ရာမည သ္ဂံၚ်နန် (ကလအ်)
ခိုဟ်မ္ဂးဂှ် ရံၚ်ကဵုဇကုမ္ဂး ဇကုဇကုဂှ် စၟတ်လဝ်ခိုဟ်အိုတ်ရ။ ရံၚ်ကဵုဂကောံဂကူမ္ဂး ဇကုဇကုဂှ် စၟတ်လဝ်ခိုဟ်အိုတ်မ္ဂး ပ္ဍဲဂကောံဂကူဂှ် ဖျေံတဴသ္ဂုတ်သွာတ်ဂွံဟွံသေၚ်၊ ဗွဲမဂၠိုၚ်ဟွံအောန်ဂှ် မၞိဟ်ဇကုမှထ္ၜၚ် မၞိဟ်ဇကုမှထိုၚ်သး မၞိဟ်ဇ ကုမှခိုဟ် သာ်ဏံ နွံစလေပ်ရ။ ဆဂး ဂွံဒှ်မၞိဟ်ခိုဟ်ဍာံဟီုဂှ် လတူနူဇကု( မၞိဟ်ဇကုကဵုဇကု) ဖျေံတဴမံၚ်သ္ဂုတ်သွာတ်ဂှ် ညးဂမၠိုၚ်ဖျေံတဴသ္ဂုတ်သွာတ်မှ ခိုဟ်ဟီုဂှ် ဂွံဒှ်ခိုဟ်ဗွဲသဘဴဓရ်၊ အလဵုဇကု (မၞိဟ်ဇကု) ဏောၚ် ဖျေံတဴသ္ဂုတ်သွာတ်မ္ဂး ခိုဟ်မံၚ်ဆမွဲဂကောံတုဲ ဟွံဒှ်သဘဴဓရ်ရ။
ကၠောန်သွက်ဇကုမ္ဂး ဆာန်ဇကုညိ၊ ကၠောန်သွက်ဂကောံမ္ဂး ဆာန်ဂကောံညိ။ ကၠောန်သွက်ညးဍုၚ်ကွာန်မ္ဂး ဆာန် ညးဍုၚ်ကွာန်ညိ။ ကၠောန်သွက်ဂကူမ္ဂး ဆာန်ဂကူညိ။ ကၠောန်မံၚ်သွက်ဇကုတုဲ ဆာန်မံၚ်ဂကောံ၊ ညးဍုၚ်ကွာန်ဂ ကူဂှ် ဒှ်ဟွံထေက်၊ ဟွံထေက်ကဵုဆာန် ညံၚ်ရဴသာ်ဂှ်ကီုရ။ ကၠောန်သွက်ဂကောံ၊ ညးဍုၚ်ကွာန်၊ ဂကူမ္ဂး ဆာန်ညိ ဂကောံ၊ ဆာန်ညိ ညးဍုၚ်ကွာန်၊ ဆာန်ညိဂကူ၊ ကာလဂှ်မှ ၚုဟ်မးဝၚ်ဂျိုၚ်ဂျိုၚ်မွဲ ဂွံနွံတန်တဴအာမာန်ရ။
ဒၟာနူအသုဘမွဲထၞဟ်တုဲ ညံၚ်ရဴရှ်သာဍာ်သာဲမွဲနုၚ် ဟွံဂွံလီုအာဂှ် မံၚ်တန်တဴ ကဵုဂွံလေပ်ညိ။ ခိုဟ်ဍာံဂှ် အလဵုပိုယ်ညး ဗက်လက်ကြဴဟွံဒးကြီု၊ ခိုဟ်ဍာံဂှ် တိတ်နူသၟန်ပါၚ်ဂကောံပိုယ်ဟွံသေၚ်။ ပိုယ်ဟီုမှ မၞိဟ်ပိုယ် ခိုဟ်ကၠုၚ်ဟွံသေၚ်၊ ဂကောံပိုယ်ခိုဟ်ကၠုၚ်ဟွံသေၚ်။ ဂကူပိုယ်ခိုဟ်ကၠုၚ်ဟွံသေၚ်၊ ကမၠောန်ပိုယ် ကၠောန်လဝ်ခိုဟ်ဟ်နွံမံၚ်မ္ဂး ဝၚ်ခိုဟ်မွဲ ပြာကတ်ကၠုၚ် သွက်ပိုယ်မာန်ရ။
