နူကဵုအခိင်လၟုဟ်ဏံ ၚုဟ်ထၜိုတ်ဂှ် နွံမံင်အတိုင်တြေံဖိုဟ်တုဲ အခိင်လိုက်ဝှ်တိကှ်တေံလေဝ် ၚုဟ်ထၜိုတ် သွက်ဂွံတိုန်ဂှ် အကာဲအရာနွံအောန်ရောင် တၠကမၠောန် သွံရာန်ထၜိုတ်လ္ၚဵုတအ် ဟီုရ။

“ၚုဟ်ထၜိုတ်ဂှ် ရံင်ကဵုၚုဟ်ပံက်မံင်လၟုဟ်ဏံတှ်ေ ၚုဟ်ပရေံကွေံကွေံမွဲတဲ ၚုဟ်နွံမံင်အတိုင်တြေံ ကၠာဗြဲဟွံဂူဂှ်ဖိုဟ်ရ၊ ရံင်ကေတ်ကဵု ဗွဝ်ဖျာဂၠးတိကီု၊ ဗွဝ်ဖျာသေံကီုတှ်ေ လိုက်ဝှ်ဏံ ဘိုအ်ဂွံတိုန်ဂှ် အကာဲအရာနွံအောန်” သာ်ဝွံ တၠကမၠောန် ဒေင် သွံရာန်ထၜိုတ် လတူဍုင်မုဟ်ဍုင်မွဲတၠ ဟီုရ။

လၟုဟ်မ္ဂး တၞးထၜိုတ် (မှိုင်း ၃) Local-3 ဂှ် ၚုဟ်နွံအကြာ ၂၈၀၀ တုဲ ဍာ်ထၜိုတ်ဂှ် ရဲရာန်တအ် ရာန်မံင် မွဲပံင် အကြာ ၂၆၀၀ ဒ္ကေဝ်ရ။ ထၜိုတ် RSS– 1 ဂှ် ၚုဟ်ပံက်မံင် အကြာ ၃၀၀၀ ဒ္ကေဝ်ပြင်ပြင်ရ။

အခိင်တ္ၚဲဏံဂှ် ၚုဟ်ထဝ် ၚုဟ်ဒဝ်ဠာကီု၊ ၚုဟ်ကပေါတ်ဗၞိက်ဖျာနာနာကီုဂှ် ၜိုန်ရက္ဍင်တိုန်မံင် အဆက်ဆက်လေဝ် ၚုဟ်ထၜိုတ်ဂှ် ဂစာန်အောန်စှ်ေမံင် နူကဵု ကၠာဗြဲဟွံဂူတေံဏီဂှ် ဒေင်ရာန်ထၜိုတ်တအ် ဍဵုဖျဝ်လဝ်ၚုဟ်ရောင်ဂှ်လေဝ် တၠဆေင်ရာန်ထၜိုတ်လ္ၚဵု ဟီုရ။

“ၚုဟ်ထဝ် ၚုဟ်ဒဝ်ဠာ ၚုဟ်ကပေါတ်ဖျာ တိုန်မံင် နူကဵုကၠာဗြဲဟွံဂူတေံ ဂၠိုင်ကြပ်ကဝက်ရဂှ် ၚုဟ်ထၜိုတ်မွဲဓဝ် ဟွံတိုန်ဂှ် ဒှ်ဟွံမာန်၊ ၚုဟ်ထၜိုတ်ဂၠးတိၜိုတ်လဵု ပရေံပရေံလေဝ် တုဲကၠုင်တေံတှ်ေ အတိုင်ၚုဟ်ထဝ် ၚုဟ်ဒဝ်ဠာတိုန်ဂှ် ၚုဟ်ထၜိုတ်လေဝ် ဗက်တိုန်မံင်ၜိုတ်ထေက်ကြိုက်၊ ၚုဟ်ပံက်မံင်လၟုဟ်ဏံရတှ်ေ တၠကၠအ်ထၜိုတ်တအ် အကာဲအရာ ဟွံခိုဟ်ပုဟ်” တၠဆေင်ရာန်ထၜိုတ် နူဍုင်ဇြပ်ဗုမွဲတၠ ဟီုရ။

တၟော်ကဵုၚုဟ်ထဝ်တ္ၚဲဏံမ္ဂး အခိင်ၚုဟ်ထဝ်လျိုင်မွဲဒ္ကေဝ် နွံအကြာ ၃၀ ကိုဋ်ဂှ် ၚုဟ်ထၜိုတ်မွဲပံင် နွံအကြာ ၁၆၀၀၊ ၁၇၀၀ ဒ္ကေဝ်တုဲ ၚုဟ်ထဝ်တိုန်ဒှ်အာ မွဲဒ္ကေဝ် ၆၀ ကိုဋ်ဂှ် ၚုဟ်ထၜိုတ်မွဲပံင် ဒှ်အာ အကြာ ၃၀၀၀ ဒ္ကေဝ်ရ။ လၟုဟ်ပၠန်ဂှ် ၚုဟ်ထဝ်ဒှ်အာ မွဲဒ္ကေဝ် ၇၀ ကိုဋ်ပြင်ဂှ် ၚုဟ်ထၜိုတ်မွဲပံင် နွံမံင်အကြာ ၃၀၀၀ ဒ္ကေဝ်ဖိုဟ်ရ။

အခိင်ခွါတ်ထၜိုတ်လိုက်ဝှ်တိကှ် သၞာံတုဲကၠုင်တေံဂှ် တၞးထ္ၜိုတ်တီုတီု (မှိုင်း)ဂှ် မွဲပံင် နွံအကြာ ၂၁၀၀ ဒ္ကေဝ်၊ တၞးထ္ၜိုတ်ကြဳကြဳ Local-3 ဂှ် ၚုဟ်နွံအကြာ ၂၅၅၀ ဒ္ကေဝ်၊ ထ္ၜိုတ် RSS – 1 မွဲပံင်ဂှ် နွံၚုဟ် ၃၄၀၀ တုဲ ကာလ အခိင်ကၟာတ်ထၜိုတ် ကၠာဗြဲ ဟွံဂူက္ဍင်ဂှ် ၚုဟ်ထၜိုတ်ကလေင်ဆုတ်စှ်ေအာညိရ။

တွဵုရးဍုင်မန်ဂှ် မဒှ်တွဵုရးတဵုလွဳတၞံထ္ၜိုတ်ဂၠိုင်အိုတ်မွဲတုဲ ဗၞိက်ကပေါတ်မတိတ်နူထ္ၜိုတ်ဂမၠိုင် ညံင်ဂွံသွံပ္တိတ်ဏာကဵုဍုင်သ္အာင်မာန် သ္ကိုပ်ဝန်ဇၞော် ကမ္မယှေန်ပၞာန်တွဵုရး ဥုအံင်ကျဳတုင် ကေင်ဟီုဗ္ကန်ကၠုင်လဝ် ကုတၠကမၠောန်ထ္ၜိုတ်တအ်နွံရ။