ပ္ဍဲကဵုတွဵုရးဍုၚ်မန်ပိုဲ ရဲသွံမံၚ်ကယျိုၚ်ကယျဝ်မန်တအ်ကီု ရဲကၠောန်ကမၠောန် ကွတ်တဲတုတ်တ် ကယျိုၚ်ကယျဝ်မန်တအ်ဂှ် ဟိုတ်နူကဵုအခိၚ်ယဲကဝ်ဝေဒ် (၁၉)တုဲ ဒှ်မံၚ်အခက်ခုဲကီု ဂွံတီကေတ်ရ။
ပ္ဍဲကဵုဒေသမန်တအ်ဂှ် ဟိုတ်နူကဵုယဲဏံတုဲ ကၠောန်ပေဲါသဘၚ်အောန်စှ်ေ အာကၠုၚ်စဗၠးဗၠးၜးၜး ဟွံဂွံတုဲ ကယျိုၚ်ကယျဝ်မန်တအ် ဂွံသွံစအောန်မံၚ်ဂှ်လေဝ် ညးသွံကယျိုၚ်ကယျဝ်မန် တၠဆေၚ်မိမသၟတ်မန် မိနန္ဒာရဳ ဟီုကၠုၚ်လဝ်ရ။
“စနူကဵုယဲကဝ်ဝေဒ် (၁၉) တုဲ သွံစဟွံခိုဟ်၊ ဗွဲမဂၠိုၚ်တှ်ေ ကယျိုၚ်ကယျဝ်မန်ပိုဲတှ်ေ ကောန်ဂကူမန်ပိုဲရ လတက်စဂၠိုၚ်၊ တုဲပၠန်ကွာန်မန်နာနာတအ်လေဝ် ဟွံဂွံကၠောန်ပေဲါသ္ဘၚ်တှ်ေ ဗွိုက်လတက်မန်လေဝ် ဟွံဂွံသွံ” သာ်ဝွံ မိနန္ဒာရဳ ဂးရ။
တုဲပၠန် ဒှ်အာအခိၚ်ယဲဏံတုဲ စၚ်ကၠောန်ပတိတ်ဂၞိန်မန် ကွတ်တဲတုတ်တ်တအ်ဂွံလေဝ် ဒးဒေံါဇူလဝ်နွံမံၚ်တုဲ သၟာကမၠောန်ကၠောန်ပတိတ်မံၚ်ဂၞိန်မန်ဂွံလေဝ် ဟိုတ်နူကဵုကမၠောန်ဟွံမွဲဂှ် ဒှ်မံၚ်အခက်ခုဲနွံမံၚ်ကီု ဂွံတီကေတ်ရ။
ကယျိုၚ်မန် ဂၞိန်မန်စဏံဂှ် တုတ်စဝါတ်မံၚ်တုဲ မွဲၜါတ္ၚဲမှ ဂွံဂၞိန်မန် မွဲခတှ်ေ ဒးကဵုအခိၚ်တၟာဂၠိုၚ်ဂွံလေဝ် ဂွံတီကေတ်ရ။
“လမုဟ်ဂှ်တှ်ေ သွံရာန်စ ကပေါတ်ကယျိုၚ်ကယျဝ်မန်ဂှ် ဍေံအောန်မံၚ်တှ်ေ စၚ်တုတ်တုတ်ဂှ်လေဝ် ဗဒေံါလဝ်” သာ်ဝွံ တၠဆေၚ်ဖျာ ကယျိုၚ်ကယျဝ်မန် မိကလျာ ဂးရ။
သွက်ဂွံဆက်ပတိတ်အာတမ် ပ္ဍဲပရေၚ်ကမၠောန်တၟိဂှ် ဂၠိုက်ယာတ်တုတ်လဝ်တုဲတုဲတံဂှ် ဒးသွံရာန်မံၚ် ၚုဟ်တမ် ဟွံစိုပ်ရောၚ် တၠကမၠောန်ကယျိုၚ်ယေန်သၞာၚ်မန် ဇာတိမန် ဟီုဂးလဝ် နွံကီုရ။
လၟုဟ်ဝွံ တၠစက်တုတ်တ် နူကဵုဍုၚ်အၚ်ဝတေံလေဝ် အလဵုညးတံ ပတိတ်လဝ်ကယျိုၚ်ကယျဝ်မန်တုဲ သွံတြး ကေတ်ကၠုၚ်အဆက်ကဵု ရဲဆေၚ်ဖျာ တွဵုရးဍုၚ်မန်တံ တိုက်ရိုက်ဂှ်ရ စပ်ကဵုကယျိုၚ်မန်တုတ်တဲတံဂှ် တၚ်ကော်ဆော ဇၞော်မံၚ်ရောၚ် ဂွံလ္ၚတ်တီကေတ်ရ။