လျးအရံၚ်ဍာံမ္ဂး ဟွံဂၠု၊ ခိုဟ်ဍာံမ္ဂး ဟွံဒးဗြု၊ ဇၟာပ်ညးအဲ ဂွံဒုၚ်စသိုၚ်၊ ဇၟာပ်ညးအဲ ဒးထိုၚ်သး၊ ဒုၚ်လဝ်ယၟုလျးအရံၚ်တုဲ စဳပျးကဵုဟွံမာန်၊ ဟွံလျးတၟးမ္ဂး လျးအရံၚ်ဏံ ဟွံဒှ်ဒတုဲဖဵုသွက်သတ်ရ။ ဒုၚ်လဝ်ယၟုခိုဟ်ဍာံတုဲ ဗက်ကြီုမံၚ်သၟး၊ မုလေဝ်ကၠောန်လဝ် ကမၠောန်လ္ပာ်ခိုဟ်ဟ် ဟွံမွဲမ္ဂး ဟွံတၟေၚ်ရ။ ဝၚ်ဇကုချိုတ်တ်ဂှ် ဒမျိုၚ်ကေတ်ဂျိုၚ်ၚ် ဂွံတဴဟွံသေၚ်၊ ဝၚ်ဂျိုၚ်ၚ်ဂှ် ဂစိုတ်တဴချိုတ်ဟွံသေၚ်၊ ကမၠောန်ဇကုဂှ် ဒှ်သက်သဳခိုဟ် သွက်ဘဝရ။
ကြီုကေတ်ဂွံဟွံသေၚ်၊ ဇကုယီုမံၚ် ပ္ဍဲအသိုၚ်မုဟ်ညးတၞဟ်တုဲမှ ဂွံဟီုပတိတ်ညးခိုဟ်ဂှ် ဒှ်ဟွံထေက်၊ အဓိကမွဲဂှ် ညးခိုဟ်မံၚ်ဍာံဍာံ ယဝ်ဒှ်မ္ဂး ဇကုဟွံဒးကြီုပတိတ်တုဲ ဒှ်ညးကၠောန်ကမၠောန်၊ ကၠောန်သွက်ဂကောံ၊ ကၠောန်သွက်ညး ဍုၚ်ကွာန်၊ ကၠောန်သွက်ဂကူခိုဟ်မွဲ ညးဂမၠိုၚ် ဒုၚ်ကေတ်လဝ်တဲ တုဲမံၚ်ရ။ ဇကုကြီုတုဲမှ ညးခိုဟ်ကၠုၚ်ဟွံသေၚ်၊ ဇကုဖျေံကဝုတုဲမှ ညးပရေံအာဟွံသေၚ်၊ အဓိကဂှ် ကမၠောန်ညးဟေၚ် လးထ္ၜးမံၚ်ဝၚ် သွက်ညးဏောၚ်။
ဒှ်မံၚ်မွဲကမၠောန်၊ မွဲဂကောံ၊ မွဲစွံမ္ဂး ဒးထိုၚ်သးညးသကအ်လၟိုန် သာ်ဏံ ဒှ်ထေက်ဟွံသေၚ်၊ ပရေၚ်ကမၠောန်ပိုယ် ယဵု လ္ဂူမံၚ်ရဟာ၊ တပ်တးမံၚ်ရဟာ၊ ဟွံယဵုလ္ဂူဟာ၊ ၚံက်မံၚ်ဟာ ချပ်ဗ္စာတုဲမှ ထေက်ကဵုဒးထိုၚ်သး၊ ဂလာန်မ္ဂး “မံၚ်အကြာသမၠီု၊ ဒှ်သမၠီု၊ မံၚ်အကြာတၠပညာ၊ ဒှ်တၠပညာ” ၜိုန်သ္ဂးလဝ်နွံလေဝ် ဇကုမံၚ်အကြာသမၠီု တီတဴမ္ဂး ထေက်ကဵုဒးဂံၚ်ပါဲတိတ် (ထေက်ကဵုဒးဂံၚ်ပဠေဝ်၊ ထေက်ကဵုဒးဂံၚ်ဖံက်ပၠန်တဴ ညံၚ်ဂွံခိုဟ် ညံၚ်ဂွံဒှ်တၠပညာ) မွဲမာန်ကီုမှ ဂွံဒှ်ညးမၞုံကဵုအစောန်စရာဲမွဲမာန်ရ။
