ဝဏ္ဏမာန်၊ ဂျူလာၚ် ၈၊ ၂၀၂၁
သွက်ဂွံကၠောန်အာ ကောံဓရီုဇၞော်ပရေၚ်ဂကူမန် နူဗော်ဍုၚ်မန်တၟိ ဖန်ဇန်ဒၟံၚ်ဂှ် ပညဳပညပ်ဟွံတုဲဒှ်ဏီရောၚ် ဂွံတီ ကေတ်ရ။
နူကဵုဂိတုဂျောန်တုဲကၠုၚ်တေံ ဗော်ဍုၚ်မန်တၟိဍိုက်ဍိုပ်တုဲ ဆဵုဗဂသဳကၠဳဒၟံၚ် ကုဗော်ပရေၚ်ဍုၚ်ကွာန်မန်ကဵု ခမဳသၚ်မန် ကေုာံ ဂကောံမဟာဇန်မန်တံနွံတုဲ ပညဳပညပ်ဒၟံၚ် သွက်ဂွံကၠောန်ကောံဓရီုဇၞော် ပရေၚ်ဂကူမန်နွံရ။
“ဂွံကၠောန်ကောံဓရီုဇၞော် ပရေၚ်ဂကူမန် ပ္ဍဲသၞာံ (၂၀၂၁) ဏံဂှ် နကဵုဗော်ဍုၚ်မန်တၟိပိုဲ ကေတ်တာလျိုၚ်တုဲတှေ် ဆဵုဂဗသဳကၠဳမံၚ်ကဵု ဗော်ပ္ဍဲဍုၚ်ကီု၊ ကျာ်ဇၞော်အ္စာတံကီု၊ သွာၚ်ဂကောံမဟာဇန်တံကီု အဃောပညဳပညပ်မံၚ်ဖိုဟ်ဏီ၊ ပညဳသဳကၠဳဟွံတုဲဒှ်ဏီ” သာ်ဝွံ ညးတာလျိုၚ်ဗော်ဍုၚ်မန်တၟိ (ဗွိုၚ်ပ္ဍဲဍုၚ်) မွဲတၠ ဟီုရ။
အကာဲအရာ ပရေၚ်ဍုၚ်ကွာန် ကာလကံၚ်ဇြဳပၞာန် ထိၚ်ဒဝ်လဝ်အဝဵုအုပ်ဓုပ်ဍုၚ်ဂှ် ပရေၚ်ဓဝ်ညဳသာ အလုံဂကူမန် သာ်လဵုဂွ ံဒက်ပတန်အာတုဲ ပရေၚ်ဂကောံပံၚ်ကောံဂကူမန် သာ်လဵုဂွံဒက်ပတန်အာဂှ် ဗော်ပရေၚ်ဍုၚ်ကွာန်မန်၊ ဂကောံမဟာဇန်မန် သဳကၠဳပညဳပညပ်ကၠုၚ်ဒၟံၚ် ညးသ္ကံနွံရ။
စပ်ကဵုပရေၚ်ဓဝ်ညဳသာဂကူမန်တုဲ သွက်ဂွံဒက်ပတန် ဂကောံပံၚ်ကောံဂကူမန်ဂှ် စတံနူကောံဓရီုဇၞော် ပရေၚ်ဂကူ မန် (၂၀၁၆) ကၠောန်လဝ်ပ္ဍဲကွာန်ကံပှ်လှ် (ပွိုၚ်ဍုၚ်လှာဒကှ်) တုဲဂှ် စဖျေံကၠုၚ်ဗီုရ။ ဆဂးဂှ် ဟိုတ်နူဒှ်ထုဲထံၚ် ပရေၚ်ပ ညဳပညပ်ဗော်တုဲ ဟွံဒှ်ဒက်ပတန်ကၠုၚ်ရ။
“ဂကောံပံၚ်ကောံပ္ဍဲဂကူမန်မွဲဂှ် ဒးနွံထေက်၊ မုပရောတှေ် ဒၞာဲဂွံချပ်သဳကၠဳ ပရေၚ်ဂကူမန်ဂှ် ဒၞာဲဏံရ ဂွံချပ်သဳကၠဳညး သ္ကံဏောၚ်၊ ဒက်ပၠန်လေဝ် ညးစၞးဂကူမန်ဗွိုၚ်စုၚ်လေၚ် ဒးပါလုပ်ထေက်” သာ်ဏံ ညးဒှ်သဘာပတိ အေမ်အေယူ တြေံ နာဲဗညာဂ္ဇံ ဟီုရ။
ဂကောံပံၚ်ကောံပရေၚ်ဂကူမန် အေမ်အေယူ ဒက်ပတန်လဝ် ပ္ဍဲသၞာံ (၂၀၀၈) ဂှ် စဒက်ပတန်ကၠုၚ် နကဵု ညးစၞးဂကူမန် (၄) ဗွိုၚ် မတွံဂး ဗွိုၚ်ဗော်ဍုၚ်မန်တၟိ၊ ဗွိုၚ်ပယျဵု ကေုာံ ဍုၚ်သေံ၊ ဗွိုၚ်ပ္ဍဲဍုၚ်၊ ဗွိုၚ်ဍုၚ်သၟာၚ်ရ။
ဗွဲကြဴဏံ ဗော်ပရေၚ်ဍုၚ်ကွာန်မန် ဗွိုၚ်ပ္ဍ္ဍဲဍုၚ်တံ ပံၚ်ကောံဒှ်မွဲဗော်တုဲ ဗီုပြၚ်ဒက်ပတန်လဝ် နကဵုညးစၞးဂကူမန် (၄) ဗွိုၚ်ဂှ် ဟွံစှေ်စိုတ်တုဲ ဗွိုၚ်ဗော်ဍုၚ်မန်တၟိ၊ ဗွိုၚ်ဗော်ပ္ဍဲဍုၚ် (ဗော်ညဳသၟဟ်မန်)၊ ဗွိုၚ်ဂကောံမဟာဇန် (၃) ဗွိုၚ်ဟေၚ် သဳကၠဳပညဳပညပ်လဝ်နွံရ။ ပ္ဍဲကဵုဗွိုၚ်မဟာဇန်ဂှ် တၞီပါလုပ် သီုဗွိုၚ်ဍုၚ်သၟာၚ်ရ။
ပ္ဍဲကဵုညးစၞး (၃) ဗွိုၚ်ဂှ် ဗွိုၚ်ဗော်ဍုၚ်မန်တၟိ (၅) တၠ၊ ညးစၞးဗော်ညဳသၟဟ်မန် (၅) တၠ၊ ညးစၞးဗွိုၚ်မဟာဇန် (၉) တၠ သဳကၠဳပညဳပညပ်လဝ် ဗွဲအပြောံနွံရ။
