ပ္ဍဲကဵုပေါဲရုဲမာဲ (၂၀၂၅) ကမ္မယှေန်ပၞာန်ဗၟာတအ် ရန်လဝ်သွက်ဂွံကၠောန်အာ ပ္ဍဲဂိတုဒဳဇြေမ်ဗာဏံဂှ် အလံၚ်အမာတ် သွက်ဂွံလုပ်ရုဲစှ်ဂမၠိုၚ် ဒဵုလၟုဟ် ဟွံဂွံထ္ၜးမုက်မတ်ဏီရောၚ် ညးမၚ်ရံၚ်အခါတ်ကာဲ ပေါဲရုဲမာဲတွဵုရးဍုၚ်မန်မွဲတၠ ဟီုရ။

“စရၚ်အလံၚ်အမာတ်ဂမၠိုၚ်ဂှ် နူကမ္မယှေန်ပၞာန်တအ် သ္ပဒတန်လလောၚ်ပတိတ်ကဵုတုဲယျ၊ ဆဂး ဂွံချဳဒရာၚ်ပရေၚ်စန်ဒက်မာဲဂှ် ညးမၚ်ရံၚ်အဲ၊ အဲမၚ်ရံၚ်ညး ဟွံဂွံထ္ၜးမုက်မတ်ညးသ္ကအ်အိုတ်ဏီပုဟ်၊ ရဲလ္ပာ်တေံ (ဂကောံပၠန်ဂတး) လေဝ် ဟီုလဝ် ပိုတ်ပိုတ်နွံမံၚ်တှ်ေ အလံၚ်အမာတ်တအ် နဲလဵုဂွံချဳဒရာၚ်စန်ဒက်မာဲဂှ် တၚ်ကော်ဆဴနွံမံၚ်” သာ်ဝွံ သ္ဂးရ။

အခိၚ်စန်ဒက်မာဲဂှ် စတမ်နူဂိတုအံက်တိုဝ်ဗာ (၂၈) ဒဵုကဵုစိုပ် ဂိတုဒဳဇြေမ်ဗာ (၂၆) ဂှ် ပံက်ကဵုလဝ် အခေါၚ်ချဳဒရာၚ်စန်ဒက်မာဲရ။ အခိၚ်တ္ၚဲစန်ဒက်မာဲဂှ် ၜိုန်ရကြပ်ကၠုၚ်ကီုလေဝ် ညးစၞးအလံၚ်အမာတ် ဒုၚ်ရုဲစှ်ပေါဲရုဲမာဲဂမၠိုၚ် နူဗော်နာနာတအ် ဟွံဂံၚ်ထ္ၜးမုက်မတ်ဏီရ။

“သွက်အလံၚ်အမာတ်လုပ်ပြိုၚ်ပေါဲရုဲမာဲ (၂၀၂၅) ဏံဂှ် တၚ်ဘပဠ တၚ်ကော်ဆဴ ဇၞော်အိုတ်ရ၊ မုပရောဟီုတှ်ေ ပေါဲရုဲမာဲ ကမ္မေယှန်ပၞာန်ဗၟာတအ် ကၠောန်လၟုဟ်ဏံဂှ် ဗွဲမဂၠိုၚ်ဂှ် ဟွံစှ်ေစိုတ်ပုဟ်၊ ဆဂး ဂံၚ်ဟီုကဵု ဟွံဂံၚ်ဟီုရနွံ၊ မွဲလ္ပာ်တေံဂှ်လေဝ် လတူရဲချဳဒရာၚ်လုပ်ပေါဲရုဲမာဲတအ်ဂှ် ကဵုအာဒုဟ်ဒဏ်ရောၚ် ဟီုလဝ်နွံမံၚ်တှ်ေ နကဵုအလံၚ်အမာတ်တအ် ဂံၚ်ချဳဒရာၚ်ဟာ၊ ဂံၚ်စန်ဒက်ဟာဂှ်လေဝ် ဟီုဟွံဒးပုဟ်”  သာ်ဝွံ အလံၚ်အမာတ်ကေၚ်ရုဲစှ်လဝ် ပေါဲရုဲမာဲ (၂၀၂၀) မွဲတၠဂှ် ဟီုရ။

အခိၚ်ပရေၚ်ဍုၚ်ကွာန်ရုသံၚ်တုဲ အဃောပေါဲပၞာန်သ္ကာတ်မြဟ်မံၚ်တ္ၚဲဏံဂှ် ၜိုန်ရကမ္မယှေန်ပၞာန်တအ် လလောၚ်ပ္တိတ်ဒၟံၚ် ပရေၚ်ကမၠောန်ပေါဲရုဲမာဲ အဆက်ဆက်ကီုလေဝ် နကဵုညးဍုၚ်ကွာန်တအ်ဂှ် စိုတ်ဟွံလုပ်စကဵု ပေါဲရုဲမာဲတုဲ စရၚ် မာဲပါ ဟွံပါဂှ်လေဝ် မၞိဟ်အာရံၚ်စၟဳစၟတ်နွံအောန်ကွေံကွေံရ။

ပ္ဍဲတွဵုရးဍုၚ်မန်ဂှ် ဗော်ပရေၚ်ဍုၚ်ကွာန် (၉) ဗော် သွက်ဂွံလုပ်ပြိုၚ်ဒုၚ်ရုဲစှ်နွံတုဲ အပ္ဍဲဂှ်မ္ဂး ညးစၞးအလံၚ်အမာတ်နူဗော်နာနာ လၟိဟ် (၂၅၀) တၠပြၚ် သွက်ဂွံလုပ်ဒုၚ်ရုဲစှ်နွံရ။

အပ္ဍဲဂှ်မ္ဂး ညးစၞးနူဗော်ညဳသၟဟ်မန် သွာၚ်ကၠတ်ထဝ်ညးဍုၚ်ကွာန်၊ ကၠတ်ထဝ်ကောန်ဂကူ ကဵု ကၠတ်ထဝ်တွဵုရး သီုပိဗၠိုၚ်ဂှ် (၃၈) ဒၞာဲ သွက်ဂွံလုပ်ပြိုၚ်အာနွံရောၚ် ဂွံတီကေတ်ရ။