မိလတိုပ်ဗု၊ ဂိတုဂျာန္နဝါရဳ ၁၂၊ ၂၀၂၀
ပ္ဍဲအသေအဟာန် တ္ၚဲအ္စာကဝိမန် မရနုက်ကဵု (၅) ဝါ (မာ် ၃ မံက်) ဏံမ္ဂး နူကဵု ဂကောံအ္စာကၞေဟ်မန်တံ နကဵုတၚ် ရန်တၟံ ပရေၚ်သ္ပသမ္တီ အ္စာကၞေဟ်ဂမၠိုၚ်တုဲ ဆက်ဇိုန်ကဵု လာပ်လိက်ပတ်အ္စာကၞေဟ်မန် (၂၀၂၀) ကု အ္စာကၞေဟ်တံပၠန်ရောၚ် ဂွံတီကေတ်ရ။
ပ္ဍဲကဵုအစဳဇန် ဇိုန်ကဵု ‘လာပ်လိက်ပတ်အ္စာကၞေဟ်မန် ၂၀၂၀’ ဂှ် အ္စာကၞေဟ်ချူလိက်ဝတ္ထုဂှ် ဟိုတ်နူ အကာဲအရာယဲကီု၊ လိက်ဝတ္ထုတိတ်အောန်ဂှ်ကီုတုဲ ကဏ္ဍဝတ္ထုဂှ် ပဲါစွံလဝ်ကၠာတုဲ အ္စာကၞေဟ် ချူလိက်ပရေၚ်ကဵု ချူဇန်ကဗျ တိတ်လဝ်ပ္ဍဲ သၞာံ (၂၀၂၀) အိုတ်သီု ရုဲစှ်တုဲ ဇိုန်ကဵုလာပ်ရ။
“လာပ်လိက်ပတ်မန်ဂှ် အဓိက တၚ်ရန်တၟံ ဂကောံအ္စာကၞေဟ်တံ မိက်ဂွံသ္ပသမ္တီ ပတိုန်ဂုန်စရာဲကဵု အ္စာကၞေဟ်ချူ ကှေ်ဒၟံၚ် လိက်ပတ်မန် ကဏ္ဍနာနာအိုတ်သီုတုဲ စဳဇန်ဇိုန်ကဵုလာပ်လိက်ပတ်ဂှ်ရ၊ ပရေၚ်သ္ပသမ္တီဏံဂှ် ကိစ္စဇၞော်မံၚ်ကီု ရောၚ် အ္စာကၞေဟ်တံ စှေ်စိုတ်ရ၊ ဟိုတ်ဂှ်ရ တၚ်ခက်ခုဲကဵုအကြာယဲဏံ ၜိုတ်သ္ပမာန် ဂကောံအ္စာကၞေဟ်တံ ဂစာန်တုဲ ရုဲစှ်အ္စာကၞေဟ်ထေက်ကြိုက် ဒးဂွံထေက်ဂှ် ဆက်ဇိုန်ကဵုအာ ‘လာပ်လိက်ပတ်အ္စာကၞေဟ်မန် ၂၀၂၀’ ဂှ်ဏောၚ်” ညးအုပ်ကာ ဂကောံအ္စာကၞေဟ်မန် ဝဏ္ဏမာန် ဟီုရ။
လိက်ကၞပ်-လိက်အုပ်၊ လိက်မဂ္ဂဇြေန်၊ လိက်ဂျာနေဝ် တက်တြးပတိတ်လဝ် ပ္ဍဲဗွိုၚ်သၞာံ (၂၀၂၀) တုဲကၠုၚ်ဂှ် ဂကောံ အ္စာကၞေဟ်မန်တံ ပကောံပကေဝ်တုဲ လတူတၚ်နၚ်လက္ချန်ပတိတ်လဝ်ဂှ် စၟဳစၟတ်သ္ၚဳဂၠိပ်တုဲ အ္စာကၞေဟ်ဂွံစၟတ်ဂၠိုၚ် အိုတ်ဂှ် ရုဲစှ် ဇိုန်ကဵု ‘လာပ်လိက်ပတ်အ္စာကၞေဟ်မန် ၂၀၂၀’ ရ။
