ဗညာပိုၚ်၊ နဝ်ဝေမ်ဗာ ၂၈၊ ၂၀၂၀

ဂိတုနဝ်ဝေန်ဗာ (၂၃) ဂှ် ဗော်ညဳသၟဟ်မန်တံ စောဲလဝ်ဂဗုတ် ကုညးစၞးကၠတ်ထဝ်တွဵုရး ပွိုၚ်ဍုၚ်ကျာ်မြဟ် ဗော် NLD ဒဝ်ခေန်မျဵုမျေအ် နကဵုသၞောဝ်ဥပဒေပေါဲရုဲမာဲတုဲ စောဲလဝ် ပ္ဍဲကဵုရုၚ်ဗၠာဲသၟိၚ် ကွာန်ၜါသွာၚ်ဂှ်ရောၚ် ဂွံတီကေတ်ရ။
ညးစောဲလဝ်ဂဗုတ် မိသုမန်ဂှ် “ပိုဲတံအာ ပ္ဍဲကွာန်(ပေါလောကျေးရွာ) ဂှ်တုဲတှေ် ပိုဲတံဂွံနၚ်သက်သဳမွဲလေဝ်၊ တုဲတှေ် ပိုဲတံဒးပ္တိုန်ထ္ၜးကဵု ဗော်ပိုဲတံရ၊ နကဵုသက်သဳပေၚ်ပေၚ်ဂှ် ပိုဲတံပ္တိုန်ထ္ၜးရ၊ ပိုဲတံဂှ် ပ္ဍဲကာလပေါဲရုဲမာဲဂှ် ယှုက်မံၚ်တုဲတှေ် ဟွံဂွံဂ္ဇံကောံဓရီုဏီ၊ စၟတ်တ္ၚဲ (၂၂) ဂှ်မှ ဂွံဂ္ဇံကောံဓရီုတုဲတှေ် ဂွံတၚ်တုပ်စိုတ်တုဲ စၟတ်တ္ၚဲ (၂၃) ဂှ်မှ ပိုဲတံဂွံပ္တိုန်ထ္ၜးရ” သာ်ဏံ ညးဟီုရ။
ပ္ဍဲကဵုတ္ၚဲပေါဲရုဲမာဲ နဝ်ဝေမ်ဗာ (၈) ဂှ် ညးမဇၞးလဝ်ကၠတ်ထဝ်တွဵုရး ဒဝ်ခေန်မျဵုမျေအ်ဂှ် ညးစရၚ်မာဲဟွံမွဲ ကောန်ကွာန်(ပေါလောကျေးရွာ) (၁၈) တၠတံ ညံၚ်ဂွံစုတ်အာမာဲမာန်ဂှ် ပကီုပရာပ်လဝ် ဂကောံကမ္မယှေန်ကွာန်တံတုဲ ကၠောန်သ္ပကၠုၚ်လဝ်ရောၚ် ဂွံတီကေတ် နူကဵုလိက်တေၚ်ဂှ်ရ။
အပ္ဍဲကဵုစောဲလဝ်ဂဗုတ် ကုညးစၞးကၠတ်ထဝ်ဂှ် နကဵုဥပဒေပေါဲရုဲမာဲ ၝောံပိုဒ် (၆၁/၆၂) (ပ)၂၇/ ၂၀၂၀ ဂှ်တုဲ ဗၠာဲသၟိၚ်ကွာန်ၜါသွာၚ်တံလေဝ် စၟဳစၟတ်ဒၟံၚ်ဖိုဟ်ရရောၚ် ဂွံတီကေတ်ရ။
ဆေၚ်စပ်ကဵုပေါဲရုဲမာဲတုဲတေၚ်မ္ဂး ဂိတုနဝ်ဝေမ်ဗာ စနူစၟတ်တ္ၚဲ (၉) တုဲ ပွိုၚ်အပ္ဍဲ (၁၅) တ္ၚဲဂှ်ဟေၚ် ဒၞါဲမဆေၚ်စပ်ရုၚ်ဗၠာဲသၟိၚ်တံ တေၚ်အာမာန်ရောၚ်ဂှ် ဂွံတီကေတ်ရ။
“ပိုဲတံ ဒးပ္တိုန်ထ္ၜးကဵု ရုၚ်ဥပဒေဏောၚ်၊ တုဲတှေ် ပိုဲတံပ္တိုန်ရုၚ်သၞောဝ်ဓဝ် ပွိုၚ်ဍုၚ်ကျာ်မြဟ်ရ။ သက်သဳလ္ပါ်မိသုမန် ပ္တိုန်လဝ်ဂှ်လေဝ် စၟဳစၟတ်မံၚ်ဖိုဟ်ရ” သာ်ဝွံ လ္ပါ်ညးစောဲလဝ်ဂဗုတ် (တရားလႊတ်တော်ရှေ႕နေ ဦးဇော်ဝၚ်း) ဂှ် ဂးရ။
တုပ်သာ်ဂှ်ကီု တွဵုရးဍုၚ်မန် ညးမလုပ်ပြိုၚ်လဝ် ကၠတ်ထဝ်ကောန်ဂကူ ဆန္ဒမာဲလၟိဟ် (၅) အမာတ်ဗော် NLD ဥူကိုဝ်ကိုဝ်ဥူဂှ် အပ္ဍဲကာလပေါဲရုဲမာဲ သုၚ်စောဲလဝ်သြဇာမ္ဂးဂှ်တုဲ နူကဵုညးစၞးမၚ်ရုၚ်မာဲ ဗော် USDP (ပြည်ထောၚ်စုကြံ႕ခိုၚ်ရေးနှၚ့် ဖွံ႕ဖြိုးရေးပါတီ) တံ ဂိတုနဝ်ဝေမ်ဗာ (၁၈) ဂှ် နကဵုဥပဒေပေါဲရုဲမာဲ ၝောံပိုဒ် (၅၇) ဂှ် စောဲလဝ်ဂဗုတ် ပ္ဍဲကဵုရုၚ်ဗၠာဲသၟိၚ်မုဟ်ပန် (မုပွန်) ဂှ်လေဝ် ဂွံတီကေတ်ရ။