ပ္ဍဲဒေသတိဍာ် ဗွိုၚ်ဗော်ဍုၚ်မန်တၟိ ညံၚ်ဂွံထပက်ဂဥုဲစဵုဒၞာ ယဲကိုဝ်ဝေဒ် (၁၉) သီုဖအိုတ်မာန်ဂှ် ဂစာန်ဒၟံၚ်နွံ

by | Sep 3, 2021 | ပရိုၚ် | 0 comments

ဝဏ္ဏမာန်၊ အဝ်ဂါတ် ၂၇၊ ၂၀၂၁

ပ္ဍဲတိဍာ်ဗော်ဍုၚ်မန်တၟိအုပ်ဓုပ်ဝွံ ဒေသပွဳပွူဗဟဵု၊ ဒေသပယျဵု၊ ခရိုၚ်သဓီု စတံနူပွိုၚ်ဍုၚ်ကအ်ကြိက်၊ ပွိုၚ်ဍုၚ်ဘာအၚ်၊ ပွိုၚ်ဍုၚ်ကျာ်မြဟ်၊ ခရိုၚ်မတ်မလီုဂှ် စတံနူပွိုၚ်လှာဒကှ်၊ ပွိုၚ်ဍုၚ်မုဟ်ဍုၚ်၊ ပွိုၚ်ဍာ်ဇြပ်ဗု၊ ခရိုၚ်ထဝဲါဂှ် ပွိုၚ်ဍုၚ်ရေဝ်သၠုၚ်ကျာ-သၟဝ်ကျာ၊ ပွိုၚ်ဍုၚ်ဍာ်ဗုရ။
ဒေသပွိုၚ်ဍုၚ်လ္ၚဵုဂှ် ဗီုကဵုခရိုၚ်သဓီု ပွိုၚ်ဍုၚ်ကအ်ကြိက်၊ ပွိုၚ်ဍုၚ်ဘာအၚ်၊ ပွိုၚ်ဍုၚ်ကျာ်မြဟ် ဗွဲမဂၠိုၚ်ဂှ် ဒှ်မံၚ်ဒေသနှဴရဴ (ဗော်ဍုၚ်မန်တၟိ-ကံၚ်ဇြဳပၞာန်) တုဲ ညးဍုၚ်ကွာန် နွံသၟဝ်တဲ ဒေသအုပ်ဓုပ်နှဴရဴတံ ဂွံအခေါၚ်ထပက်ဂဥုဲစဵုဒၞာ ဗၞတ် ထေက်ကြိုက်နွံရ။ သှေ်ဒေသသြဇာဗော်တဴ ပရေၚ်အုပ်ဓုပ်ကံၚ်ဇြဳပၞာန် က္ဍဟွံစိုပ်တအ် သၟဝ်ပရေၚ်အုပ်ဓုပ် ဗော်ဍုၚ် မန်တၟိပေၚ်ပေၚ်တအ်မ္ဂး ဟွံဂွံထပက်ဂဥုဲစဵုဒၞာဏီရ။
သာ်ဂှ်ကီု ခရိုၚ်မတ်မလီုမ္ဂး ဗီုကဵုပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗုမ္ဂး ဒှ်ဒၟံၚ်သၟဝ်တဲဒေသ ကံၚ်ဇြဳပၞာန် အုပ်ဓုပ်တုဲ ဗွဲမဂၠိုၚ် ဂွံအခေါၚ်ထပက်ဂဥုဲစဵုဒၞာနွံပေၚ်ပေၚ်ရ။ ဗီုကဵုပွိုၚ်ဍုၚ်လှာဒကှ်မ္ဂး သကုတ်ဒေသဗော်သြဇာတဴမ္ဂး ဟွံဂွံအခေါၚ်ထ ပက်ဂဥုဲစဵုဒၞာဏီရ။
