အစဳဇန် ရပ်သီကွဳစက်ယာန်ဂှ် ဆက်ရပ်မံၚ်ဖိုဟ်တုဲ ကွဳလိုန်ဓာတ်မၞုံကဵုလိုၚ်ဇြေန်တအ် ၚုဟ်က္ဍၚ်တိုန်အာ ဟွံသာရဂှ် ဂွံတီကေတ် နူညးသွံရာန်ကွဳလိုန်ဓာတ်တအ်ရ။
နူကဵုပၞာန်သီအဝဵု သၞာံ (၂၀၂၁) တုဲ မွဲအလန်လေဝ် ဟွံပံက်ကၠောန်ကဵု လိုၚ်ဇြေန် ကွဳလိုန်ဓာတ်ဏီတုဲ ကွဳလိုန်ဓာတ်လိုၚ်ဇြေန် နွံမံၚ်တုဲတုဲတအ်ဂှ် ၚုဟ်က္ဍၚ်တိုန်အာ ဟွံသာလးလးရ။
“နူကဵုဍေံရပ်ကွဳလိုန်ဓာတ် (ဝစ်တောက်) တုဲတှ်ေ ကွဳလိုန်ဓာတ်လိုၚ်ဇြေန်နွံတအ်ဂှ် ၚုဟ်က္ဍၚ်သၠုၚ်တိုန်အာ၊ လၟုဟ် ဍေံရပ်ဟွံဒေါံဏီဖိုဟ်တှ်ေ ကွဳလိုၚ်ဇြေန်တအ်ဂှ် ထပ်က္ဍၚ်တိုန်အာပၠန်၊ ကွဳဝေပ် wave လိုၚ်ဇြေန်လတ်ညိတှေ် (၁၀၀) ကိုဋ်ပြၚ်အာယျ” သာ်ဝွံ ညးသွံရာန်ကွဳလိုန်ဓာတ် နူမုဟ်ဍုၚ်မွဲတၠ ဟီုထ္ၜးရ။
အစဳဇန် ရပ်သီကွဳစက်၊ ကွဳလိုန်ဓာတ်ဂှ် ဆက်တုဲစၟဳစၟတ် ရပ်စပ်မံၚ်ဖိုဟ်ဂှ်ရ ကွဳလိုန်ဓာတ်မၞုံကဵုလိုၚ်ဇြေန် ကၠောန်လဝ်တုဲတုဲတအ်ဂှ် ဂွံၚုဟ်ခိုဟ်တုဲ ဗက်သွံရာန်မံၚ်ညးသ္ကအ်အိုတ်ရ။
နူကဵုအစဳဇန် ရပ်သီကွဳစက်၊ ကွဳလိုန်ဓာတ် ကတဵုဒှ်ကၠုၚ်တုဲ ကွဳလိုန်ဓာတ်လိုၚ်ဇြေန် နွံၚုဟ်အကြာ (၇၀) ကိုဋ်ဂှ် ထလာ်တိုန်အာ အကြာ (၁၀၀) ကိုဋ်ကဵု (၁၀၀) ကိုဋ်ပြၚ် ဒှ်မံၚ်ရ။
“ကွဳလိုန်ဓာတ် ဝေပ်အာၚ် wave I 125 – မဝ်ဒါ 2019 မွဲဖ္ဍိုက်ဂှ် ဒှ်အာ (၁၀၀) ကိုဋ်ပြၚ်အာယျ၊ မဝ်ဒါ သဝ်ညိ ကွဳပရေံညိတှ်ေ ၚုဟ်သၟဝ် (၁၀၀) ဂွံ၊ တော်ကဵုသၞာံတုဲကၠုၚ်တေံတှ်ေ ကွဳ မဝ်ဒါ အကြာ (၂၀၁၈ -၂၀၁၉) တှေ် ၚုဟ် က္ဍၚ်တိုန်အာ အကြာ (၃၀) ကိုဋ် ကဵု (၂၀) ကိုဋ်ပြၚ် ဒှ်မံၚ်” သာ်ဝွံ တၠဆေၚ်ပဠေဝ်ကွဳလိုန်ဓာတ်ကဵု သွံရာန် နူဍုၚ်ဇြပ်ဗုမွဲတၠဂှ် ထပ်ဟီုရ။
ကိုန်စဳဇန် ရပ်သီကွဳစက်ယာန်တုဲမ္ဂး တၠဆေၚ်သွံရာန်ကွဳလိုန်ဓာတ်တအ် စၟဳမံၚ် သွက်ဂွံ ပံက်ကၠောန်ကဵု လာၚ်ဇြေန်နွံရောၚ် ထေၚ်ခယျလဝ်နွံကီုလေဝ် ကိုန်အစဳဇန် ရပ်သီ ကွဳစက်ယာန်ဏံဂှ် ဒဵုကဵုကာလလဵု ဆက်ရပ်အာဂှ် ညးလဵုလေဝ် ဟီုဟွံဒးရ။
ဟိုတ်နူကိုန်စဳဇန် ရပ်သီကွဳစက်ယာန် လအ်ဂၠိၚ်သ္ၚောဲဂှ်တုဲ ကွဳလိုန်ဓာတ်မၞုံကဵုလာၚ် ဇြေန်တြေံတြေံတအ်ဂှ်ရ သွံရာန်ခိုဟ်မံၚ်တုဲ ၚုဟ်လေဝ် က္ဍၚ်သၠုၚ်တိုန်အာဟွံသာရောၚ် ဂွံတီကေတ်ရ။
