ဒှ်ယဲကလောံကလေန် လက်သန်ယဲစၟရိုဟ် (ကေန်သာ) မ္ဂး လ္ပဖျေံသ္ဂုတ်သွာတ်ပါ်ကရေက်ပြဟ်ညိ အ္စာဂဥုဲတဗျလ္ၚဵု ဟီုကဵုသတိရ။

ယဲကလောံကလေန် တၟေၚ်ဒှ်တိုန်မ္ဂး ယဝ်အာထ္ၜးကဵု ရုၚ်ဂဥုဲ ၊ ဒံက်တာသဝ်ဝန်တအ်မ္ဂး လက်သန်ယဲစၟရိုဟ် (ကေန်သာ) ဂးတုဲ ကဵုဇြဟတ်ကဵုပါ်ကရေက်သၟးဂၠိုၚ်ရ။

ဇၟာပ်ဒှ်ယဲကလောံကလေန် လက်သန်ဒှ်ယဲစၟရိုဟ် (ကေန်သာ) ပါ်ကရေက်ဂှ် ပါ်ကရေက်ဒးတုဲ သာတုဲ (ပဵုတုဲ) လွဳဝါတ်အာရောၚ် အ္စာဂဥုဲတဗျမန်မွဲတၠ ဟီုရ။

“ယဲကလောံကလေန် ယဲစၟရိုဟ် (ကေန်သာ) ဏံဂှ် ယဝ်ပါ်ကရေက်ဒးတှ်ေ သာတုဲ (ပဵုတုဲ) လွဳဝါတ်အာဏောၚ်၊ လ္ပာ်ဂဥုဲ တဗျပိုဲတှ်ေ ဟွံမိက်ကဵု ပါ်ကရေက်ပုဟ်၊ ပိုဲဖျုၚ်ကေတ်ဂဥုဲတဗျရ၊ ဖျေံကေတ်ဍေံသိုက်သိုက်တုဲ ဍေံသက်သာ အိုတ်စှ်ေ သိုက်သိုက်ဏောၚ်၊ ယဝ်ဒှ်မာန်တှ်ေ လ္ပဖျေံသ္ဂုတ်သွာတ်ပါ်ကရေက်တွဵု” သာ်ဝွံ အ္စာဂဥုဲတဗျ ကၠောန်ပတိတ်တြးမံၚ် ဂဥုဲတဗျမန်တြေံတြဟ် နာဲထၟာဲစိၚ် (ဗလေတ်လဝ်ယၟု) ဂှ် ဟီုထ္ၜးရ။

ယဲကလောံကလေန် ကတဵုဒှ်တၟေၚ်တိုန်မ္ဂး သွက်ဂွံဒှ်လက်သန်ယဲစၟရိုဟ် (ကေန်သာ) ဂးတုဲ အာထ္ၜးကဵု ရုၚ်ဂဥုဲ၊ သဝ်ဝန်မ္ဂး ဗွဲမဂၠိုၚ်ဂှ် ဒံက်တာသဝ်ဝန်တအ် ကဵုဇြဟတ်ကဵုပါ်ကရေက်တုဲ လွဳသၟးဂၠိုၚ်ရ။

“ယဲစၟရိုဟ် (ယဲကေန်သာ) ဏံဂှ် ယဝ်ဟီုကဵုလ္ပာ်ပိုဲတှ်ေ လွဳကေတ်ကဵု ဂဥုဲတဗျရခိုဟ်၊ ယဝ်လွဳလ္ပာ်ရုၚ်ဂဥုဲ ပါ်ကရေက်တှေ် စၟရိုဟ်ဂွံပိုတ်ဂှ် ဝါတ်မံၚ်၊ စၟယဲရိုဟ်ဂွံပိုတ်ဂှ်တှ်ေ ဒးစကဵု ဂဥုဲတဗျမန်ပိုဲရ၊ ဇှ်ရ မိက်ဂွံဟီုကဵုကသပ်ဂှ်တှ်ေ ဟွံမိက်ကဵု ပါ်ကရေက်ပုဟ်၊ ပါ်ကရေက်ဒးတှ်ေ လွဳဝါတ်အာဏောၚ်၊ သုၚ်ကေတ်ဂဥုဲတဗျမန်ပိုဲ ဍာ်ဇမၠိၚ်တှ်ေ ဍေံဗၠးအာမာန်မံၚ်” သာ်ဝွံ အ္စာဂဥုဲတဗျဂှ် ဆက်ဟီုရ။

ယဲစၟရိုဟ် (ကေန်သာ) ဂှ် ပ္ဍဲကအ်ကီု၊ ပ္ဍဲက္ဍိုပ်ကီု ဒှ်ဂၠိုၚ်တုဲ မၞိဟ်က္တဵုဒှ်ယဲဝေဒနာဗွဲမဂၠိုၚ်ဂှ် အာထ္ၜးလွဳစမ်ၜတ်ယဲ ပ္ဍဲရုၚ်ဂဥုဲပုဂ္ဂလိကဂၠိုၚ်တုဲ ကာလလွဳစဂဥုဲ ပ္ဍဲရုၚ်ဂဥုဲတအ် ဟွံဗၠးမှ စိုပ်အာဇရေၚ် အ္စာဂဥုဲတဗျတအ် နွံဂၠိုၚ်ရ။