ခရိုၚ်ထဝဲါမ္ဂး ဗီုကဵုပွိုၚ်ဍုၚ်ရေဝ်သၠုၚ်ကျာ၊ သၟဝ်ကျာ ဒေသဗွဲမဂၠိုၚ် ဒှ်ဒၟံၚ်ဒေသသၟဝ်တဲ အုပ်ဓုပ်ကံၚ်ဇြဳပၞာန်တုဲ ဗွဲမဂၠိုၚ် ဂွံအခေါၚ်ရ။ သှေ်ဒၟံၚ် ဒေသကၞောတ်ၜဳရေဝ် တိဍာ်သၟဝ်ပရေၚ်အုပ်ဓုပ် ဗော်ဍုၚ်မန်တၟိပေၚ်ပေၚ်တအ်ဂှ် ဟွံဂွံထပက်ဏီရ။
နူကဵုဗွိုၚ်ပ္ဍဲဍုၚ်ဂှ် ညးတာလျိုၚ်တံကီု၊ ကောန်ဗော်တံကီု၊ ရုၚ်ဆက်စပ်-ဂကောံဆက်စပ်ကဵု ဗော်ဍုၚ်မန်တၟိတံအိုတ်သီုဂှ် ဂွံအခေါၚ်ထပက်ဂဥုဲစဵုဒၞာ ယဲကိုဝ်ဝေဒ် (၁၉) နွံရ။
“ညးဍုၚ်ကွာန် မၞုံပ္ဍဲတိဍာ်ဗော်ဍုၚ်မန်တၟိ ညံၚ်ဂွံဂွံထပက်ဂဥုဲစဵုဒၞာ ယဲကိုဝ်ဝေဒ် (၁၉) နကဵုဗော်ဂှ် အာတ်မံၚ်အရီုအဗၚ် ဂၠာဲမံၚ်တၠဒါန်ဖိုဟ်ရ၊ ဗော်ဂၠာဲမံၚ်နဲဖိုဟ်ရ ညံၚ်ဂွံထပက်ဂဥုဲစဵုဒၞာ ယဲဏံမာန်” သာ်ဏံ ကမ္မတဳစဵုဒၞာယဲကိုဝ်ဝေဒ်(၁၉) (ကမ္မတဳဗဟဵု-ဗော်ဍုၚ်မန်တၟိ) နာဲတူရဌေ ဟီုရ။
နူစယဲကိုဝ်ဝေဒ် (၁၉) စကတဵုဒှ် အပ္ဍဲကၟိန်ဍုၚ်ဗၟာ ဆက်စပ်ပ္ဍဲဒေသရးမန်တုဲ နူကဵုဗော်ဍုၚ်မန်တၟိဂှ် ပံက်ကၠုၚ်ကမ္မတဳ စဵုဒၞာယဲကိုဝ်ဝေဒ် (၁၉) အဆံၚ်ဗဟဵု၊ အဆံၚ်ခရိုၚ်၊ အဆံၚ်ပွိုၚ်ဍုၚ် အဆံၚ်ဆံၚ်နွံတုဲ ရုၚ်ဂဥုဲလွဳလွတ်စဵုဒၞာယဲကီု၊ အ္စာဂဥုဲတံကီု ဂဥုဲဇဗ ကေုာံ ကပေါတ်စဵုဒၞာယဲကီုဂှ် နကဵုဗော်ဍုၚ်မန်တၟိ ရေၚ်တၠုၚ်နွံရ။
