ဒၞါဲစွံသုၚ်စောဲလဝ် သွက် Quarantine Center ဘာသ္ဇိုၚ်ပညာ သွက်သၟာကမၠောန်ကလေၚ်စဴကၠုၚ် နူကဵုဍုၚ်သၟာၚ်တံဂှ် ပ္ဍဲကဵုဂိတု ဂျောန် ၅ ဂှ် အလဵုသဳတွဵုရးမန်တံ ကလေၚ်ပအပ်ကဵုလဝ်ရောၚ် သ္ကိုပ်ပရေၚ်ပညာ တွဵုရးဍုၚ်မန် ဒံက်တာ ချိုဝ်ချိုဝ်မျာတ်အံၚ် ဟီုရ။
“အသုတ်ဒုတိယဏံဂှ် ပလေဝ်ပလေတ်လဝ်ဘာ ၜိုတ် ၃၀၀၊ ၄၀၀ ရ။ ဆဂး သုၚ်စောဲလဝ်ဘာဂှ် ၁၀ ဘာလေဝ် ဟွံပေၚ်ပုဟ်၊ ပွိုၚ်ဍုၚ်မုဟ်ဍုၚ်ဂှ် သုၚ်စောဲလဝ် ၜိုတ် ၂ ဘာ၊ ပွိုၚ်ဍုၚ်ရေဝ်ဂှ် ၜိုတ် ၂ ဘာ၊ ပွိုၚ်ဍုၚ်ဇြပ်ဗုဂှ် ၜိုတ် ၃ ဘာ ရ။ ဂိတု ဂျောန် ၅ ဂှ် ကလေၚ်ပအပ်လဝ်ကဵု ဘာသီုဖအိုတ်ရ” သာ်ဏံ ဒံက်တာ ချိုဝ်ချိုဝ်မျာတ်အံၚ် ဂးရ။
ပ္ဍဲကဵုတွဵုရးဍုၚ်မန်ဏံ အသုတ်ပထမဂှ် သုၚ်စောဲလဝ် Quarantine Center ဘာသ္ဇိုၚ်ပညာပံၚ် ၜိုတ် ၆၈၀ တံဂှ် ကလေၚ်သၟးဇ္ၚးလဝ်ကဵုကီု၊ ဂစတ်လဝ် ဂဥုဲဂစိုတ်စၟတံတုဲ ကလေၚ်ပအပ်ကဵုလဝ်ရောၚ် ဂွံတီကေတ်ရ။
ပ္ဍဲဂိတု ဂျူလာၚ် ၂၁ ဏံမ္ဂး သ္ဂောံစပံက်အာ ဘာသ္ဇိုၚ်ပညာတန်သၠုၚ် မၞုံအလုံကၟိန်ဍုၚ်တုဲ အခိၚ်ပအပ် ဘာသ္ဇိုၚ်ပညာတန်သၠုၚ်ဂှ် စနူ ဂျူလာၚ် ၁၃ စဵုကဵု ဂျူလာၚ် ၁၇ ဖျေံလဝ်သ္ဂုတ်သွာတ်ရောၚ် ဂွံတီကေတ် နူကဵုသ္ကိုပ်ပရေၚ်ပညာ တွဵုရးဍုၚ်မန်ရ။
