သၞံၚ်တိုၚ်၊ မေ ၃၀၊ ၂၀၂၂

လၟေၚ်ကမၠောန်ဖျေံလဝ်တၚ်သ္ဂုတ်သွာတ် နူကောံဓရီုပရေၚ်ဂကူမန် (သၞာံ ၂၀၂၂) စပ်ကဵုဂကောံချူခၞံသ္ဇိုၚ်သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာကီု၊ ဂကောံပညဳပညပ်ဆက်စၠောံ သွက်ဂကောံပံၚ်ကောံဂကူမန်ဂှ်ကီု ရုဲစှ်ညးစၞးတုဲဒှ်အာရရောၚ် ဂွံတီကေတ်ရ။
“ဂကောံချူခၞံသ္ဇိုၚ်သၞောဝ်ကီု၊ ဂကောံပညဳပညပ်ဆက်စၠောံ သွက်ဗၟံက်ရုပ်ရဴ ဂကောံပံၚ်ကောံဂကူမန်ဂှ်ကီု ညးစၞးနူဗော်တံကီု၊ ညးစၞးနူဗွိုၚ်မဟာဇန်တံကီု ရုဲစှ်တုဲအာရရောၚ်၊ ဆဂး ဗော်မဆေၚ်စပ် ဂကောံမဆေၚ်စပ်တံ ညးဟွံဗၟံက်ပ္တိတ်စရၚ်ဏီတုဲ စရၚ်ပူဂဵုဂှ် ကောံဇဳတုဲမှ လဴကဵုပၠန်” သာ်ဏံ ညးဂွံအခေါၚ်ဟီုဂး ကောံဓရီုပရေၚ်ဂကူမန် (သၞာံ ၂၀၂၂) နာဲဝဏ္ဏမာန် ဟီုရ။
နူကဵုကောံဓရီုပရေၚ်ဂကူမန် (သၞာံ ၂၀၂၂) ဖျေံလဝ်ဂှ်မ္ဂး ဂကောံချူခၞံသ္ဇိုၚ်သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာ ကေုာံ သ္ဇိုၚ်သၞောဝ်ဥပဒေ ဒက်ပ္တန်ဍုၚ်မန်ဂှ် ညးစၞးသွာၚ်ခမဳသၚ် (၃) ဇကု၊ ညးစၞးဗော်ဍုၚ်မန်တၟိ (၃) တၠ၊ ညးစၞးဗော်ညဳသၟဟ်မန် (၃) တၠ၊ ညးစၞးဗွိုၚ်ဂကောံမဟာဇန် (၃) တၠ၊ ဗွိုၚ်ဂကောံဘိက်ထေက် / ပူဂဵုဘိက်ထေက် (၅) တၠ ပံၚ် (၁၇) တၠ။ သွာၚ်ကမၠောန် သွက်ဂွံဗၟံက်ရုပ်ရဴ “ဂကောံပံၚ်ကောံဂကူမန်” ဂကောံပညဳပညပ်ဆက်စၠောံဂှ် ဗော်ဍုၚ်မန်တၟိ (၃) တၠ၊ ဗော်ညဳသၟဟ်မန် (၃) တၠ၊ ဂကောံမဟာဇန် (၅) တၠ၊ သီုဖအိုတ် (၁၁) တၠရ။
ပ္ဍဲကဵုချူခၞံသ္ဇိုၚ်သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာ ကေုာံ သ္ဇိုၚ်သၞောဝ်ဥပဒေ ဒက်ပ္တန်ဍုၚ်မန်ဂှ် ပွိုၚ် (၆) ဂိတု ညံၚ်ဂွံချူအာစိုပ်ဒတုဲတုဲ ပ္ဍဲကဵုဂကောံပညဳပညပ်ဆက်စၠောံ သွက်ဂွံဗၟံက်ရုပ်ရဴ “ဂကောံပံၚ်ကောံဂကူမန်” ဂှ် လလအ် “ဂကောံပံၚ်ကောံဂကူမန်” ဂွံဒက်ပ္တန်ဂှ် ဂကောံပညဳပညပ်ဆက်စၠောံ ပိသွာၚ် (ဗော်ဍုၚ်မန်တၟိ၊ ဗော်ညဳသၟဟ်မန်၊ ဂကောံမဟာဇန်) ဏံ ဆေၚ်ကဵုပရေၚ်ဂကူမန်မ္ဂး ပညဳပညပ်ရေၚ်တၠုၚ်အာရောၚ် နူကဵုကောံဓရီုပရေၚ်ဂကူမန် (သၞာံ ၂၀၂၂) ဂှ် ဖျေံလဝ်ရ။
ကောံဓရီုပရေၚ်ဂကူမန် (သၞာံ ၂၀၂၂) ဝွံ ဗော်ဍုၚ်မန်တၟိသ္ပသ္ကိုပ်သ္ကတုဲ ဂိတုမေ (၂-၃-၄-၅) ဂှ် ကၠောန်ဗဒှ်လဝ် ပ္ဍဲဌာနပရေၚ်ပညာကောန်ဂကူမန် (ညဳသာ) တုဲ ညးစၞးဗွိုၚ်ဂကောံခမဳသၚ်၊ ညးစၞးဗော်ညဳသၟဟ်မန်၊ ညးစၞးဗွိုၚ်ဂ ကောံမဟာဇန်မန်နာနာ၊ ညးစၞးဂကောံဘိက်ထေက်ဂမၠိုၚ် ကေုာံ ပူဂဵုဘိက်ထေက်ဂမၠိုၚ် ပံၚ်ညးစၞး သီုညးလ္ၚတ် (၂၅၀) ဇကု-တၠပြၚ် တိုန်စိုပ်ရ။