ပ္ဍဲဂိတု မေ စၟတ်တ္ၚဲ ၁၃ ပ္ဍဲကဵု ဌာန်ပရိုၚ် (တွေးပြီးမှယုံ) သ္ပလဝ်ဒတန် ပရိုၚ်ပ္တောံမွဲပိုဒ်ဂှ် နူကဵုယၟုအကံက် Nan Mo Zin Phu မချူပ္တိုန်လဝ် ပ္ဍဲကဵု CRPH Udates & Uprising New Dawei Fackbook Page ဂှ်တုဲ မၞိဟ်တြးပတိတ်လဝ်ဂှ် နွံ (၁၆၈၄) တၠရောၚ် ဂွံတီကေတ်ရ။ ပဲါနူဂှ်မ္ဂး အကံက်လ္ၚဵုတအ်လေဝ် ကလေၚ်ဆာဲစၠောံကေတ်တုဲ ထပ်တြးပ္တိတ်လဝ်နွံရောၚ် ဂွံတီရ။

နူကဵုပရိုၚ်ပ္တောံ အကံက် Nan Mo Zin Phu ပ္တိုန်လဝ်ဂှ်မ္ဂး “ပ္ဍဲကဵုဍုၚ် (မၚ်းတပ်)ဂှ် ဒှ်တိဍာဗၠးၜးကၠာအိုတ်ရ နူကဵုဒစဵုဒစး နာနာ၊ တိုက်သၠဲပိုန်ဒြပ်ကၟိန်ဍုၚ် ကဵု တံဒပ် ၂၇၄ တအ်ဂှ်လေဝ် သီဂွံလဝ်ရောၚ်” ဂှ် ချူပ္တိုန်လဝ် ပရိုၚ်ဟွံဍာံဂှ် ဂွံဆဵုကေတ်ရ။

နူကဵုကောန်ဍုၚ် (မၚ်းတပ်) မွဲတၠ ဟီုလဝ်ဂှ် ပရိုၚ်ဏံဂှ် ဒှ်ပရိုၚ်ဟွံဍာံမွဲပိုဒ်ရောၚ်ဂှ် နူကဵုဌာန်ပရိုၚ် (တွေးပြီးမှယုံ) သ္ပဒတန်လဝ်ရ။ နူကဵုဌာန်ပရိုၚ် Mizzima တအ်လေဝ် ပရိုၚ်ဏံဂှ် ဒှ်ပရိုၚ်ပ္တောံမွဲရောၚ် သ္ပဒတန်လဝ် နွံဒၟံၚ်ကီုရ။

ဆေၚ်စပ်ကဵုပရိုၚ်ပ္တောံဏံတုဲ နူကဵုဌာန်ပရိုၚ်ဗၠးၜး မဗ္တံကဵု Ayeyarwaddy Times တအ် ဓမံက်ထ္ၜးလဝ်ဂှ်မ္ဂး “ ဆေၚ်ကဵုကိစ္စပရူပရာ ဍုၚ်(မၚ်းတပ်)ဂှ် ကံၚ်သဳပၞာန်တအ် ထပ်ဗပေၚ်လဝ် ဇြဟတ်တုဲ က္ၜၚ်ကျာပၞာန်တအ်တဝ် ပဝ်ဂေတ်ဒၟံၚ်တအ်ဂှ် ဆက်စၠောံလဝ် ညးကောန်ဍုၚ် (မၚ်းတပ်) ဂှ်ကီု၊ နူကဵုဌာန်ပရိုၚ် Khit Thit Media ဂှ်လေဝ် ပရေၚ်ပၞာန်သ္ကာတ်မြဟ်ဒၟံၚ်ရောၚ် ချူပ္တိုန်လဝ် နွံဒၟံၚ်ရ။

ဟိုတ်နူကဵု အကံက်လ္ၚဵုတအ် ချူပ္တိုန်ဒၟံၚ်ပရိုၚ်ပ္တောံနွံဒၟံၚ်တုဲ ပကတိပရိုၚ်ဍာံဍာံတအ် ဂွံစိုပ်ပရိသာတ်တအ်မာန်ဂှ် လဇုဲလဇဒၟံၚ်ကီုရ။

ပရိသာတ်ကောန်ဂကူမန်ပိုယ်တအ်လေဝ် အဃောကာလ ပရေၚ်ဍုၚ်ကွာန်ဟွံညိၚ်ဝတ်ဒၟံၚ်ဂှ် ပရိုၚ်ဒှ်သၠေဟ်ပၟာကီု၊ ပရိုၚ်ပ္တောံကီုတအ်ဂှ် စိုပ်ကတောဝ်ပရိသာတ်ပိုယ်တအ် လောဲသွာမံၚ်ဂှ်ရ ပရိုၚ်ဟွံဍာံကီု ပရိုၚ်ပ္တောံကီု် မပြးဒၟံၚ် လ္တူ facebook ဂမၠိုၚ်တအ်ဂှ် လ္ပပတှ်ေစှ်ေစိုတ်ပြဟ်ဏီညိဂှ်လေဝ် မိက်ဂွံဗတိုက်ဖအောဝ်ကဵုဏာရ။

Reference>>တွေးပြီးမှယုံ-Think Before You Trust