သြောံဍုက်လဝ်ဗြဲတ္ၚဲကၠာဂှ် အဃောစဲသကှ်မံၚ်ဂှ် နူတနေံတေံကဵု နူဗတမ်ဏံ ဗြဲထပ်ဂူဖျေံနၚ်ပၠန်တုဲ တၠဝါတအ် ထပ်ဒှ်မံၚ်ဒဒိုက်ပၠန်ရောၚ် တၠဝါဗ္ၚ သြောံဒးလဝ်ဗြဲ နူဇြပ်ဗု မွဲတၠ ဟီုကရောတ်ရ။

“သြောံဒးလဝ်ဗြဲတ္ၚဲကၠာဂှ် အဃောစဲသကှ်မံၚ်ဂှ် ဗြဲထပ်ဂူနၚ်ဖျေံပၠန်ဂှ် နူတနေံတေံကဵု နူဗတမ်ဏံ ထပ်ဍုက်အာပၠန်၊ သၞာံဏံမှ ဒဒိုက်လတူဒဒိုက်” သာ်ဝွံ တၠဝါ နာဲမိုၚ်သဳ ဟီုရ။

သြောံရတ်လဝ်တုဲ အသိၚ်ဒးလဝ်ဗြဲကၠာဂှ် အဃောဂစာန်စဲသကှ်မံၚ်ဏံ နူတနေံ ကထိုန် ၁၀ စွေက် (နဝ်ဝေမ်ဗာ ၁၄) ဂှ် ဒေသလ္ၚဵု ဗြဲထပ်ဂူပၠန်တုဲ သြောံစဲသကှ်လဝ်ဂှ် ထပ်တုဲဒးအာဗြဲပၠန်ရ။

“တၠဝါတအ်ဗီုဒဒိုက်သၞာံဏံ မွဲအလန်လေဝ် ဟွံကေၚ်ဆဵုပုဟ် သြောံကြပ်ဍုဟ်၊ သြောံရတ်လဝ်တုဲ ဗၠိုက်ဍာ်၊ ရတ်လဝ်တုဲဂှ်လေဝ် ဒးဟံၚ်ကေတ်သၟဝ်ဍာ်၊ ဍုက်လဝ်ဍာ်တုဲ ဂစာန်စဲ၊ အဃောန်ဂစာန်စဲမံၚ်ဂှ် ဗြဲထပ်ဂူပၠန်၊ ထပ်ဍုက်ပၠန် ဒဒိုက်ရဲဝါတအ် သ္ဇက်ဟီုဟွံမွဲရ” သာ်ဝွံ နာဲခေန်မိုၚ်ယျဳ တၠဝါတၞဟ်ဂှ် ဟီုရ။

သြောံဍုက်ဒးလဝ်ဗြဲဂှ် ၜိုန်ရစဲကလေၚ်ကှ်အာလေဝ် သွံရာန်ဟွံဂွံၚုဟ်ခိုဟ် ဗီုၚုဟ်သြောံပကတိတေံရ။

ဂိတုကထိုန် (၇-၈) မံက်တုဲကၠုၚ်ဏံ ဒေသဍုၚ်မန်ဗွဲမဂၠိုၚ်ဂှ် ဗြဲဂူတရိုပ်တ္ၚဲအဆက်ဆက်တုဲ ဝါပရဟ်ရတ်လဝ်သြောံဂှ် ဒးဗြဲ တ္ၚဲလအ်အာတုဲ ဝါလ္ၚဵု သြောံကၠုတ်အာနွံရ။

ပ္ဍဲဍုၚ်မန်ဂှ် ဂိတုကထိုန်ကြပ်အိုတ်ရလေဝ် မွဲဒေသဟွံသေၚ် မွဲဒေသဂှ် ဗြဲဆက်ဂူဒၟံၚ်အရိုဟ်တ္ၚဲဏီဖိုဟ်တုဲ သြောံဝါရတ်လဝ်တုဲဂှ် သြောံဍုက်အာဍာ်ကီု ရဲခွါတ်ထ္ၜိုတ်တအ်ပၠန်လေဝ် ထ္ၜိုတ်ဒးဗြဲ ဟဳမံၚ်ဂၠိုၚ်ကဵုတ္ၚဲဂှ်ကီု ဗီုညးကဵုညး ဒှ်မံၚ်ဒဒိုက်ကဵု ဗြဲသၞာံဏံအိုတ်ရ။