ဂကောံဒက်မိတ်ကောန်ဂကူမန်(သဟာဲမန်) ဖျေံသ္ဇိုၚ် ဍုၚ်သေၚ်ကာပေါဝ်ဝွံ ရန်ကဵုဂွံဒှ်အထံက်အရီု သွက်ပရေၚ်ပညာမန် ဂွံဇၞော်မောဝ်အာ ပ္ဍဲအနာဂတ်ဂတတေံမာန်တုဲ ကဵုအာလာပ်ပညာ (scholarship) ကုကွးဘာကဝ်လိက်ကောန်ဂကူမန်တံနွံရောၚ်ဂှ် ဂွံတီကေတ်လဝ်ရ။

နကဵုဂကောံဒက်မိတ်ကောန်ဂကူမန်(သဟာဲမန်)ဂှ် ပံၚ်တောဲအာကဵု ညးတာလျိုၚ်ဘာကဝ်လိက် ကောန်ဂကူမန်တအ်တုဲ ထံက်ပၚ်အာစရိတ်ဘာသွက်မွဲသၞာံပေၚ်ပေၚ်(Full Scholarship) ကုကွးဘာ ၁၅ တၠ နူဘာသာလိက်ပတ်ကေုာံယေန်သၞာၚ်မန်နွံရောၚ် ဂွံတီကေတ်ရ။

ပၞောဝ်ကဵုကွးဘာမန်ဂမၠိုၚ် နူဘာသာလိက်ပတ်ကေုာံယေန်သၞာၚ်မန်ဂှ် ရုဲစှ်ကေတ်ကွးဘာ နူသၞာံဒုတိယ ၁၂တၠ၊ ကွးဘာသၞာံတတိယ ၃ တၠ အပံၚ် ၁၅ တၠတုဲ ကဵုအာလာပ်ထံက်ပၚ်ပညာ မွဲတၠမ္ဂး ၁၅ ကိုဋ်  အပံၚ် ၂၂၅ ကိုဋ်ရောင်ဂှ် ညးလျိုၚ်ဂကောံမွဲတၠ နာဲလောကမန်ဂှ် ဟီုရ။

“ပိုဲစှ်ေလဝ်စိုတ်ဂှ်တှ်ေ ဘာသာလိက်ပတ်ယေန်သၞာၚ်မန်ဂှ်တှ်ေ ဒှ်လမျီုသွက်ကဝ်လိက်ကောန်ဂကူမန်ဏောၚ်။ ဟိုတ်ဂှ်ရ ပိုဲကဵုထံက်ပၚ်ကဵုဘာသာလိက်ပတ်ယေန်သၞာၚ်မန်၊ သၟတ်တံလၟုဟ်ဏံဂှ် ဂွံဗ္တောန်လိက်မန်ဂှ်အောန်မံၚ်၊ အောန်မံၚ်ဂှ်တှ်ေ နကဵုလိက်ပတ်မန် ဂွံသၠုၚ်တိုန် ဂွံဇၞော်မောဝ်တိုန်၊ ကွးဘာတံလေဝ် ဂွံဂွံတိုန်ဇြဟတ်တုဲ ပိုဲထံက်ပၚ်ဏာရ” သာ်ဝွံ  နာဲလောကမန်ဂှ် ဟီုရ။

ပ္ဍဲဘာကဝ်လိက်ဝွံ ကွးဘာတိုန်ဒၟံၚ်တန်ဗ္တောန်လိက်ပတ်ယေန်သၞာၚ်မန် နူသၞာံဒုတိယ ၁၂ တၠ ကေုာံ သၞာံတတိယ ၁၇ တၠ တိုန်စိုပ်ကတ်ဗ္တောန်ဒၟံၚ်တုဲ အပ္ဍဲဂှ်မ္ဂး ကွးဘာသၞာံဒုတိယသီုဖအိုတ် ၁၂ တၠဂှ် ထံက်ပၚ်အာကဵုပေၚ်ပေၚ်တုဲ ၃ တၠဂှ်မ္ဂး ရံၚ်ကဵုအကာဲအရာကွးဘာတုဲ ရုဲစှ်ကေတ်ကွးဘာသၞာံတတိယတအ်ရောၚ် ဂွံတီကေတ်ရ။

ညးလျိုၚ်ဘာကဝ်လိက်မွဲတၠ “နူကဵုဂကောံညးတအ်ဂှ် ထံက်ပၚ်ကဵု ကွးဘာ၁၅တၠ၊ ရန်လဝ်ဂှ် ဂွံထံက်ပၚ်ကဵုကွးဘာသၞာံဒုတိယရ။ ဆ္ဂးတှ်ေ ကွးဘာသၞာံဒုတိယဂှ် နွံမံၚ် ၁၂ တၠရ။ ဟိုတ်ဂှ်ရသှ်ေမံၚ်ပိတၠဂှ် ရုဲစှ်အာ ကွးဘာသၞာံတတိယတအ်ရ။ ဗီုလဵုရုဲစှ်အာဟီုတှ်ေ ရံင်ကဵုပရေၚ်သ္ရိဌာန်၊ ဍာ်ဒကေဝ်(GPA)ကွးဘာတအ်တုဲ ရုဲအာရ” သာ်ဝွံ ဟီုရ။

နကဵုဂကောံဒက်မိတ်ကောန်ဂကူမန်ဝွံ အာဂတဏံမ္ဂးလေဝ် ဖျေံအာဗီုပြၚ်ပရေၚ်ကမၠောန်၊ ရံၚ်ကဵုအကာဲအရာပရေၚ်ဘဏ္ဍာတအ်တုဲ သွက်သ္ဂောံထံက်ပၚ်အာ ဘာကဝ်လိက်ကောန်ဂကူမန်ကီု ပရေၚ်ပညာကောန်ဂကူမန်တအ်ကီု နွံရောၚ် ဆ္ဂးလဝ်ရ။

ပ္ဍဲဘာကဝ်လိက်ကောန်ဂကူမန်ဝွံ ကွးဘာကဝ်လိက်ကောန်ဂကူမန်မွဲတၠမ္ဂး မွဲသၞာံ ခရိတ်ဘာအိုတ်ဒၟံၚ် ၁၅ ကိုဋ်တုဲ တုဲကၠုၚ်သၞာံဗတောန်လိက် ၂၀၂၃-၂၀၂၄ ဂှ် သွက်ကွးဘာမဝါတ်ကျာတ်တံဂှ် နူကဵုဌာနပညာကောန်ဂကူမန်တအ် နကဵုအစဳဇန် (MNEC scholarship) ထံက်ပၚ်ကဵုကၠုၚ်လဝ် ခရိတ်ဘာ ကုကွးဘာကဝ်လိက်တအ်နွံရောၚ် ဂွံတီကေတ်ရ။

နကဵုဂကောံဒက်မိတ်ကောန်ဂကူမန်(သဟာဲမန်) ဖျေံသ္ဇိုၚ်ဍုၚ်သေၚ်ကပေါဝ်ဝွံ ပွမကၠောန်ဗဒှ်ကၠောန်ဂကူမန်ကီု ပွမကၠောန်သ္ပသဘၚ်အတး ကေုာံ ကလအ်ညးအယုက်ဇၞော်တအ်ကီု ပွမကၠောန်ဗဒှ်ပေါဲဓရ်ကေုာံပေါဲဟီုတွံတအ်ကီု သီုကဵုပရေၚ်ထံၚ်ပၚ်ပညာကောန်ဂကူမန်တအ်ကီု ကၠောန်ကၠုၚ်ဒၟံၚ်နွံရောၚ် ဂွံတီကေတ်ရ။