မာံသုခ၊ သေပ်တေမ်ဗာ ၈၊ ၂၀၂၁
ဒေသလှာဒကှ် ခရိုၚ်မတ်မလီု ဂွံအခေါၚ်ထပက်ဂဥုဲစဵုဒၞာယဲတုဲ ညးတာလျိုၚ်ခရိုၚ်မတ်မလီုတအ် ဗက်ကေတ်စရၚ် ညးထပက်ဂဥုဲဂှ် ဟိုတ်နူညးဍုၚ်ကွာန်တအ် ဒှ်မံၚ်သံသယ ထပက်ဂဥုဲတုဲ ဖေက်ဒှ်အန္တရာယ်ဂှ်ရ မၞိဟ်ကဵုစရၚ်ထပက်ဂဥုဲအောန်ကီုလေဝ် ပ္ဍဲကာလစိုပ်စၟတ်တ္ၚဲထပက်ဂဥုဲ 8.9.2021 ဒၞာဲရုၚ်ဂဥုဲပွိုၚ်တိုက်ဒဵုထောၚ်ဂှ် မၞိဟ်ကၠုၚ်ထပက်ဂၠိုၚ်တိုန်မွဲတဲဓဝ်တုဲ စဵုကဵုဂဥုဲဟွံရုံဂပ်ဒှ်အာရောၚ် ဂွံတီကေတ်ရ။
ညးဍုၚ်ကွာန်တအ် မၚ်ရံၚ်မံၚ်အကာဲအရာ ညးထပက်လဝ်ဂဥုဲတအ် ထပက်ဂဥုဲတုဲ မုဟွံဒှ် ညာတ်တုဲ ညးဟွံဂွံကဵုလဝ်စရၚ်တအ် ဂၠောဲကၠုၚ်ထပက်ညးသ္ကံဂှ်ရ ဂဥုဲဟွံရုံ ဒှ်အာရ။
ပိုဲတအ် ဒုၚ်သ္ဇိုၚ်ကဵုခရိုၚ်တုဲတှေ် ဂွံအခေါၚ်မၞိဟ်ထပက်ဂဥုဲ (၈၅၀) တၠဏး၊ နူကဵုသ္ဂံၚ်တအ် ညးတာလျိုၚ်တအ်သၟး လၟိဟ်ဟွံပေၚ်တုဲ ညးဘိုၚ်ရေၚ်တၠုၚ်မံၚ်တအ်ဂှ်ကီု အကြာကွာန်ကီု ပိုဲဘိက် ဂွံအခေါၚ်ထပက် ဆဝ်မ္ၚုဟ်အခိၚ်မာလအ်၊ လ္ၚဵုဂှ် ညးတအ်ဟွံပတှေ်ပုဟ် ဂဥုဲဏံ ကၠုၚ်နူဍုၚ်ကြုက်ဏောၚ်၊ ယဲခန္ဓနွံ ထပက်တှေ် စိပ်ဏောၚ် ချိုတ်ဏောၚ်၊ ဇှ်ရ ဂွံလဝ်ဂဥုဲ (၈၅၀) မ ညးကဵုလဝ်စရၚ်ဂှ် ဟွံပေၚ်ပုဟ်၊ ဆ္ဂး တ္ၚဲဏံ ညးတအ်မၚ်ရံၚ်မံၚ် မၞိဟ်ထပက်လဝ်တုဲ စဴသ္ၚိတှေ် ညာတ်ညးတအ် မုဟွံဒှ်တုဲ ညးတအ် ကၠုၚ်ထပက်ဂၠိုၚ်၊ ဇှ်ရ ဂဥုဲဂှ် သီုဟွံရုံ အိုတ်အာ သာ်ဏံ အ္စာဂဥုဲခရိုၚ်မတ်မလီု နာဲလျးဩန် ဟီုရ။
ပ္ဍဲဒေသလှာဒကှ် ညးဂွံအခေါၚ်ထပက်ဂဥုဲဏံဝွံ သ္ဂံၚ်ဗော်ဍုၚ်မန်တၟိ၊ ဂကောံအ္စာဂဥုဲ၊ အ္စာဘာ၊ ညးဘိုၚ်ရေၚ်တၠုၚ်စဵုဒၞာယဲကပ် ကေုာံ ညးဍုၚ်ကွာန်တအ်လေဝ် ပါလုပ်ကၠုၚ်နွံကီုရ။
ကုညးသှ်မေံၚ်ကၠုၚ်တုဲ ဟွံဂွံထပက်ဂဥုဲဒးစဴအာတအ်ဂှ် လက္ကရဴ ဂွံအခေါၚ်ထပက်မံၚ်ဏီဂှ်လေဝ် အ္စာဂဥုဲဂှ် ထပ်ဆဝ်မ္ၚုဟ်ဟီုလဝ်နွံတုဲ ညးဂွံအခေါၚ်ထပက်လဝ်ဂဥုဲတုဲတအ်ဂှ် အလန်ဒုတိယ ပ္ဍဲစၟတ်တ္ၚဲ (6.10.2021) တေံ သွက်ဂွံထပ်ထပက်အာနွံရ။
