နူကဵုတိုက်ဩန်ဗေန်တံ ဗၞတ်ဗ္ၜတ်ကၠုၚ် ပရေၚ်ပ္တိတ်ဩန်ပၠန်တုဲ ရဲကမၠောန်ပြၚ်ပလံၚ်ဩန် ကေပေ Kpay ဂမၠိုၚ် ဒှ်ခက်ခုဲကဵု ပရေၚ်ကမၠောန်နွံရောၚ် နူကဵုဆေၚ်ပြၚ်ပလံၚ်ဩန်ဂမၠိုၚ် ဟီုထ္ၜးဂှ် ဂွံတီကေတ်ရ။

နကဵုညးဍုၚ်ကွာန်အဆံၚ်သၟဝ်တံဂှ် စပ်ကဵုပရေၚ်ပြၚ်ပလံၚ်ဩန်ဏံ အဓိက ဒးပတှ်ေဒၟံၚ် ကေပေ Kpay ရတုဲ နူကဵုတိုက်ဩန်ဗေန်တံ ဗၞတ်ဗ္ၜတ်ကၠုၚ် ပ္တိတ်ဩန်လၟိဟ်ဂၠိုၚ်ဟွံဂွံဂှ်တုဲ သွက်ညးဍုၚ်ကွာန်တံ ဒှ်ခက်ခုဲကီု၊ သွက်ရဲကမၠောန်ပြၚ်ပလံၚ်ဩန်တံလေဝ် ဟွံပြေပြံၚ်ရောၚ် ဂးရ။

“အဓိကဂှ်တှ်ေ ညးဍုၚ်ကွာန်ကဆံၚ်သၟဝ်တံဂှ် ကောန်ညးတံတိုန်ဘာကီု၊ ပရေၚ်ဂိယဲဒိုက်ကီု၊ ဇၟာပ်ကေၚ်ကာဒှ် ဒးပြၚ်ပလံၚ်ဩန်တှ်ေ ပတှ်ေမံၚ် ဝေပ်ပေ Wave Pay ကေပေ Kpay ရဏောၚ်၊ လၟုဟ်တှ်ေ နူကဵုဗေန်ဂှ် ပ္တိတ်ဩန် လၟိဟ်ဂၠိုၚ်ဂၠိုၚ် ဟွံကဵုပၠန်ရ၊ ရံၚ်မၞိဟ်တုဲ ညးတံ(တိုက်ဩန်ဗေန်)တံ ချိၚ်တုဲပ္တိတ်ကဵုမံၚ်၊ မွဲတ္ၚဲတှ်ေ ဆဠ ပ္တိတ်ဂွံ ၃၀ ကိုဋ်၊ ဆဠမၞိဟ်ဂၠိုၚ်တှ်ေ ပ္တိတ်ဂွံ ၂၀ ကိုဋ်၊ ၜိုတ်ဂှ်ရတှ်ေ သွက်ရဲပြၚ်ဩန်တံလေဝ် ဒှ်ခက်ခုဲ သွက်ရဲကၠောန်ဗီုပိုဲတံလေဝ် ဒှ်ခက်ခုဲ” သာ်ဝွံ ဆေၚ်ကမၠောန်ပြၚ်ပလံၚ်ဩန် နူဍုၚ်ဇြပ်ဗု မိသဳတာ ဟီုထ္ၜးရ။

စပ်ကဵုပရေၚ်ပြၚ်ပလံၚ်ဩန်ဂှ် ဗွဲမဂၠိုၚ်ဂှ် ဝေပ်ပေ Wave pay ကေပေ Kpay ဂှ် မၞိဟ်သုၚ်စောဲပြၚ်ဩန်ပလံၚ်ဩန်ဂၠိုၚ်အိုတ်မွဲတုဲ ဆက်စပ်ကဵု ကေပေ Kpay ဂှ်တုဲ နူကဵု တိုက်ဩန်ဗေန် (ကမ္ဘောဇ) ဂှ် ဗၞတ်ဗ္ၜတ်ကၠုၚ် ပရေၚ်ပ္တိတ်ဩန်လၟိဟ်အောန်အောန်ရ။

“ပ္ဍဲဗေန်ဂှ် ဍေံရံၚ်မၞိဟ်ကၠုၚ်ပ္တိတ်ဩန်ဂၠိုၚ်အောန်တုဲတှ်ေ ဍေံချိၚ်ပ္တိတ်ကဵုမံၚ် ယဝ်ရ မၞိဟ်နွံအောန်တှေ် မွဲတၠ ဍေံပ္တိတ်ကဵု ၃၀ ကိုဋ်၊ ယဝ်မၞိဟ်ဂၠိုၚ်မံၚ်တှ်ေ ၜိုတ် ၂၀ ကိုဋ်ရ ဍေံပ္တိတ်ကဵု၊ မွဲတ္ၚဲမှ ပ္တိတ်ဂွံ ၂၀ ကိုဋ် ကဵု ၃၀ ကိုဋ်ရတှေ် သွက်ရဲကၠောန် ကေပေ Kpay တံ ဒှ်ခက်ခုဲရ၊ ရဲကမၠောန် ကေပေ Kpay တံ ဒှ်ခက်ခုဲတှေ် သွက်ရဲပြၚ်ပလံၚ်ဩန် ညးဍုၚ်ကွာန်တံလေဝ် ဒှ်ခက်ခုဲ” သာ်ဝွံ ညးစၞးကမၠောန်ပြၚ်ပလံၚ်ဩန် နူပွိုၚ်ဍုၚ် မိထဝ်ဆာန် ဟီုပၠန်ရ။

နူကဵုတိုက်ဩန်ဗေန်ဂမၠိုၚ်တံဂှ် လ္ပာ်ပၠုပ်ဩန်မ္ဂး ဂလိုၚ်လဵုပၠုပ်ပၠုၚ် ဒုၚ်တဲကီုလေဝ် လ္ပာ်ပ္တိတ်ဩန်ဂှ် ရံၚ်ချိၚ်ကဵုမၞိဟ်ပ္တိတ်ဂၠိုၚ်အောန်တုဲ ပ္တိတ်ကဵုဒၟံၚ်နကဵုဗၞတ်ဗ္ၜတ်ဂှ်ရ တၠကမၠောန်ဂမၠိုၚ်တံကီု၊ သၟာဗၞိက်သၠာဲဂတးတံညးဂမၠိုၚ်ကီု၊ စပ်ကဵုပရေၚ် မၞိဟ်နာနာသာ်ကီု ဒှ်ကၠုၚ်ခက်ခုဲရ။

ကၟိန်ဍုၚ်ဗၟာဝွံ ဇၟာပ်အသိၚ်အလိုန်ပရေၚ်ပိုန်ဒြပ် အလိုန်ဗၞိက်ဗွဝ်ဖျာ ဇီုကပိုက်မွဲမွဲသာ်က္တဵူဒှ်မ္ဂး နူကဵုတိုက်ဩန်ဗေန်ဂမၠိုၚ်တံဂှ် လ္ပာ်ပၠုပ်ဂှ် ပၟိက်စိုတ်ပၠုပ်ဂွံတုဲ လ္ပာ်ပ္တိတ်ဂှ် ပ္တိတ်ကၠုၚ်နကဵုဗၞတ်ဗ္ၜတ်လၟိုန်ကေၚ်နွံကၠုၚ်ဂှ် ဂွံတီကေတ်ရ။