တပ်၊ ၚံက် ပွံက်ဏံတဴပ္ဍဲညးဂှ်ရော–? ပၠုပ်သၟာန်မ္ဂး တပ်၊ ၚံက် ပွံက်ဏံ တဴပ္ဍဲပိုယ်မွဲဂကောံဓရ်ဟွံသေၚ်၊ တဴပ္ဍဲညးဂမၠိုၚ်ဏောၚ်ဂှ် အလဵုပိုယ် ဒးဂံၚ်ဒုၚ်ကေတ်တဲ၊ နွံပၟိက်ကဵုခိုဟ်မ္ဂး ကမၠောန်ခိုဟ်ဂှ် လ္ပကဵုတိတ်အာနူသ ကေံတဲပိုယ်ညိ၊ နွံပၟိက်ကဵု ဝၚ်ဂျိုၚ်ဂျိုၚ်မ္ဂး သက်သဳလ္ပာ်ခိုဟ်ဟ်ဂှ် ဒးကတဵုကၠောန်အာကီုမှ ဝၚ်ပိုယ်ဂွံဂျိုၚ် သၟေဟ်တဴမာန်ရ။
ညးခိုဟ်ဍာံမွဲ၊ ညးတပ်တးဍာံမွဲဂှ် ဟွံထိုၚ်သးညးမ္ဂး မံၚ်ဟွံမာန်၊ လတူကမၠောန်ဒတုဲဖဵုညးဂှ် ဒှ်ဝၚ်ဂျိုၚ်ဂျိုၚ် မၞုံ ကဵုၚုဟ်မးညးရ။ မၞိဟ်ဗ္ဒာဲညးချူတုဲမှ ဝၚ်ညးဂျိုၚ်၊ ဝၚ်ညးခိုဟ်ဟွံသေၚ်၊ ဗွဲတၟေၚ်ဂှ် ကမၠောန်ညး၊ ဒ္ဂေတ်ညးခိုဟ် တပ်တးဂှ်ဟေၚ် ညးဟွံဟီုထိုၚ်သးဂှ် ညးလဵုဟွံမွဲ ဇၟာပ်ညးအဲဟီုထိုၚ်သး ကြီုကေတ်စဂုဏ်စရာဲလေပ်ရ။
ပ္ဍဲဘဝမွဲဘဝဂှ် ဗ္ဒဓယံက်ညးတုဲမှ ဂွံသာဂှ် ဒှ်ညးကျဘဝမွဲရ။ ဓယံက်ဇကု အခန်ဂံက်မံၚ်ကီုဏောၚ်ဂှ် ပိုယ်ဒးကၠိုဟ် ကေတ်ကီု၊ ဗ္ဒလဝ်ဓယံက်ညးတုဲမှ ပိုယ်ဂွံသာ၊ ဗ္ဒလဝ်ဓယံက်ညးတုဲမှ ပိုယ်ဂွံဂျိုၚ်ဟီုဂှ် တာလျိုၚ် သွက်ဘဝပိုယ်ဂှ် ဒှ်ညးကေတ်တာလျိုၚ်ဘဝမွဲ မာန်ဟွံသေၚ်တုဲ မုလေဝ် ဟွံဒှ်ဂုဏ်ဖဵုကဵု အစောန်စရာဲ မကလိဂွံလဝ်ဂုဏ်ဖဵုဘဝဂှ်ရ။
သက်သဳပိုယ်ဂှ် ဒှ်ဝၚ်ပိုယ်ရ၊ ဝၚ်ပိုယ်ဂှ် ဒှ်ဝိာဏ်ညးဂမၠိုၚ်ရ၊ ပိုယ်ၜိုန်ပြဟ်အာ နူကဆံၚ်မွဲမွဲကဵုဒှ် ကၠာဝိဉာဏ်ညး ဂမၠိုၚ်ဂှ် ကောံဗိုၚ်မံၚ် ဗ္ဒာဲသက်သဳပိုဲမာန်ဟေၚ်ရ။ ဟိုတ်ဂှ်ရ သက်သဳခိုဟ်ဟ် မၞုံကဵုၚုဟ်မးဂှ် လုကဴ ပိုယ်ဒးလဝ်တာလျိုၚ်၊ ဒးယိုက်ဂၠေၚ်လဝ်ဂှ် ကမၠောန်မၞုံကဵုၚုဟ်မးတံ ကဵုဂွံကၠောန်တဴမာန်ညိ။ ပိုယ်ကၠောန်လဝ်နွံမှ ဘဝပိုယ် ဂွံဒှ်စၟတ်သမ္တီသက်သဳ ပ္ဍဲတာလျိုၚ်ပိုယ်မာန်။
