ပ္ဍဲဍုင်ၜင်ကံက်၊ ကၟိန်ဍုင်သေံ တုဲကၠုင်ဂိတုမာတ်စၟတ်တ္ၚဲ (၂၈) တေံ၊ ဟိုတ်နူအသိင်ကသဳတိ (ချဳ) မထတ်သကာတ်ကၠုင်ဂှ်ရ ခဒမ်သ္ၚိတိုက်သိုင်ခၞံလဝ်တၟိ လၟိဟ်ထပ် (၃၀) ထပ်သရိုဟ်လာ်စှေ်တုဲ သၟာကမၠောန်ကောန်ဍုင်မန်ဗၟာပိုဲတံဗွဲမဂၠိုင် ကၠေံဒၟံင်အပ္ဍဲကဵုခဒမ်မသရိုဟ်ဂှ်ရောင် ဂွံတီကေတ်ရ။

တ္ၚဲဏံ ဂိတုစဲ (၄) မံက်၊ အပ္ဍဲကဵုခဒမ်သ္ၚိတိုက်သရိုဟ်လာ်စှေ်လဝ်ဂှ်ဝွံ နူကဵုဂကောံရီုဗင်ဟံင်ပြာ်မၞိဟ်တံ ထပ်ကလေင်ဆဵုလဝ်ဇွ (၅) တၠပၠန်ရောင် ပရိုင်သေံဂမၠိုင်လလောင်ပတိတ်လဝ်ရ။

ပ္ဍဲကဵုပွိုင် (၄) တ္ၚဲ နူကဵုဂကောံရီုဗင်ဟံင်ပြာ်မၞိဟ်တံ ဂၠိုက်ဂၠာဲဒၟံင်ဂှ်မ္ဂး ဂွံဆဵုကေတ်ဇွမၞိဟ် အပံင် (၁၃) တၠ ကဵု မၞိဟ်ဒးဘဲဝပ် (၉) တၠနွံကၠုင်တုဲ မၞိဟ်သှ်ၜေက်ကၠေံဒၟံင် လၟိဟ် (၇၄) တၠဂှ် ဆက်ဂၠိုက်ဂၠာဲဒၟံင်ရ။

နူတနေံဏံ ဂိတုမာတ်စၟတ်တ္ၚဲ (၃၁) ဂှ်ဝွံ ဟိုတ်နူအသိင်ကသဳတိချဳ ကၟိန်ဍုင်သေံဏံတုဲ ဂကောံဟံင်ပြာ်မၞိဟ် နူကဵုဍုင်အမေရိကာန်၊ ပၞာန်အေဿရေ၊ ကြုက်တအ် ဘိုင်ပါလုပ်ဂၠိုက်ဂၠာဲမံင်နွံရောင် ဂွံဆဵုကေတ်ပရိုင်ရ။

ပ္ဍဲဍုင်ၜင်ကံက် ခဒမ်သ္ၚိတိုက်သိုင်ခၞံလဝ်တၟိ လၟိဟ် (၃၀) ထပ်ဏံဂှ်ဝွံ သုင်စောဲစကာလဝ်ပသဲတၞင်ဂှ် ဒှ်ဍာ်ဒကေဝ်ဟွံဍိုက်ပေင်တုဲ ဟိုတ်နူပသဲတၞင်ဟွံခိုဟ်ဂှ်ရ သ္ဒးက္တဵုဒှ်အာဗီုတဏံရောင် နူကဵုညးတာလျိုင်အလဵုအသဳသေံတအ် ဂးရ။

နကဵုအလဵု သ္ကိုပ်ဝန်ဇၞော်သေံ ဖိုအ်ဓံင်ဌာန်ယှေန်နဝါတ် ဂှ်လေဝ် ကၠုင်စိုပ်ကျေဝ်ဗဵု ကဵုဇြဟတ်စိုတ် ကုသၟာကမၠောန်မသှေ်ဒၟံင်ဂှ်တုဲ ဂ္စာန်ဂၠိုက်ဂၠာဲကဵုရောင် သ္ဂးလဝ်ရ။

ပ္ဍဲကဵုသၞာံ ၂၀၂၅ ဏံဝွံ ဟိုတ်နူဘဲဒဏ်အန္တရာဲသဘာဝ အသိင်ကသဳတိချဳတုဲ ကၟိန်ဍုင်ဗၟာ ကဵု ဍုင်နွံကြပ်ဇိုင်ဝုတ်ဒိုဟ် ကၟိန်ဍုင်သေံဂှ် လၟိဟ်မၞိဟ်ကဵုကိုဋ် သ္ဒးဆဵုဂ္ဗကၠုင်ဒၟံင်အန္တရာဲဘဲဒဏ်သဘာဝနွံတုဲ မၞိဟ်ဒးဘဲဝပ်ချိုတ်ဂျိုင် ကဵု ပရေင်ဆောံလေင်နာနာတအ်နွံကၠုင်ဗွဲမဂၠိုင်ရောင် ဂွံတီကေတ်ရ။