ပ္ဍဲဍုၚ်မန် ဗြဲဟွံသေၚ်ကဵုအခိၚ် တရိုပ်ဂူဒၟံၚ်ဂၠိုၚ်ကဵုတ္ၚဲတုဲ သြောံရတ်လဝ်တုဲလ္ၚဵုဂှ် လီုလာ်၊ ဝါလ္ၚဵု သီုကဵုကၠုတ်တိတ်ကၠုၚ်မံၚ်နွံရောၚ် တၠဝါမွဲတၠဂှ် ဟီုလဴထ္ၜးရ။
နကဵုအသိၚ်လဗိုတ်ကျာမေလံၚ် ‘ခါမာဂဳ’ ဂှ်တုဲ ပ္ဍဲဍုၚ်မန်ဝွံ စတမ်နူ ကထိုန်ပေၚ်(နဝ်ဝေမ်ဗာ ၄) တုဲဂှ် ဒဵုကဵု ကထိုန် (၅) စွေက် (နဝ်ဝေမ်ဗာ ၉) ဂှ် ဗြဲဂူတရိုပ်ဒၟံၚ်အဆက်ဆက်ဂှ်တုဲ သြောံရတ်လဝ်တုဲတအ်ကီု၊ သြောံက္ဍုဟ်မံၚ်ဟွံဂွံရတ်ဏီကီုဂှ် ဒးဗြဲတုဲ လ္ၚဵုဂှ် ကၠုတ်မံၚ်လေဝ်နွံရောၚ် သ္ဂးရ။
“ဒးလဝ်ဗြဲမွဲၜါတ္ၚဲဏံ သြောံရတ်လဝ်တုဲဂှ် စဲလေဝ်ဟွံဂွံ၊ ကေတ်ဖျဴဏာလေဝ်ဟွံဂွံ၊ ဒှ်ဒဒိုက်သက်ဟီုဟွံမွဲရ၊ ရတ်လဝ်တုဲ အဃောစဲမံၚ် လ္ၚဵုဂှ် ကၠုတ်မံၚ်လေဝ်နွံ၊ သြောံဟွံဂွံရတ်ဏီဂှ်လေဝ် ဗၠိုက်မံၚ်ဍာ်တုဲ ဒစိုၚ်ကဝ်ကသိုပ်စှေ်မံၚ်သၟဝ်ဍာ် သက်ဟီု ဟွံမွဲရ၊ ဒးကဵုဗြဲအခိၚ်အခါဟွံသေၚ်ဏံ တၠဝါတအ် ဒှ်ဒဒိုက်ဍာံဍာံရ” ရဴသာ်ဝွံ တၠဝါဗ္ၚ ပွိုၚ်ဍုၚ်ဇြပ်ဗုမွဲတၠ ဟီုရ။
လၟေၚ်အရိုဟ်ဟ်သၞာံဝွံ ပ္ဍဲဍုၚ်မန်ဂှ် ကထိုန်ပေၚ်တုဲမ္ဂး ဗြဲအိုတ်တုဲ မုဟ်ကျာစလုပ်ရ။ ဝါကၠောန်လဝ်သြောံပရဟ်တအ်လေဝ် စရတ်သြောံတုဲ သြောံရတ်လဝ်တုဲတအ်ဂှ် အဃောစဲဒကှ်မံၚ်ရ။
သြောံပရဟ်ရတ်လဝ်တုဲတအ်ဂှ် အဃောစဲဒကှ်မံၚ်ပ္ဍဲဝါဂှ်ရ ဗြဲဂူတရိုပ်ဖျေံဒၟံၚ်ဂၠိုၚ်ကဵုတ္ၚဲတုဲ သြောံရတ်လဝ်တုဲတအ်ကီု၊ သြောံဟွံဂွံရတ်ဏီတအ်ကီု ကတဵုဒှ်ဒဒိုက်တုဲ ဟိုတ်အသိၚ်ဗြဲကထိုန်စွေက်ဂှ် သြောံဆောံလေၚ်ဂၠိုၚ်ရောၚ် တၠဝါတၞဟ်မွဲတၠပၠန်ဂှ် ဟီုရ။
“ဝါပိုဲဂှ် စုတ်လဝ်သြောံပရဟ်ဟွံမွဲတုဲ ရတ်ဂှ် ဟွံဂွံရတ်ဏီ၊ ဆဂး သြောံအဃောကြပ်ဍုဟ်ဂှ် ဒးဗြဲဇၞော်တုဲ ဒကောၚ်ကဝ်ကသိုပ်စှေ်မံၚ်သၟဝ်ဍာ်ဖအိုတ်၊ လာပ်မံၚ်သ္ဇက်ဟီုဟွံမွဲရ၊ ယဝ်ဗြဲဂူဆက်ဂူအာပၠန်တှေ် ဒကောၚ်သြောံဒှ်ဗီုတုၚ်လဝ်ဍာ် လအ်လအ်တှေ် သြောံတအ်ဂှ် အုဲလီုအိုတ်တးရ” သာ်ဝွံ တၠဝါဗ္ၚ နူမုဟ်ဍုၚ်မွဲတၠဂှ် ထပ်ဟီုရ။
အသိၚ်လဗိုတ်ကျာမေလံၚ် ဗြဲဂိတုကထိုန် (နဝ်ဝေမ်ဗာ) ဏံဂှ်တုဲ တၠဝါဗ္ၚတအ်ကီု၊ တၠကၠအ်ထ္ၜိုတ်၊ ရဲခွါတ်ထ္ၜိုတ်တအ်ကီု ကမၠောန်ကၟိတ်လီု ဗီုညးကဵုဗီုညးအိုတ်တုဲ တၠဝါဗ္ၚ၊ တၠကၠအ်ထ္ၜိုတ်၊ ရဲခွါတ်ထ္ၜိုတ်တအ် ကတဵုဒှ်ဒၟံၚ်ဒဒိုက်အိုတ်ရောၚ် ဂွံတီကေတ်ရ။
0 Comments