ကြဴနူကံင်ဇြဳပၞာန်တအ် ပ္တိတ်လိက်လလောင်တြးဒေါံပန်ပှော် နဗ္ၜတ်အခိင်ကာလ အပ္ဍဲပွိုင် (၂၀) တ္ရဲဂှ် ပွဖံက်ပ္ကဝ်အခေါင်အရာမၞိဟ် ဟွံအောန်နူ (၁၀၇) အလန် က္လိလောန်ကၠုင်လဝ်နွံတုဲ လိက်လလောင်တြး ဒေါံပန်ပှော် ကံင်ဇြဳပၞာန်ဂှ် “ကွက်က္ဍိုပ်ဗ္ၜေံတုဲ သွံဖျုန်ကၠဵု” ရောင် ဗော်သွးကောန်ဂကူကရေင် KNU ဟီုဂးကၠုင်ရ။
ဟိုတ်နူအသိင်ဘဲဒဏ်ကသဳတိ က္တဵုဒှ်အာလဝ် ပ္ဍဲသ္ကုတ်အဒေါဝ်ဍုင်ဗၟာ ဒေသသကိုင်၊ အဝ ကေုာံ နေပျဳဒဝ် အပ္ဍဲဂိတုမာတ် စၟတ်တ္ရဲ ၂၈ ဂှ်တုဲ စနူဂိတုဨဗရဴ စၟတ်တ္ရဲ (၂) စဵုကဵုစိုပ် (၂၂) ဂှ် ဒေါံအာပန်ပှော်ရောင် လ္ပာ်ကံင်ဇြဳပၞာန်တအ် လလောင်တြးကၠုင်လဝ်ရ။
အပ္ဍဲကာလမလလောင်တြးလဝ် ပရေင်ဒေါံပန်ပှော်မွဲလ္ပာ် ပွိုင် (၂၀) တ္ရဲဂှ်ဝွံ နူကဵုကံင်ဇြဳပၞာန်တအ် စွံပွန်ကဵုညးဍုင်ကွာန်တုဲ ထောံဗမ်ကဵုက္ၜင်ကျာ ကေုာံ ပန်ကဵုလွဟ်ဇၞော်ဂမၠိုင်ကီု၊ စံင်ပလီု သ္ရိဌာန်ညးဍုင်ကွာန်တအ်ကီု၊ ပါမ်မခတိုဟ်တိုပ်တိ ကေုာံ ရပ်ထိင်ညးဍုင်ကွာန်အဓမ္မ စတမ်တအ် က္လိလောန်တဴ ပွဖံက်ပ္ကဝ်အခေါင်အရာမၞိဟ် ဟွံအောန်နူကဵု (၁၀၇) အလန်နွံရောင် ဗော် KNU ဟီုဂးလဝ် ပ္ဍဲတ္ရဲဏအ်ရ။
ဟိုတ်နူကံင်ဇြဳပၞာန်တအ် ဂြာတ်ဖျေံဗမ်ကဵုက္ၜင်ကျာ၊ ထောံဗမ်ကဵု စက်ဗရုသာဲ (ဒရုင်) ဗၞတ် (၆၃) ဝါဂှ်တုဲ ညးဍုင်ကွာန် (၁၄) တၠကဵု ထပိုယ် (၁) ဇကု ဒးအိုတ်ကၠုင်လဝ်လမျီုကီု၊ ခမဳ (၂) ဇကု၊ ထပိုယ်ဇၞော် (၁) ဇကု ကေုာံ ညးဍုင်ကွာန် (၃၄) တၠတအ် ဂွံအာဝပ်ကီု ဆဂှ်သၟးဟွံက ဘာလေံကျာ် (၅) ဘာကဵု သ္ရိဒၟံင်ညးဍုင်ကွာန် ဗၞတ် (၇) မ မ္ဒးလီုလာ်ကၠုင်လဝ်နွံရောင် ဂးရ။
ဆဂှ်သၟးဟွံက နူကဵုဒပ်ကံင်ဇြဳပၞာန်တအ် ပန်ပလံင်လဝ်လွဟ်ဇၞော် ဗၞတ် (၄၃) ဝါဂှ် ဒတုံစှ်ေ အကြာကွာန်ဂမၠိုင်တုဲ ညးဍုင်ကွာန်တအ် ချိုတ် (၅) တၠ၊ ဂွံဘဲဝပ် (၁၈) တၠ ကေုာံ သ္ရိဒၟံင်ရဲကွာန် ဗၞတ် (၁၆) မ ဒးလီုလာ်ကၠုင်လဝ်ရ။
တုဲပၠန် နူကဵုကရောင်ပၞာန်ဒပ်ကံင်ဇြဳပၞာန်တအ် စံင်ပလီုထောံ ဘာလေံကျာ် (၁) ဘာကဵု သ္ရိဌာန် ညးဍုင်ကွာန် (၄) မ ကေုာံ ရပ်ဏာညးဍုင်ကွာန် ဟၟဲကဵုဒုဟ်ဒဏ် (၂) တၠနွံတုဲ ဟိုတ်နူမါင်တိုပ်တိ ကံင်ဇြဳပၞာန်ဂှ် ညးဍုင်ကွာန် (၂) တၠ ဂွံအာလဝ်ဝပ်နွံရောင် ဗော် KNU ပ္ကောံပ္ကေဝ်လဝ်တင်နင်ဂှ် တ္ရဲဏအ် (ဨဗရဴ ၂၆) လလောင်ပ္တိတ်ကၠုင်ရ။
ဒှ်သာ်ဂှ်ရ ပွကံင်ဇြဳပၞာန်တအ် ကၠောန်သ္ပဒၟံင်နတဲ ပ္ဍဲတ္ရဲဏအ်ဂှ် တုပ်ညံင်ရဴ “ကွက်က္ဍိုပ်ဗ္ၜေံတုဲ သွံဖျုန်ကၠဵု” ရောင် ဗော်သွးကောန်ဂကူကရေင် KNU ဟီုဂးကၠုင်ရ။
လ္တူတင်နင် နူဗော် KNU တအ် မလလောင်လဝ် ပ္ဍဲတ္ရဲဏအ်ဂှ် ဒုင်လဝ်သ္ဇိုင်ကဵုပရောဒဒှ် နူစစၟတ်တ္ရဲ (၂) စဵုကဵုစိုပ် (၂၂) ဂိတုဨဗရဴဂှ်ဟေင်တုဲ စဵုကဵုတ္ရဲဏအ်လေဝ် ပ္ဍဲတိဍာ်အုပ်ဓုပ်ဗော် KNU တအ်ဂှ် နူကဵုဒပ်ကံင်ဇြဳပၞာန်တအ် ဆက်ပန်မံင်ကဵုက္ၜင်ကျာပၞာန်ဖိုဟ်ရောင် ဂွံတီကေတ်ရ။
