Categories
ပရိုၚ်

ကွာန်ဓမ္မသ ဗီုကၠောန်ဗဒှ် လွဳလွတ်မံၚ် ပရေၚ်စဵုဒၞာယဲ

မာံသုခ၊ သေပ်တေမ်ဗာ ၉၊ ၂၀၂၁

ပ္ဍဲကာလယဲကပ် Covid 19 ဏံ ညးကၠောံစိုပ်ယဲ Covid 19 ကီု ညးယဲဓမ္မတာတအ်ကီု ကၠာဟွံကၠောံစိုပ်ယဲဏီ ဗီုလဵုဂွံမၚ်မွဲ စဵုဒၞာအာယဲတုဲ ဗွဲမပြေပြံၚ် ဂွံလွဳလွတ်အာယဲမာန် နူကဵုကမ္မတဳစဵုဒၞာယဲ Covid 19 ကွာန်ဓမ္မသ ဘိုၚ်ရေၚ်တၠုၚ်ကဵု နဇိုၚ်နတဲကီု ကဵုကၠုၚ်ပညာ နကဵုအန်လာၚ်ကီုနွံရ။
“ဗီုပြၚ်ကၠောန်ဂှ် ပိုဲပါ်လဝ် လ္တူလပှ်ကျာနွံ၊ ချဳဓရာၚ်နတဲ ပ္ဍဲကွာန်ဏံနွံ၊ ချဳဓရာၚ်ပ္ဍဲကွာန်ဂှ်တှေ် သွာၚ်စဵုဒၞာ သွာၚ်လွဳ သွာၚ်ပလံၚ်အံက်ဇြဳဂျေန် သွာၚ်ရေၚ်တၠုၚ် အသုဘကမ္မဌာန်၊ ပ္ဍဲကဵုလွဳယဲဂှ် ပိုဲပါ်လဝ် ၜါက္ဆံၚ် မၞိဟ်ယဲအာကၠုၚ်မာန်ဂှ်တှေ် ပိုဲလွဳမံၚ် ပ္ဍဲကဵုရုၚ်ဂဥုဲ ပိုဲပံက်လဝ်ယာယဳဂှ်၊ မၞိဟ်ယဲအာကၠုၚ်ဟွံမာန်ဂှ် ပိုဲဂကောံစဵုဒၞာတအ် ကော်အ္စာဂဥုဲတုဲ အာလွဳကဵုပ္ဍဲသ္ၚိနွံ” သာ်ဏံ ညးက္ဍိုက်ပ်ကမ္မတဳစဵုဒၞာမွဲတၠ ကွာန်ဓမ္မသ နာဲနန်အံၚ် ဟီုရ။
ကမ္မတဳစဵုဒၞာယဲ ကွာန်ဓမ္မသဝွံ ဂကောံနာနာ နူကွာန်ဓမ္မသ ကေုာံ ကောန်ကွာန်ဓမ္မသ စိုပ်ဌာန် သ္ၚောဲတအ် ပါလုပ်တုဲ သွက်ကောန်ကွာန်ညးတအ် ဂွံတီနဲကဲ ဂွံမံၚ်စံၚ်အခိၚ်ယဲကီု နဲဗီုလဵု ဂွံထိၚ်ဒဝ်အာယဲဏံကီုဂှ် နကဵုဂကောံကေၚ်ကာညးတအ် မွဲသတ္တဟၜါဝါ ကၠောန်သ္ပချပ်ဓရီုတုဲ နကဵုအန်လာၚ် Zoom လေဝ် ပါ်ပရအ်လညာတ် ကဵုမံၚ်ပညာ ကုကောန်ကွာန်ညးတအ်နွံရ။
ပရေၚ်ထိၚ်ဒဝ်ယဲ ကွာန်ဓမ္မသဝွံ ညးယဲဓမ္မတာဂှ် ညးတအ် ပါ်လဝ်ၜါကဆံၚ်နွံတုဲ ညးကၠောံစိုပ်ယဲ Covid 19 ဂှ်လေဝ် ညးတအ်ပါ်လဝ်ၜါကဆံၚ် အရံၚ်ဍာ်မိတ် ကေုာံ အရံၚ်ဍာဲ နွံကီုရ။
ညးယဲဓမ္မတာအာကၠုၚ်မာန်ဂှ် လွဳအာကဵု ပ္ဍဲရုၚ်ဂဥုဲယာယဳ ဒၞာဲညးတအ်ပံက်လဝ်ဂှ်တုဲ ညးယဲဂၠိုၚ် အာကၠုၚ်ဟွံမာန်တအ်ဂှ် ညးတအ်လွဳအာ ပ္ဍဲကဵုသ္ၚိရ၊ ကုညးကၠောံစိုပ်ယဲ Covid 19 တအ်ဂှ် စွံပ္ဍဲသ္ၚိ လွဳလွတ်အာတုဲ ပ္ဍဲမွဲသ္ၚိ ညးကၠောံစိုပ်ယဲတအ်ကဵု ညးဟွံကၠောံဏီတအ်ဂှ် ဗီုလဵုဒးမံၚ်ပ္ဍဲသ္ၚိ၊ ဗီုလဵုဒးမၚ်မွဲ ညံၚ်ဟွံဂွံကၠောံစိုပ်ညးသ္ကံဂှ်လေဝ် သောၚ်ကလးကဵုအာပညာနွံရ။
ပ္ဍဲကွာန်ဓမ္မသဝွံ ညးကၠောံစိုပ်ယဲ Covid 19 (၁၀) ပြၚ်နွံတုဲ ဟိုတ်နူယဲ Covid 19 မၞိဟ်ချိုတ်အာလဝ်ဟွံမွဲရ၊ လၟုဟ် ဟိုတ်နူညးကၠောံစိုပ်ယဲ Covid 19 အောန်ကၠုၚ် ညးကၠောံစိုပ်ယဲတအ်လေဝ် ဗၠးသက်သာကၠုၚ်ယျကီု ညးယဲဓမ္မတာတအ် အသိၚ်စှေ်အာကီုတုဲ ရုၚ်ဂဥုဲပံက်လဝ်ယာယဳ ပွိုၚ် (၂၄) နာဍဳဂှ် လၟုဟ် ယှအ်ဖျေံထောံအခိၚ် နူဂယး (၉) နာဍဳ စဵုစိုပ်တ္ၚဲစေၚ် (၁) နာဍဳရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.