ပ္ဍဲကဵုယဲကိုဝ်ဝေဒ် (၁၉) ကတဵုဒှ် အသိၚ်အလိုန်လပှ်ပထမကဵု ဒုတိယတေံဂှ် ပ္ဍဲကဵုပွဳဗွိုၚ်တိဍာ်ဗော်ဍုၚ်မန်တၟိ မၞိဟ် ဒှ်ကၠောံထၞာန်ယဲ နွံအောန်ကွေံကွေံရ။ ပ္ဍဲကဵုကာလ အလိုန်လပှ်တတိယဏံဂှ် စတံနူခရိုၚ်သဓီု၊ ခရိုၚ်မတ်မလီု ဒှ် ကၠောံထၞာန်ယဲ နွံဂၠိုၚ်ကွေံကွေံရ။
“သွက်ဂွံလွဳလွတ် စပ်ကဵုယဲကိုဝ်ဝေဒ် (၁၉) ဇွိုန်လပှ်တတိယဏံ ပ္ဍဲတိဍာ်ဗော်ဍုၚ်မန်တၟိ ပံက်လဝ်ရုၚ်ဂဥုဲ နွံ (၅) ဒၞာဲ၊ ခရိုၚ်သဓီု စွံလဝ်ပ္ဍဲကွာန်ဝါရိုတ်မွဲဒၞာဲ၊ ခရိုၚ်မတ်မလီုတှေ် ပိုဲစွံလဝ် ပ္ဍဲကွာန်ဒဵုထောၚ်၊ ခရိုၚ်ထဝဲါဂှ်တှေ် စွံပ္ဍဲ ဝါဇြေန်၊ ပွိုၚ်ဍုၚ်ကျာ်ပိဂှ်တှေ် ပိုဲစွံလဝ် ပ္ဍဲကွာန်ဗလးဒုန်ဖါ်၊ ကၞောတ်ၜဳရေဝ်ဂှ်တှေ် ပိုဲစွံလဝ် ပ္ဍဲကွာန်ပၞၚ်ဗိုန်နွံ” ကမ္မတဳစဵုဒၞာယဲကိုဝ်ဝေဒ် (၁၉) ဗော်ဍုၚ်မန်တၟိ နာဲတူရဌေ ဟီုရ။
ပၞောဝ်ကဵုခရိုၚ် (၃) ခရိုၚ်ဂှ်မ္ဂး ခရိုၚ်မတ်မလီုဂှ် ဒှ်ကၠောံထၞာန်ယဲကိုဝ်ဝေဒ် (၁၉) လၟိဟ်ဂၠိုၚ်အိုတ်တုဲ ခရိုၚ်ထဝဲါဂှ် လၟိဟ်ကၠောံထၞာန်ယဲ အောန်မံၚ်ဏီရောၚ် သ္ဂးရ။
ပ္ဍဲကာလအကာဲအရာယဲကပ် ကိုဝ်ဝေဒ် (၁၉) အလိုန်လပှ်တတိယဏံဂှ် အပ္ဍဲဗွိုၚ်တိဍာ် ဂကောံရပ်လွဟ်ကောန်ဍုၚ်အရၚ်လ္ၚဵု ကောန်ညးဍုၚ်ကွာန်ဒေသညးတအ် ညံၚ်ဂွံထပက်ဂဥုဲစဵုဒၞာယဲမာန်ဖအိုတ်ဂှ် ညးတအ်ရုန်ဂစာန်ကၠုၚ် ဗီုညးကဵုညးနွံရ။
နကဵုဗော်ဍုၚ်မန်တၟိလေဝ် ညးဒေသညးဍုၚ်ကွာန်တံ ညံၚ်ဂွံထပက်ဂဥုဲစဵုဒၞာယဲကပ်ကိုဝ်ဝေဒ် (၁၉) မာန်ဂှ် ရေၚ်တၠုၚ်ဂစာန်ဒၟံၚ်ဖိုဟ်ရောၚ် ကမ္မတဳစဵုဒၞာယဲကိုဝ်ဝေဒ် (၁၉) ဗော်ဍုၚ်မန်တၟိ ဟီုထ္ၜး ဂွံတီကေတ်ရ။

