ဗညာပိုၚ်၊ ဂျူလာၚ် ၂၉၊ ၂၀၂၀
အခိၚ်ကာလ ကမ္မယှေန်ပေဲါရုဲမာဲတံ ကာတ်စရၚ်ညးဆန္ဒမာဲမ္ဂး အုပ်ဓုပ်ကွာန်တံ ဒးကဵုအာသမ္တီ ကုညးဍုၚ်ကွာန် တံ ညံၚ်ဂွံအာကျောဝ်စရၚ်မာဲထေက်ရောၚ် ဖက်ဆောညးအုပ်ကာ လၟိဟ် (၁) ဗော်ညဳသၟဟ်မန် နာဲလျးတၟး ဟီုရ။
‘နူကမ္မယှေန်တံ ဍေံကာတ်စရၚ်မာဲတှေ် အုပ်ဓုပ်ကွာန်ကီု၊ ကမ္မယှေန်ကွာန်တံကီု နကဵုစက်သၠဲရမျာၚ်ဂှ် ဒးကဵု သမ္တီဆဝ်မ္ၚုဟ်အာ ညးဍုၚ်ကွာန်တံထေက်ဏောၚ်။ ညးဍုၚ်ကွာန်တံလေဝ် မိၚ်ညာတ်တုဲတှေ် အခေါၚ်ဇကုကဵုမာဲဂှ် ညံၚ်ဟွံဂွံလေၚ်ဆောံအာဂှ် စၟဳစၟတ်ယၟုဇကု ပါ/ဟွံပါတုဲ ယၟုဟွံပါတှေ် စုတ်စရၚ် ပ္ဍဲကမ္မယှေန်ကွာန်ညိ’ သာ်ဝွံ နာဲလျးတၟး ဂးရ။
စရၚ်ညးဆန္ဒမာဲ အလန်ပထမဂှ် စနူဂိတုဂျူလာၚ်(၂၅) စဵုကဵုစိုပ် ဂိတုအဝ်ဂါတ် (၇) တုဲ ပွိုၚ် (၁၄) တ္ၚဲ ဗါန်ကာတ် စွံလဝ် ရုၚ်ဂကောံကမ္မယှေန် ပေဲါရုဲမာဲအဆံၚ်ဆံၚ်ဂှ်လေဝ် ဂွံတီကေတ်ရ။ တၚ်နၚ်စရၚ်ယၟုဗၠေတ်ဗၠေၚ်နွံမ္ဂး အာတ် ကေတ်တၞးလိက်သွက်ဂွံဗပေၚ်တုဲ ကလေၚ်ပတိုန်ထ္ၜးဂွံရ။
‘အလဵုအသဳတံဂှ် ဍေံဒးကာတ်ကဵု တၞးဆန္ဒမာဲဂှ်ဏောၚ် အခေါၚ်စုတ်မာဲ နွံဟာ/ဟၟဲဟာ၊ ယၟုပါ/ဟွံပါ၊ မဂၞန်ကာတ်ဒှ် ကောန်ဍုၚ်ဂှ် ဗၠေတ်မံၚ်ဟာ ပိုဲတံဒးအာကျောဝ်ဏောၚ်၊ ဠဂှ်မှ ပိုဲတံဂွံတီ တုဲတှေ် ညးဍုၚ်ကွာန်မန်တံ ဂွံစုတ်မာဲဂှ် တာလျိုၚ်နွံမံၚ် စွံအဓိကတုဲ ဒးအာကျောဝ်ရ’ သာ်ဏံ ကောန်ကွာန်စဴဟလာ ပွိုၚ်ဍုၚ်ရေဝ်သၟဝ်ကျာ နာဲဉာဏ် သိုက်ရာမာန် ဟီုရ။
ညးတၠဆန္ဒမာဲတံ ကာလကၠုၚ်ကျောဝ်စရၚ်တုဲ နွံပၟိက်မ္ဂး ကၠောန်သ္ပအာ အတိုၚ်လၟေၚ်ကမၠောန် (၃) တၚ်ဏံ (က) ပ္ဍဲစရၚ်မာဲဂှ် ယၟုဟွံပါကၠုၚ်မ္ဂး နကဵုဗီုပြၚ် (၃) ဂှ် သ္ဂောံအာတ်မိက် ဂွံကလေၚ်စုတ်ယၟု ပ္ဍဲစရၚ်မာဲဂှ်ကီု၊ (ခ) ညးဟွံဒးပါထေက်တံလေဝ် ပါလုပ်ကၠုၚ်ဒၟံၚ်မ္ဂး နကဵုဗီုပြၚ် (၄) ဒးစဵုဒးစးတံကီု၊ (ဂ) တၚ်ဂၞေၚ် ပ္ဍဲစရၚ်မာဲပါဂှ် ဗၠေတ်ဒၟံၚ်မ္ဂး နကဵုဗီုပြၚ် (၄-ဂ) ညံၚ်ဂွံကလေၚ်ပတိုန်ထ္ၜးဂှ် ကမ္မယှေန်ပေဲါရုဲမာဲဂှ် လလောၚ်တြးဆဝ်မ္ၚုဟ်လဝ်ရ။
ပရေၚ်ကာတ်ဗါန်စရၚ် ညးဂွံအခေါၚ်ကဵုမာဲအလုံဍုၚ်တံဂှ် ဂိတုအံက်တဝ်ဗာတေံမ္ဂး ကာတ်ဗါန်အာ အလန်လက္ကရဴအိုတ် ပွိုၚ် (၁၄) ပၠန်ရောၚ် ဂွံတီကေတ်ရ။
