ညးဍုၚ်ကွာန်အဝဲကၠောန်ကမၠောန်တအ် တိတ်အာကၠောန်စဍုၚ်မ္ၚးဂၠိုၚ်တုဲ ဇၟာပ် စိုပ်အခိၚ်ဗတမ်မဏံ ဂၠာဲကောန်ကမၠောန်ဝါတ်မံၚ်ရောၚ် တၠဝါဗ္ၚတအ်ဟီုရ။

ဟိုတ်နူဂၠာဲကောန်ကမၠောန်ဝါတ်ဂှ်ရ တၠဝါဗ္ၚတအ် သၠုၚ်ၚုဟ်တုဲ ဒးဗက်ဂၠာဲလိၚ်ဒၟံၚ် ကောန်ကမၠောန်ရောၚ် တၠဝါဗ္ၚ နူဍုၚ်ကၟာဝက်မွဲတၠ ဟီုရ။

“နူကဵုဍုၚ်ကွာန်ဒှ်ရုသံၚ်ဏံတုဲတှ်ေ ကောန်ကမၠောန်ဒေသမန်ဏံလေဝ် ကေတ်ဟွံလောဲ၊ ကောန်ကမၠောန်နူဌာန်သ္ၚောဲတေံလေဝ် ကေတ်ဟွံလောဲရပုဟ်၊ မၞိဟ်အကြာကွာန်ဇကု အဆက်မသကောဒေံဇကုရ ကဵုၚုဟ်ဂၠိုၚ်ဂၠိုၚ်ညိတုဲ ဗီုကဵုအာတ်ရီုဗၚ်ညးသ္ကအ် အဵုဗီုဂှ်” သာ်ဝွံ တၠဝါဗ္ၚ နာဲဒေံ ဟီုရ။

အခိၚ်ပရေၚ်ဍုၚ်ကွာန်ရုသံၚ်ဒၟံၚ်တ္ၚဲဏံဂှ် ၚုဟ်ဗၞိက်ဖျာစသုၚ်နာနာလေဝ် က္ဍၚ်တိုန်ဒၟံၚ်သေဲသေဲတုဲ စရိတ်ၚုဟ်ကမၠောန်တ္ၚဲနာနာဂှ်လေဝ် က္ဍၚ်ဗက်တိုန်ဒၟံၚ်ကီုရ။

ၚုဟ်ကမၠောန်တ္ၚဲသၞာံတုဲကၠုၚ်တေံ နွံအကြာ (၁၅၀၀၀) ဂှ် သၞာံဏံ ဒှ်အာ (၃၀၀၀၀) တုဲ ၚုဟ်လိၚ်ဗတမ်မဂှ်လေဝ် က္ဍၚ်ဒှ်အာ မွဲတ္ၚဲ (၃၀၀၀၀) ဒ္ကေဝ်ကီုရ။

“သၟာကမၠောန်ဒေသမန်ဏံဂှ် ပကတိဂှ် ဂၠာဲဝါတ်မံၚ်ရရ၊ ဒှ်အာပၞာန်သီအဝဵု ပရေၚ်ဍုၚ်ကွာန်ရုသံၚ် ညးဍုၚ်ကွာန်အယျဲ ကၠောန်ကမၠောန်မာန်တအ် ထပ်စိုပ်အာဍုၚ်သေံ ဍုၚ်မ္ၚးအိုတ်ပၠန်၊ လၟုဟ်တှ်ေ ဒးဂၠာဲကပှ်မံၚ်မၞိဟ် အကြာမသသ္ကအ်ရဲ ပ္ဍဲ ကွာန်တအ်ကဵု သၟာကမၠောန်ဆုဲပြံၚ် သှ်ေမံၚ်ပ္ဍဲကွာန်လ္ၚဵုတအ်ရနွံ၊ ဂၠာဲကောန်ကမၠောန် ဝါတ်တိုန်ဂှ်ညိ၊ ကမၠောန်ဝါဗ္ၚ ကၠောန်ဟွံကိတ်ဂှ်ညိ ထောံလဝ်ဝါလေဝ်နွံကၠးကၠး” သာ်ဝွံ တၠဝါဗ္ၚတၞဟ်မွဲတၠပၠန်ဂှ် ဟီုရ။

ပ္ဍဲဍုၚ်မန်ဝွံ နူတမ်ဝါဒိတေံရ တိတ်အာကၠောန်စဍုၚ်သေံ၊ ဍုၚ်သအာၚ်ဂၠိုၚ်ဒၟံၚ်ဂှ်တုဲ ဗွဲကြဴနူကဵု ပၞာန်သီအဝဵုကတဵုဒှ်တုဲကီု၊ ကြဴနူကဵုကံၚ်သဳပၞာန်တအ် ပ္တိတ်ကၠုၚ်သၞောဝ်ဥပဒေ ညးဍုၚ်ကွာန်ဒးယိုက်ဂၠေၚ်ပၞာန်(ဗၟာ)ကီုဂှ်တုဲ ညးဍုၚ်ကွာန်အဝဲ ကၠောန်ကမၠောန်တအ် သာတုဲ အာစိုပ်ဍုၚ်သေံ၊ ဍုၚ်သအာၚ်ဂၠိုၚ်တိုန်ကၠုၚ်ရ။