မာန်လေဝ်လ္ပကြီု၊ ကျလေဝ်လ္ပဂြိပ်ဒဴ၊ ပိုယ်ကြီုမံၚ်သၟးတုဲ လတူကမၠောန်ပိုယ် ညးဂမၠိုၚ်ဒုၚ်ကေတ်တဲဟွံမာန်မ္ဂး အကြီုပိုယ်ဂှ် က္လေၚ်ဒှ်ဂျိကဵုပိုယ်မာန်မံၚ်ဏောၚ်။ ၜိုတ်ဂ္စာန်မာန်ဂှ် လ္ပမၚ်အခိၚ်တုဲ ဂ္စာန်ကၠောန်တဴညိ။ ကမၠောန်ဒှ်ဖဵုဂှ် ဂျိုၚ်နွံကဵုဝၚ်၊ ခိုဟ်ဍာံဟီုဂှ် ဇၟာပ်ညးအဲဟီုထိုၚ်သးတုဲ ကေတ်တဴဂုဏ်စရာဲအိုတ်ရ။ ပရေံဟီုဂှ် ဇၟာပ်ညးအဲ ဟီုဂရိုဟ်ထေၚ်သောဲတဴအိုတ်ရ။
ဂုဏ်စရာဲမၞိဟ်မွဲမွဲဂှ် နွံတန်တဴမံၚ် ပ္ဍဲသၟန်ပါၚ်မၞိဟ်တံဟွံသေၚ်၊ နွံတန်တဴမံၚ် ပ္ဍဲကမၠောန်ရ။ ကၠောန်လဝ်ခိုဟ်မ္ဂး ဂုဏ်စရာဲနွံရ။ ကၠောန်လဝ်ဟွံခိုဟ်မ္ဂး ဂုဏ်စရာဲဟွံမွဲရ။ လတူနူပိုယ်ဟီုထိုၚ်သး၊ စောပကမံၚ် ဒှ်ရနွံကဵုဂုဏ်စရာဲ၊ ဟွံမွဲကဵုဂုဏ်စရာဲဂှ် ဂျိုၚ်မံၚ်ပ္ဍဲကမၠောန်ဟေၚ်ရ။ ဂလိုၚ်ပိုယ်ကြီုမံၚ်ဂှ် ဂျိုၚ်တဴဟွံသေၚ်၊ ဂလိုၚ်ပိုယ်ပျုတ်ဗ္ဒေက်မံၚ်ဂှ် ချိုတ်အာဟွံသေၚ်၊ ဗွဲတၟေၚ်မ္ဂး နွံမံၚ်ပ္ဍဲကမၠောန်ဟေၚ်ရ။
ညံၚ်ဂွံဂျိုၚ်အာဍာ်ဇမၠိၚ်မာန်ဂှ် ဟိုတ်နူသၟန်ပါၚ်ပိုယ်ကြီုစဟွံသေၚ်၊ ဟိုတ်နူကမၠောန်ဒတုဲဖဵုညးနွံဟေၚ် ညး ဂွံအာဍာ်ဇမၠိၚ်ဂွံ၊ လတူနူပိုယ်မၚ်ကြီုမံၚ်ညးခိုဟ်၊ အစောန်စရာဲညးနွံဂှ် ပိုယ်ဘိုၚ်ကၠောန်တဴကမၠောန် မွဲကရောံ ညးညိဂှ် မိက်ဂွံကဵုဒှ်တဴ၊ ဒၞာဲဒးဟီုထိုၚ်သးမၞိဟ်ဇကု ကၠံက္ဍိုပ်ကၠံဂှ် ပိုယ်ဟီုထိုၚ်သး ၜိုတ်ဒ္စာံစှော်က္ဍိုပ်ကၠံဂှ် ရုမ်ဂပ်မံၚ်ရ။
