Categories
ပရိုၚ်

ကောံဓရီုဇၞော် ကေတ်လညာတ်ညးဍုၚ်ကွာန် ဗီုပြၚ်သဘၚ်သဳကၠဳ ပရေၚ်ဍုၚ်ကွာန်ဂှ် ပဆုဲလဝ်အခိၚ်

ဝဏ္ဏမာန်၊ ဂိတုမာတ် ၂၅၊ ၂၀၂၀

ကောံဓရီုဇၞော် သွက်ဂွံကေတ်လညာတ် ညးဍုၚ်ကွာန် ဗီုပြၚ်ပေဲါသဳကၠဳပရေၚ်ဍုၚ်ကွာန် တုဲကၠုၚ်တေံဂှ် ဟိုတ်နူ အသိၚ်ယဲကပ် ‘ကဝ်ရဝ်ဏာ’ ဂှ်တုဲ ဒးပဆုဲလဝ်အခိၚ်ရောၚ် ညးမၞုံအခေါၚ်ဟီုဂး ဗော်ဍုၚ်မန်တၟိ ဟီုရ။
“ကောံဓရီုကေတ်လညာတ် ညးဍုၚ်ကွာန် ဗီုကဵုပေဲါသဳကၠဳ ပရေၚ်ဍုၚ်ကွာန်ဂှ် ဟိုတ်နူယဲကပ်ဂှ်တုဲတှေ် ဒးပဆုဲလဝ် အခိၚ်၊ ထေၚ်ကေတ်တှေ် ၜိုတ်ဂိတုမေတေံမှ ဒှ်မာန်ဏောၚ်၊ ဆဂး ဒဵုအခိၚ်လဵုဂှ် ဟွံတီချိုတ်ဏီဏောၚ်” သာ်ဏံ နာဲအံၚ်မ္ၚဵု ကမ္မတဳရေၚ်တၠုၚ်ကေၚ်ကာဗဟဵု ဗော်ဍုၚ်ဍုၚ်မန်တၟိ ဟီုရ။
ကောံဓရီုဇၞော် ကေတ်လညာတ် ညးဍုၚ်ကွာန် ဗီုကဵုပေဲါသဳကၠဳပရေၚ်ဍုၚ်ကွာန် (အမျိုးသားအဆၚ့်နိုၚ်ၚံရေးဆွေး နွေးပွဲ) ကၠောန်ကၠုၚ်လဝ် ပ္ဍဲကဵုဍုၚ်ရေဝ်ဂှ် နူတမ်ကၠာဂှ် ဗော်ဍုၚ်မန်တၟိ ရန်လဝ် သွက်ဂွံကၠောန်အာ အကြာဂိတု မာတ်နွံတုဲ ဟိုတ်နူအသိၚ်ကတဵုဒှ်ယဲကပ် ‘ကိုဝ်ရိုဝ်နာ’ ဂှ်တုဲ မ္ဒးပြံၚ်ပဆုဲဏာအခိၚ်ကီုရ။
အလုံလိုက်ဂၠးတိမွဲ ဟိုတ်နူဒှ်အခိၚ် ဒှ်ဒၟံၚ်ယဲကပ် ‘ကိုဝ်ရိုဝ်နာ’ ဂှ်တုဲ သဘၚ်သဳကၠဳပေန်လုၚ် (၂၁) ဗွဝ်ကၠံ အလန်စတုတ္ထဂှ်လေဝ် မ္ဒးပဆုဲလဝ် အခိၚ်အခါ ဟွံတီဏီရောၚ် နာဲအံၚ်မ္ၚဵု ဆက်ဟီုရ။
“သဘၚ်သဳကၠဳပေန်လုၚ် ရန်လဝ် သွက်ဂွံကၠောန် အကြာဂိတုအေဗရဴဏံဟီုလဝ်ဂှ်လေဝ် ဒှ်ဟွံမာန်ရ၊ မုဒှ်ရောတှေ် အလဵုအသဳဍုၚ်ဂှ် ညးတံလလောၚ်တြးလဝ် စဵုကဵု အေဗရဴ (၃၀) ဏံ ညးတံကၟာတ်လဝ် မၞိဟ်ကောံဟွံဂွိုအ်၊ ကၠောန် သဘၚ်ဟွံဂွိုအ်တှေ် သဘၚ်သဳကၠဳဂှ်လေဝ် ပဆုဲဏာ ဒဵုအခိၚ်လဵုဂှ် ဟီုဟွံဒးဏီ” သ္ဂးရ။
သဘၚ်သဳကၠဳပေန်လုၚ် (၂၁) ဗွဝ်ကၠံအလန်စတုတ္ထဏံဂှ် ကၠာတဲ ရန်လဝ် သွက်ဂွံကၠောန်အာ ပ္ဍဲကဵုဂိတုအေဗရဴဏံ တုဲ အကြာဂကောံရပ်လွဟ်ကောန်ဂကူ ကောန်ဍုၚ်အရၚ်တံကဵု အလဵုအသဳတံ အဃောပညဳပညပ်ဒၟံၚ်တ္ၚဲ သွက်ဂွံ ကၠောန်ဂှ်ရ ပရေၚ်ယဲကပ် ‘ကိုဝ်ရိုဝ်နာ’ ဂှ် မံက်ပြာကတ်ကၠုၚ်အလုံလိုက်ဂှ်တုဲ ပရေၚ်ကမၠောန်အိုတ်သီုဂှ် မ္ဒးပဆုဲ လဝ်ရ။
ပေဲါသဳကၠဳဆဵုဂဗကဵု ညးဍုၚ်ကွာန် ဗီုကဵုပေဲါသဳကၠဳပရေၚ်ဍုၚ်ကွာန်ဂှ် ကၠောန်အာ ပ္ဍဲဗွိုၚ်ဒေသဗော်ဍုၚ်မန်တၟိအုပ်ဓုပ်မွဲ ဒၞာဲတုဲ ကော်ဘိက်အာညးစၞး ဗၞတ်ၜိုတ် (၂၀၀) တၠတုဲ ကေတ်အာကသပ်လညာတ် စပ်ကဵုပရေၚ်ဍုၚ်ကွာန်ရောၚ် ကမ္မတဳကေၚ်ကာ (ဗွိုၚ်ပ္ဍဲဍုၚ်) နာဲဗညာလဴ ဟီုလဴလဝ်ရ။
နူကဵုဗော်ဍုၚ်မန်တၟိ ထ္ပက်လိက်ကသုက်ဒေံါပန်ပှော်အလုံဍုၚ် အေန်သဳအေတုဲ ဂိတုမေ (၅-၆-၇) ဂှ် နူကဵု အစဳအဇန် UPDJC (ပြည်ထောၚ်စုၚြိမ်းချမ်းရေးဆွေးနွေးမှုပူးတွဲကော်မတီ) တုဲ ကၠောန်ကၠုၚ်လဝ် ပေဲါသဳကၠဳ ပရေၚ်ဍုၚ်ကွာန် ကောန်ဂကူမန် လ္တူဍုၚ်ရေဝ် ပွိုၚ် (၃) တ္ၚဲတုဲ ကဏ္ဍပရေၚ်ဍုၚ်ကွာန်၊ ကဏ္ဍပရေၚ်ပိုန်ဒြပ်၊ ကဏ္ဍပရေၚ်မၞိဟ် ကဏ္ဍပွဳပွူသဘာဝ ကေုာံ တိဍာ် ပတိတ်လဝ် လိက်ကၞပ်၊ လိက်စံၚ် နွံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.