အသေအဟာန် တ္ၚဲအ္စာကဝိမန် မရနုက်ကဵု (၅) ဝါ သၞာံဏံဂှ် ဟိုတ်နူအကာဲအရာ ပရေၚ်ယဲကပ်တုဲ ဂကောံအ္စာ ကၞေဟ်မန်တံ ကၠောန်အာ လတူဍုၚ်ရေဝ် နကဵုဗွိုၚ်ဍန်ဍန်ရ။
ပ္ဍဲအစဳဇန် တ္ၚဲအ္စာကဝိမန်ဂှ် ပေဲါပြိုၚ်ချူလိက်ဇၟန် မပတံကဵု လိက်ပရေၚ်၊ လိက်ကဗျတံလေဝ် ကၠောန်အာပေဲါပြိုၚ်တုဲ အ္စာကၞေဟ်ဂွံဒုၚ်ရုဲစှ်တၟေၚ်တံဂှ် နူကဵုဂကောံအ္စာကၞေဟ်တံ ဇိုန်ကဵုလာပ်ဗွဲလၟေၚ်လၟေၚ်နွံရ။
တ္ၚဲအ္စာကဝိမန်ဂှ် သ္ပအစာံကဵု ကျာ်ဇၞော်အစွောံ (ဥတ္တရမ္ဘ) စချူခၞံပြကိုဟ်လောကသိဒ္ဓိ ပ္ဍဲသက္ကရာဇ်ဍုၚ် (၁၁၀၂) ဂှ် တုဲ ကျာ်ဇၞော်အ္စာပါလိတ (ဘာဓာတ်ကျာ်၊ ဍုၚ်ကၟာဝက်)၊ ကျာ်ဇၞော်အ္စာသိၚ်္ဃ (ဘာက္ၜၚ်ထဝ်၊ ဍုၚ်မတ်မလီု)၊ ကျာ်ဇၞော်ပုပ္ဖ (ဘာမဟာဝေဠုဝန်၊ ဍုၚ်မတ်မလီု) ပ္ဍဲသက္ကရာဇ်ဍုၚ် (၁၃၄၇) ဂှ် ကၠောန်ကၠုၚ်လဝ် တ္ၚဲအ္စာကဝိမန် ပ္ဍဲဇြပ်မန် ဍုၚ်မတ်မလီု ပွိုၚ်ပိသၞာံဆက်ဆက်ရ။
တုဲဂှ် စိုပ်သက္ကရာဇ်ဍုၚ် (၁၃၇၄) ဂှ် နကဵုဂကောံအ္စာကၞေဟ် ဒေသရေဝ်သၟဝ်ကျာကဵု ဂကောံလိက်ပတ်မန်ပွိုၚ် တိုက်ဍုၚ်ပါ်လၟိုၚ်တံ ပံၚ်ကောံတုဲ ကၠောန်ဂွံအသေအဟာန် တ္ၚဲအ္စာကဝိမန် ပွိုၚ် (၃) သၞာံကီုတုဲ တ္ၚဲအ္စာကဝိမန်ဂှ် အဆက်ပိုတ်အာ မွဲချိုန်ခဏရ။
စိုပ်သၞာံ သက္ကရာဇ်ဍုၚ် (၁၃၇၈) သၞာံ၊ ခရေတ် (၂၀၁၆) ဂှ် ဂကောံအ္စာကၞေဟ်မန်တံ စကၠောန်ကၠုၚ် တ္ၚဲအ္စာကဝိမန် မရနုက်ကဵု (၁-၂-၃) ဝါဂှ် ပ္ဍဲဘာဓါတ်ကျာ် ဍုၚ်ကၟာဝက် လၟေၚ်အဆက်ဆက်တုဲ စိုပ်သၞာံ (၂၀၁၉) တ္ၚဲအ္စာကဝိမန် မရနုက်ကဵု (၄) ဝါဂှ် ကၠောန်ကၠုၚ်လဝ် ပ္ဍဲကဵုဖလာတ်ကျာ်ကေလာသ ဍုၚ်လၟိုၚ်ရ။