လတူနူဆာန်မံၚ်မၞိဟ်ဇကု မွဲကရောံမွဲဂကောံဂှ် ဆာန်တဴကမၠောန် ကရောံမွဲဂကောံမ္ဂး ခိုဟ်နွံကဵုဂုဏ်စရာဲ ဗွဲမလောန်ရ။ ဒှ်မွဲဂကောံ ဒးကၠောန်ကမၠောန်မွဲစွံမ္ဂး လ္ပဗက်ဆာန်မၞိဟ်တေံ မၞိဟ်ဏံညိ။ ဆာန်ကမၠောန်ပိုယ် ပတဝ်လဝ်က္ဍိုပ်ဂှ်ညိ။ ဗက်ဆာန်မံၚ် မၞိဟ်တေံမၞိဟ်ဏံမ္ဂး ကမၠောန်ပိုယ်ဂှ် ဒးဒုၚ်လီုတဴမာန်မံၚ်ဏောၚ်။ ကၠောန်ကမၠောန်ဂကောံတုဲ ဗက်ဆာန်မံၚ်ပူဂဵုမ္ဂး ဇကုဒှ်မၞိဟ်ဗက်သာဏောၚ်ဂှ် ချပ်ရံၚ်ကဵုဂွံစိုပ်ညိ။ ခိုဟ်ဟီုဂှ် လတူကမၠောန်ဇကုဂှ် ညးဂမၠိုၚ်ဒုၚ်တဲမာန်မှ ဂွံဒှ်ခိုဟ်၊ ခိုဟ်မံၚ်အကြာနာံမြိုၚ်ဇကုသၟးဂှ် ဒှ်ခိုဟ်ဟွံသေၚ်၊ ဆေၚ်ဇကုဂှ် ဇကုက္လၚ်ဂွံ၊ ဆဂး ညးတၞဟ်ကလၚ်ဟွံဂွံမ္ဂး ဆလအ်မှ ဆေၚ်ဏံ ဒှ်ဆေၚ်ခိုဟ်မွဲဟွံသေၚ်၊ ဆေၚ်ဇကု ၜိုတ်နာံမြိုၚ်ဇကုသၟး လှေ်မံၚ်မ္ဂး ဆေၚ်ဇကုဂှ် ဒှ်ဆေၚ်ညးဂမၠိုၚ် ဒုၚ်ကေတ်တဲမာန်ဟွံသေၚ်၊ ညံၚ်ညးဂမၠိုၚ် ဂွံဒုၚ်ကေတ်တဲ၊ ညံၚ်ဂမၠိုၚ်ဂွံလှေ်ဗက်ဂှ် ဂ္စာန်တုဲ ထေက်ကဵုဒးထၜးအစောန်စရာဲမာန်မှ ဂွံဒှ်ဆေၚ်ခိုဟ်မွဲတုဲ ညးအဲဂွံလှေ်ဗက် မွဲကရောံကဵု ဂကောံနာံမြိုၚ်ဇကုမာန်။ ခိုဟ်မံၚ်မ္ဂး ဆက်သှေ်၊ ခိုဟ်မံၚ်မ္ဂး ဆက်ရှေ်သှေ်၊ ခိုဟ်မံၚ်မ္ဂး ဆက်လှေ်အာ၊ ဟွံခိုဟ်မ္ဂး ဟွံသၟေဟ်၊ ဟွံဆက်ရှေ်သှေ်၊ ၜိုန်ဆက်လှေ်လေဝ် ညးမွဲဟွံဗက်လှေ်ရပုဟ်ဂှ် ဒှ်ကမၠောန်မၞုံကဵုသဘဴဓဝ်ဍာံပြ မလုပ်ဇိုန်ကဵုတသိုက်ဖဵု မဍာံဇေတ်ကုသ္ၚိကၟိန်၊ ကုဂကောံ၊ ကုညးဍုၚ်ကွာန်၊ ကုဂကူဏောၚ်ဂှ် ဒှ်ခိုဟ်မၞုံကဵုဂုဏ်စရာဲသတ္တိ၊ ဗျတ္တိ ဍိုက်က်ပေၚ်ၚ်မွဲမာန်ဏောၚ်ဂှ် —