ပ္ဍဲကၟိန်ဍုင်သေံ ကွာန်ထံက်ခၞောန် ဗၠာဲသၟိင်သေံဍုင်ကမ္မရဳတအ် ထပ်ရပ်ဂွံ ကောန်ဍုင်ဗၟာရဲညးကၠတ်လုပ်ဍုင် လၟိဟ် (၃၃) တၠပၠန်ရောင် ဂွံဆဵုကေတ် ပရိုင်သေံတအ်ချူဓမံက်လဝ်ရ။

နူတနေံဏံ ဂိတုဇှ်ေ (၁) စွေက် အခိင်ဗ္တမ်ဂှ် ပ္ဍဲကွာန်ထံက်ခၞောန် ကောန်ဍုင်ဗၟာ လၟိဟ် (၃၃) တၠ သွက်ဂွံလုပ် အာကၠောန်စကမၠောန် ပ္ဍဲဍုင်မလေဝ်ယှာတေံရောင်ဂးတုဲ နူကဵုဃံက်ထပၠုပ်မၞိဟ်တအ် ကၠဟ်ထောံလဝ်ကွဳစက်မွဲဖ္ဍိုက် ကေုာံ ရဲညးကၠတ်လုပ်ဍုင်တအ်ဂှ်ရ ဗၠာဲသၟိင်သေံဍုင်ကမ္မရဳတအ် ဗက်အာစိုပ်ရပ်ဂွံလဝ်ရောင် ဂွံတီကေတ်ရ။

ကောန်ဍုင်ဗၟာရဲညးကၠတ်လုပ်ဍုင်မလေဝ်ယှာ (၃၃) တၠဏံဂှ်ဝွံ ဒးကဵုကၠုင်စရိတ်ဂၠံင် ကုဃံင်ထပၠုပ်မၞိဟ်တအ် ညးမွဲတၠမ္ဂးတှ်ေ သြန်သေံ အကြာ (၇၆,၀၀၀) ၝာတ် ကဵု (၇၅,၀၀၀) ၝာတ် ဒးကဵုကၠုင်မံင်နွံရောင် ဂွံတီကေတ်ရ။

ဒှ်သာ်ဂှ်ရ ကောန်ဍုင်ဗၟာတဏံဂှ် ဟိုတ်နူကၠတ်လုပ်ကၠုင် နကဵုဂၠံင်ဟွံလုပ်သၞောဝ်ဂှ်ရ နူကဵုဗၠာဲသၟိင်သေံဍုင်ကမ္မရဳတအ် စၟဳစၟတ်တၞးလိက်သက်သဳတုဲ သီုကဵုကၠောန်သ္ပပရေင်စၟဳစၟတ်ယဲရောင် ဂွံတီကေတ်ရ။

အပ္ဍဲကဵုဂိတုဂျောန်မံက် ပွိုင်မွဲသတ္တဟဏံဂှ်ဝွံ နူကဵုဗၠာဲသၟိင်သေံဍုင်ကမ္မရဳ၊ ဗၠာဲသၟိင်သေံ သၚ်္ခဠၜူရဳ (ကွာန်ဝၚ်္က) ကဵု ဒပ်ပၞာ်သေံ (တၞံပကုက်) မင်ဒေသပယျဵုတအ် ဟိုတ်မပတေၚ်လဝ် ပရေင်ဂီုကၠီုနွံဂှ်ရ စၟဳစၟတ်ရပ်လဝ်ကောန်ဍုင်မန်ဗၟာရဲညးကၠတ်လုပ်ဍုင်သေံတအ် လၟိဟ်ဗ္ဒါဲ(၁၀၀) တၠနွံကၠုင်ယျရောင် ဂွံတီကေတ်ရ။