Categories
ပရိုၚ်

ဗီုလၟေၚ်သၞာံဟေၚ် အပ်ကွးဘာတၟိမ္ဂး တၞးလိက်ပြံၚ်ဘာနွံမှ ဒုၚ်တဲကွးဘာရောၚ်

မာံသုခ၊ ဂျောန် ၈၊ ၂၀၂၁

စနူစၟတ်တ္ၚဲ (5.6.2021) ဂှ် နူဘာတန်သၠုၚ်ကောန်ဂကူမန် (ဝၚ်သ္ပဝ်) စဒုၚ်မံၚ်တဲကွးဘာ သၞာံဗ္တောန်ပညာ (၂၀၂၁/၂၀၂၂) ယျရောၚ် ဂွံတီကေတ်ရ။
ပ္ဍဲကဵုအပ်ဘာဂှ်မ္ဂး ကွးဘာတၟိ ကၠုၚ်စွံဘာ ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) တအ်ဂှ် ဗီုလၟေၚ်သၞာံဟေၚ် ကွးဘာနူဘာတၞဟ် ဘာကောန်ဂကူမန်ကီု ဘာအလဵုအသဳကီု တၞးလိက်ပြံၚ်ဘာနွံမှ သွက်ဂွံဒုၚ်အာတဲကွးဘာနွံရ။
“ကွးဘာပြံၚ်လုပ်ကၠုၚ်တှေ် ဘာလဵုမွဲဟွံဟီု နူဘာကောန်ဂကူလေဝ်ကီု နူဘာအလဵုအသဳလေဝ်ကီု ကွးဘာပြံၚ်ဘာလုပ်တၟိတှေ် အဓိကအိုတ်မွဲဂှ် တၞးလိက်ပြံၚ်ဘာရ၊ လိက်ပြံၚ်ဘာဍေံပါမှ ပိုဲပၠောပ်စရၚ် ပ္ဍဲဘာဏံဂွံ၊ နကဵုလိက်ထံက်ဂလာန်တှေ် ဍေံဟွံခိုၚ်ကၠိုက်ပုဟ်လေဝ်၊ အဓိကဂှ် တၞးလိက်ပြံၚ်ဘာရ” သာ်ဏံ ဂအုပ်ဘာတန်သၠုၚ် (ဝၚ်သ္ပဝ်) နာဲဆာန်လောန် ဟီုရ။
ပ္ဍဲအဃောကာလ ပရေၚ်ဍုၚ်ကွာန်ဟွံညိၚ်ဝတ်ဏံ ဘာကောန်ဂကူမန်ဗွဲမဂၠိုၚ် ၜိုဟ်ဟ်ဩိုဟ်ဩိုဟ် ပံက်ဗ္တောန်ကၠုၚ်နွံကီုလေဝ် ဘာတန်အလဵုအသဳတအ်ဂှ် ဟိုတ်နူအ္စာ၊ အ္စာၝောံတအ် ကၠောန်သ္ပမံၚ် CDM နွံကီု ပရေၚ်ဖံက်မခတိုဟ် ဒှ်ကၠုၚ်မံၚ် ပ္ဍဲဘာနွံကၠုၚ်မံၚ်ဂှ်ကီုတုဲ ဘာလ္ၚဵုပံက်၊ ဘာလ္ၚဵု ဟွံဂွံပံက်ဏီလေဝ်နွံတုဲ ကွးဘာမမံၚ်ကၠုၚ်လဝ် ပ္ဍဲဘာတန်အလဵုအသဳဟွံဂွံပံက်ဏီတအ်ဂှ် အစဳဇန်သွက်ဂွံပြံၚ်အာ ဘာကောန်ဂကူန်မန်နွံတုဲ ဖေက်အာတ်တၞးလိက်နူအ္စာတအ် ဟွံဂွံလေဝ် ညးတအ်ဒှ်မံၚ်ဓဝိၚ်နွံရ။
“အဲဂှ် ဒးသ္ပတၚ်အဓိကကဵုဇှ်လေဝ်၊ ညအ် အဲဂှ် တော်မံၚ်ဖိုဟ်ရ ဆဵုကဵု (ကျောၚ်းကော်မတီ) ကွာန်ပိုဲတုဲ တက်ကျာကဵုညး ချိုတ်ချိုတ်ပၠိုတ်တ်တုဲ ကောန်ၚာ်ဂွံမံၚ်ဘာဂှ်တှေ် ညံၚ်ဍေံဟွံဂွံယုတ်ဒေက်အာမွဲသၞာံတှေ် ယဝ်ရအာစွံအတေံတှေ် စပ်ကဵုလိက်ပြံၚ်ဘာတှေ် မုညးဟီုဂးဟလဵု ယဝ်ရအ္စာတအ် ညးဟွံကဵုတှေ် ဍေံဒှ်ခက်ခုဲညိ” သာ်ဏံ မိမကွးဘာ နူဘာတန်အလဵုအသဳ ဒေသလှာဒကှ်မွဲတၠ နာဲမန်ဗၠာဲ ဟီုရ။
ဘာကောန်ဂကူမန် ပ္ဍဲဒေသလှာဒကှ်တအ် ဇၟာပ်ဘာ စဒုၚ်မံၚ်တဲကွးဘာ ပ္ဍဲသၞာံပံက်ဘာတၟိဏံနွံတုဲ ဘာတန်သၠုၚ်ကောန်ဂကူမန် (ဝၚ်သ္ပဝ်) ဂှ် ပ္ဍဲစၟတ်တ္ၚဲ (11.6.2021) ဏံ စပံက်အာဘာတုဲ ပ္ဍဲသၞာံတၟိဏံ ကွးဘာတၟိ သွက်ဂွံထပ်ပဵုကၠုၚ် ၜိုတ် (၁၀၀) ပြၚ်ၚ် နွံမာန်မံၚ်ဂှ်လေဝ် အ္စာဘာတန်သၠုၚ် (ဝၚ်သ္ပဝ်) ချိၚ်တော်လဝ်နွံကီုရ။
ပ္ဍဲဒေသလှာဒကှ်ဝွံ ဘာကောန်ဂကူမန်နွံ (၁၇) ဘာတုဲ ဘာတန်အလဵုအသဳပံၚ်နှဴ (၁၈) ဘာနွံရ၊ ဘာတန်အလဵုအသဳဂှ် တိုန်မံၚ် (၁၊ ၂) ဘာနွံတုဲ ဘာလ္ၚဵု အပ်လဝ်ဘာတုဲ ဟွံပံက်ဏီလေဝ်နွံ၊ ဘာလ္ၚဵု ပဠေဝ်ပဠေတ်သအးဇ္ၚးလဝ် စမြိုၚ်ဘာတုဲ အဃောရံၚ်မံၚ် အကာဲအရာလေဝ်နွံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.