဏံ နွံပ္ဍဲတဲညးတာလျိုၚ်ဗော်က္ဆံၚ်ၚ်တံရ၊ ညးတာလျိုၚ်ဗော်က္ဆံၚ်ၚ်တံ နကဵုစိုတ်ဓာတ်စေတနာ ဗုဗုအးအး ဒုၚ်သ္ဇိုၚ်ကဵုညးဒေသ ဂကူမန်ဍာံဍာံပြပြမ္ဂး က္လိဂွံအမာတ်(မၞိဟ်ဍာံဒၞဲါဍာံ)ဂၠိုၚ်ၚ်မာန်ရောၚ်။
