သွက်ဂွံလွဳလွတ်အာယဲကဝ်ဝေဒ်တံ တၠဆေၚ်ကျဝ်ကျာ (ကျော်ကြား ဆောက်လုပ်ရေးပစ္စည်းရောၚ်းဝယ်ရေး) သိုၚ်ခၞံကဵုလဝ်ဒါန် ရုၚ်ဂဥုဲယာယဳမွဲဂှ် ကာလမၞိဟ်ယဲကဝ်ဝေဒ် ဂၠိုၚ်တိုန်ကၠုၚ်မှ စကာအာရောၚ် ဂွံတီကေတ်ရ။

ပြဟ်ဟ်ဏံဂှ် ပ္ဍဲကဵုရုၚ်ဂဥုဲဍုၚ်မတ်မလီုဂှ် မၞိဟ်ယဲကဝ်ဝေဒ် ဟွံထ္ၜးသက်သန်ယဲ ပေၚ်အာတ္ၚဲတံလေဝ် ဂွံစှ်ေအာနူကဵုရုၚ်ဂဥုဲ (၂၀၀) တၠပြၚ်ဂှ်ရ ဒၞာဲဒၟံၚ်တြေံဂှ် ရုံဂပ်မံၚ်ဏီရောၚ် ညးတာလျိုၚ်ဌာနပရေၚ်ထတ်ယုက်တံ ဟီုရ။

“မၞိဟ်ယဲဂွံပေၚ်ဒၞာဲဂှ် နွံမံၚ်ညိညဏီ။ ဒၞာဲဒးဗပေၚ်ထေက်တံ ဒးကၠောန်ထေက်တံဂှ်လေဝ် ပိုဲစကာလဝ် အရၚ်ဂွံဗပေၚ်ကဵုနွံဏောၚ်။ ကၠာဟွံဂွံကၠောန်ဒတုဲဂှ် ပိုဲကဵုပါ်လဝ် အရၚ်မၞိဟ်တြုံကဵုမၞိဟ်ဗြဴ ကဵုဒၞာလဝ်ရ။ တုဲတှ်ေ ဒၞာဲညးတံဒးကၠောန်အာဂှ်လေဝ် သှ်ေမံၚ်ညိညဏီ။ လပါ်ပိုဲဂှ်လေဝ် ဟွံဒးဃရေက်စကွေံကွေံပုဟ်။ မုဒှ်ရောတှ်ေ ပ္ဍဲကဵုရုၚ်ဂဥုဲဇၞော် (မတ်မလီု) ဂှ်လေဝ် ဒၞာဲသၠးမံၚ်ဏီ၊ ဒၞါဲသၠဲလဝ်ကၠာတေံ မျေနဳကုမ်ဂှ်လေဝ် ဒၞာဲနွံမံၚ်ဏီ” သာ်ဝွံ ဒံက်တာဝတ်မှုၚ် ဒုညးစၞောန်ပ္ညုၚ် ဌာနက္ဍိုက်ပ်ပရေၚ်ထတ်ယုက် တွဵုရးဍုၚ်မန် ဟီုရ။

ပရေၚ်အုပ်ဓုပ်ရုၚ်ဂဥုဲဏံလေဝ် စွံပ္တန်လဝ်သၟဝ် ရုၚ်ဂဥုဲဇၞော်ဍုၚ်မတ်မလီုတုဲ ပြဟ်ဟ်ဏံ ဒု-ဂဥုပ်ရုၚ်ဂဥုဲမွဲတၠ၊ ညးဒုၚ်လျိုၚ်မွဲတၠ၊ အ္စာၝောံဂဥုဲမွဲတၠတံ သွက်ဂွံကေတ်အာတာလျိုၚ်မာန်ဂှ် ဖန်ဇန်လဝ် နွံရောၚ်။

“လပါ်စမြိုၚ်သိုၚ်ခၞံကဵု လပါ်ကပေါတ်ဂှ် ၜိုတ်ညးတံသ္ပမာန် ညးတံစုတ်လဝ်ကဵုရ။ လပါ်ဌာနထတ်ယုက်ပိုဲဂှ် ယဝ်ရ ဟွံဒးစွံမၞိဟ်ယဲသ္ကာတ်မြဟ်တံပုဟ်တှ်ေ မုလေဝ် ဟွံဒးစုတ်ပုဟ်။ ယဝ်ရ စွံမၞိဟ်ယဲက္ဍၚ်တံတှ်ေ စက်ယီုကျာတံ စက်ၜတ်ဆီတံ ဒးကၠောန်အာမံၚ်ဏီလေဝ်” သာ်ဝွံ ဒံက်တာဝတ်မှုၚ် ထပ်ဟီုလဝ်ရ။

ပ္ဍဲကဵုစမြိုၚ်လွဳလွတ်ယဲကဝ်ဝေဒ် သာမညမွဲဂှ် စွံပ္တန်အာ မၞိဟ်ယဲ (၁၀၀) တၠမ္ဂး အ္စာဝန် (အထူးကု) ပန်တၠ၊ အ္စာဝန် ကေုာံ အ္စာၝောံဂဥု (၈) တၠ ဒးဗဂေတ်ကဵုတာလျိုၚ်ရောၚ် ဂွံတီကေတ်ရ။

ပြဟ်ဟ်ဏံ ပ္ဍဲကဵုတွဵုရးဍုၚ်မန်ဂှ် မၞိဟ်ယဲကဝ်ဝေဒ် သ္ပဒဒန် နွံမံၚ် (၃၆၂) တၠတုဲ ချိုတ်အာလဝ် (၇) တၠကီု ဂွံတီကေတ်ရ။