ပ္ဍဲကၟိန်ဍုၚ်သေံ၊ ဍုၚ်အယုဒ္ဓယဂှ် ဟိုတ်နူဘဲဍာ်ဇၞော်ဍာ်ကလိုပ်က္တဵုဒှ်တုဲ မၞိဟ်ချိုတ်အာ (၁၄)တၠ၊ သ္ရိမံင်ဗၞတ် (၆)ဠက်မ ဗၠိုက်တၞီဒၟံၚ်နွံရောၚ် ဂွံတီကေတ်နူအတိုၚ်တၚ်နၚ်ပရိုၚ်သေံတအ်ရ။

ပပ္တံနူဂိတုနဝ်ဝေန်ဗာ စၟတ်တ္ၚဲ (၇)ဂှ် ဟိုတ်နူအသိၚ်လဗိုတ်ကျာတိုၚ်ဘန်တုဲ ဗြဲတရိုပ်ဂူဆက်ကၠုၚ်ဂှ်ရ အလုံကၟိန်ဍုၚ်သေံမွဲ သ္ဒးစွံကဵုသတိ ဘဲဒဏ်ဍာ်ဇၞော် ဍာ်ကလိုပ်ရောၚ် နူကဵုဌာနစမ်ၜတ်ဗြဲကျာသေံတအ် လလောၚ်ကဵုကၠုၚ်လဝ်သတိ ကုညးဍုၚ်ကွာန်တအ်နွံရ။

ပ္ဍဲတ္ရဲအကြာဏံ ကၟိုန်ကၟာဍာ်စောဖရယာ(Chao Phraya) မၞုံပ္ဍဲခရိုၚ်အယုဒ္ဓယ၊ တွဵုရးဆာဲနက်ဂှ် ဍာ်ဇၞော်ပဵုတိုန်ကၠုၚ်တုဲ ဒးဗလးဖျေံဍာ်ဂှ်ရ သ္ၚိမံၚ်၊ အရာပ်ဂမၠိုၚ်တအ် ဍာ်ဇၞော်ဗၠိုက်တၞီကၠုၚ်ရ။

စပ်ကဵုကိစ္စဗၠးပ္တိတ်ဍာ် နူကၟိုန်ကၟာဍာ်ဂှ် ဗၞတ်ဗ္ၜတ်ဍေံ မွဲသက္ကဂှ်မ္ဂး (၂၈၀၀) ကုဗမဳတာ သၠုၚ်ပ္တိုန်လဝ်နွံတုဲ မွဲအသိၚ်ဂှ်ရ မပ္တမ်ကဵု ဍာ်ၜဳ၊ ဍာ်ကြုၚ်၊ မြံၚ်ဍာ်တအ် ဗၠိုက်တၞီလုပ်အာတုဲ ပ္ဍဲအယုဒ္ဓယဂှ် ပရေၚ်ဍာ်ဇၞော် ဍာ်ကလိုပ် က္တဵုဒှ်ကၠုၚ်ရောၚ် ဌာနမၚ်ရံၚ်လ္ၚတ်ကၟိုန်ကၟာဍာ်တအ် ဂးလဝ်ရ။

ပြဟ်ပြဟ်ဏအ် ပ္ဍဲကၟိန်ဍုၚ်သေံ ခရိုၚ်စိုပ်မံၚ်ဘဲဒဏ်ဍာ်ဇၞော်ဂှ် (၁၁) ခရိုၚ်နွံတုဲ အရာပ်ကွာန် (၉၄၅) ဒၞါဲ ကဵု သ္ၚိမံၚ်ဗၞတ် (၅၈,၄၇၇) မ စိုပ်မံၚ်ဘဲဍာ်အိုတ်ရ။ ဟိုတ်နူအသိၚ်ဘဲဒဏ်ဍာ်ဇၞော်တုဲ မၞိဟ်ဒးချိုတ်အာလဝ် (၁၄) တၠလေဝ် နွံကၠုၚ်ရ။

တုဲပၠန် ဟိုတ်နူလဗိုတ်ကျာတိုၚ်ဘန် ဂေဝ်မေဂဳတုဲ  ပြဟ်ပြဟ်ဏံ ဍုၚ်ကြုက်၊ ဖဳလေတ်ပိုၚ်၊ ဗဳယာပ်နာန်တအ် မၞိဟ်ဒးချိုတ်လဝ် ဟွံအောန်နူ (၂၀၀) တၠ ညးစိုပ်မံၚ်ဘဲဒဏ် ဍာ်ဇၞော်ဂှ်လေဝ် နွံကၠုၚ်ဗွဲမဂၠိုၚ်ရောၚ်ဂှ် ဂွံတီကေတ်လဝ်ရ။

ဂကူလဗိုတ်ကျာတိုၚ်ဘန် ဂေဝ်မေဂဳဏအ်ဂှ်ဝွံ ပ္ဍဲသၞာံ ၂၀၂၅ ဏံ စၟတ်လဝ်နဒးဒှ်လဗိုတ်ကျာ သ္ကတ်မြဟ် ထတ်အိုတ်မွဲရောၚ်ဂှ် တၠပညာဗြဲကျာတအ် ဂးလဝ်ကီုရ။

ဗီုရုပ်- Khaosod English