ဟိုတ်နူဒပ်ကမ္မယှေန်ပၞာန်တအ် ထ္ပက်ကၠုၚ်ကရောၚ်ပၞာန် ဒေသမန်၊ ကရေၚ် ဆက်စပ် ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်လှာဒကှ်ဂှ်တုဲ ကၠအ်လ္ၚဵု ဟွံဂံၚ်ခွါတ်ထ္ၜိုတ်နွံရောၚ် ညးဒေသတအ် ဟီုရ။
“ဒေသကၠအ်ပိုဲခွါတ်မံၚ်ဂှ် ဟွံဂံၚ်အာမံၚ်ထ္ၜိုတ် (၃) တ္ၚဲတုဲရ၊ ကရောၚ်ပၞာန်ဗၟာ နူဒပ်အၜေတ် (ဒပ်မၠံက် ၃၁၈) ဇြဟတ်ဟွံအောန် ထ္ပက်လုပ်အာ လ္ပာ်ကွာန်ပုလိၚ် ခၠဵု တဂေါန်တိုၚ်တေံ၊ မိၚ်ဟီုမံၚ်ဂှ် ပြးမံၚ်လတူဒဵုဗၟံက်အၜေတ်ဂှ်လေဝ် နွံမံၚ်၊ ဟိုတ်နူဂှ်ရ ကၠအ်ထ္ၜိုတ်ဗၟံက်အၜေတ်ဂှ် ဗွဲမဂၠိုၚ် ဟွံဂံၚ်အာထ္ၜိုတ်အိုတ်ပုဟ်” သာ်ဝွံ တၠကၠအ်ထ္ၜိုတ် ကွာန်ဒဵုမာဲမွဲတၠ ဟီုထ္ၜးရ။
ဒေသပွိုၚ်ဍုၚ်မုဟ်ဍုၚ် ဗၟံက်ကွာန်အၜေတ် ဂၠံၚ်လုပ်ကဵု ပွိုၚ်ဍုၚ်လှာဒကှ် ဒေသကွာန်ပုလိၚ် ကွာန်ခၠဵုတဂေါန်တိုၚ်ဂှ် စတမ်နူအံက်တဝ်ဗာ (၁၉) တုဲကၠုၚ်ဏံတုဲ ကရောၚ်ပၞာန်ဒပ်ကမ္မယှေန်ပၞာန် လၟိဟ်ကဵုကၠံတအ် ထ္ပက်လုပ်ကၠုၚ်တုဲ ကၠအ်ထ္ၜိုတ်မၞုံဗွိုၚ်အကြာတဂှ်ဂမၠိုၚ် ဟွံဂံၚ်ခွါတ်ထ္ၜိုတ်အိုတ်ရ။
“လ္ပာ်ကရောၚ်ပၞာန်ဗၟာတအ် ဇက်တိတ်အာဂှ် ဒပ်ပၠန်ဂတးတအ် သၞေဟ်ကၚ်ရဲပၠန်ဂတးတအ် ဖျေံလဝ်နွံမံၚ်၊ ဆဂး ဒှ်ပေါဲဗတိုက်ရောၚ်ဂှ် ဟွံမိၚ်၊ ရမျှာၚ်မၠံက်ဇၞော်သၟးရ မိၚ်မံၚ်၊ ပၞာန်ဗၟာတအ်ဇက်တိုန်အာတှေ် ဒှ်ပေါဲဗတိုက်တွဵုဏောၚ် ခယျလဝ်၊ ဟိုတ်နူဂှ်ရ ရဲခွါတ်ထ္ၜိုတ်ဒေသတအ်ဂှ် ဟွံဂံၚ်အာထ္ၜိုတ်အိုတ်” သာ်ဝွံ ညးဆက်ဟီုရ။
ပရိုၚ်ကရောၚ်ပၞာန်ဒပ်ကမ္မယှေန် ဇက်လုပ်ကၠုၚ် ဒေသကွာန်ပုလိၚ်၊ ကွာန်ခၠဵုကွာန်တဂေါန်တိုၚ် မွဲဒမြိပ်ဂှ်တုဲ ညးဍုၚ်ကွာန်လ္ၚဵု ဖေက်လကိုတ်ဘဲပေါဲပၞာန်တုဲ ဂြိပ်ပါဲတိတ်အာနူကွာန်လေဝ်နွံရ။
ဒေသအကြာပယျဵု ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်လှာဒကှ် မွဲဒမြိပ်ဗၟံက်ကွာန်အၜေတ်ဂှ်မ္ဂး ဂကောံပၠန်ဂတးမန်ကဵု ဂကောံပၠန်ဂတးကရေၚ်တအ် ဖျေံသဇိုၚ် ချဳဒရာၚ်မံၚ်နွံတုဲ သွက်ဂွံဒှ်ပေါဲဗတိုက်တွဵုရောၚ်ဂှ်လေဝ် ညးဒေသတအ် စှေ်လဝ်စိုတ်ရ။
မွဲကာလဂိတုအံက်တဝ်ဗာမံက်ဏံဂှ် ဒေသဂၠံၚ်ဇၞော်အာယှ ဗြဝတဳကီု၊ ဂၠံၚ်ဇၞော်စၟတ် (၈) မတ်မလီု ရးတနၚ်တၞၚ်သဳဂှ်ကီု ကရောၚ်ပၞာန်ဒပ်ကမ္မယှေန်ပၞာန်တအ် ထ္ပက်လုပ်ကၠုၚ်နွံတုဲ အကြာဂကောံပၠန်ဂတးတအ်ကဵု ဒပ်ကမ္မယှေန်ပၞာန်ဗၟာတအ် အကာဲအရာပၞာန် ကြံၚ်မ္ၚိုဟ်မံၚ်ညးသ္ကအ်နွံဂှ် ဂွံတီကေတ်ရ။