Written by

Related Posts

ပ္ဍဲဂိတုဂျူလာင်ဏံသၟး ဗၠာဲသၟိင်သေံရပ်ဂွံလဝ် ကောန်ဍုင်ဗၟာ ကၠတ်လုပ်ဍုင် နွံဗ္ဒါဲ (၁၀၀) တၠ

ပ္ဍဲဂိတုဂျူလာင်ဏံသၟး ဗၠာဲသၟိင်သေံရပ်ဂွံလဝ် ကောန်ဍုင်ဗၟာ ကၠတ်လုပ်ဍုင် နွံဗ္ဒါဲ (၁၀၀) တၠ

ပ္ဍဲသၞာံ ၂၀၂၅ စနူကဵုဂိတုဂျူလာင်ဏံမံက်တုဲဂှ်ဝွံ ဗၠာဲသၟိင်သေံ၊ ဒပ်ပၞာန်မင်ဂီုကၠီုဒေသပယျဵုတအ် ရပ်စပ်ဂွံလဝ်ကောန်ဍုင်ဗၟာ ရဲညးကၠတ်လုပ်ဍုင်သေံတအ် နွံလၟိဟ် (၉၆) တၠယျရောင် ဂွံတီကေတ်ရ။

ညးအဝဲကၠောန်ကမၠောန်တအ် တိတ်ကၠောန်စဍုၚ်မ္ၚးဂၠိုၚ်တုဲ စိုပ်အခိၚ်ဗတမ်မ ဂၠာဲကောန်ကမၠောန်ဝါတ်

ညးအဝဲကၠောန်ကမၠောန်တအ် တိတ်ကၠောန်စဍုၚ်မ္ၚးဂၠိုၚ်တုဲ စိုပ်အခိၚ်ဗတမ်မ ဂၠာဲကောန်ကမၠောန်ဝါတ်

ညးဍုၚ်ကွာန်အဝဲကၠောန်ကမၠောန်တအ် တိတ်အာကၠောန်စဍုၚ်မ္ၚးဂၠိုၚ်တုဲ ဇၟာပ် စိုပ်အခိၚ်ဗတမ်မဏံ ဂၠာဲကောန်ကမၠောန်ဝါတ်မံၚ်ရောၚ် တၠဝါဗ္ၚတအ်ဟီုရ။

ပေါဲရုဲမာဲဒှ်မ္ဂး သ္ကိုပ်ဗိုလ်ပၞာန်တံ ညးဂှ်ပါလုပ် ပ္ဍဲပေါဲရုဲမာဲတုဲ ညးဂှ်ဆက်သှ်ေ ပ္ဍဲဒပ်ပၞာန်ရော?

ပေါဲရုဲမာဲဒှ်မ္ဂး သ္ကိုပ်ဗိုလ်ပၞာန်တံ ညးဂှ်ပါလုပ် ပ္ဍဲပေါဲရုဲမာဲတုဲ ညးဂှ်ဆက်သှ်ေ ပ္ဍဲဒပ်ပၞာန်ရော?

ခြာဟွံလအ် ပေါဲရုဲမာဲမေန်အံၚ်လှာၚ်တံဒှ်ကၠုၚ်မ္ဂး အကာဲအရာ သ္ကိုပ်ဗိုလ်ပၞာန်ဂမၠိုၚ် ဒှ်အာဗီုကဵု လောန်ကၠုၚ် ၁၅ သၞာံတေံပၠန်ရောၚ်။ ပေါဲရုဲမာဲ ၂၀၁၀ လောန်ကၠုၚ်တေံ ပ္ဍဲဒပ်ပၞာန်ဂှ် ညးဂှ်သှ်ေပ္ဍဲဒပ်တုဲ ညးဂှ်လုပ်ပေါဲရုဲမာဲဂှ် ဒှ်ကၠုၚ်ပဟေဠိမွဲရ။ လၟုဟ်လေဝ် က္ဍိုပ်သ္ကိုပ်ပၞာန် မေန်အံၚ်လှာၚ်ဂှ် ညးတာလျိုၚ်ပၞာန်ဇၞော်ဇၞော် ပ္ဍဲရုၚ်ပၞာန်တံ ညးဂှ် စိုတ်လုပ်စကဵုပေါဲရုဲမာဲကီုရောဂှ် ဗက်သၟာန်ကေတ်မံၚ်စရၚ်ရောၚ် နူကဵုတမ်ရိုဟ်ပရိုၚ် နေပျဳဒဝ်တံ သ္ဂးရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.