နဲကဵုမာဲ နကဵုစက်အဳလေက်ထရဝ်နေစ် (အီလက်ထရောနစ်မဲစနစ်) Electronic Voting Machine (EVM) ဂှ် ကၠောန်ပ္တိတ်လဝ် သွက်ဂွံထ္ၜးဗီုပြၚ်စုတ်မာဲ ကုညးဍုၚ်ကွာန်တအ် ဟွံမွဲတုဲ အလံၚ်အမာတ်တအ် ဒးကၠောန်ပ္တိတ်ထ္ၜး ဗီုပြၚ်နကဵုတၞးစက္ခူရောၚ် ညးဍုၚ်ကွာန်တိုန်စိုပ်လဝ် ပေါဲသောၚ်ကလး နဲစုတ်မာဲ နူအလံၚ်အမာတ်မန်မွဲတၠ ဟီုရ။
ပေါဲရုဲမာဲ (၂၀၂၅) သွက်ဂွံကၠောန်လၟုဟ်ဏံဂှ် ကမ္မယှေန်ပေါဲရုဲမာဲ ကမ္မယှေန်ပၞာန်တအ် သၠာဲလဝ်အခိုက်စုတ်မာဲ နကဵုစက်အဳလေက်ထရဝ်နေစ်ဂှ် သွက်ဂွံထ္ၜးဗီုပြၚ် ကဵုပညာစုတ်မာဲ ပ္ဍဲညးဍုၚ်ကွာန်တအ် ကၠောန်ပ္တိတ်လဝ်ဟွံမွဲတုဲ အလံၚ် အမာတ်လုပ်ပြိုၚ်ပေါဲရုဲမာဲတအ် ပ္ဍဲကဵုထ္ၜးဗီုပြၚ်စုတ်မာဲဂှ် ဒးကၠောန်ပတုပ်ကေတ် နကဵုတၞးစက္ခူရ။
ဟိုတ်နူကၠောန်ပတုပ်ကေတ် နကဵုတၞးစက္ခူတုဲ ဟွံတုပ်ဗီုဍာံဍာံတေံဂှ်ရ ညးဍုၚ်ကွာန်တအ် ဟွံဆဵုလဝ်နမတ်တုဲ ဟွံကၠိုဟ်ရောၚ် ညးဍုၚ်ကွာန်တိုန်စိုပ်လဝ် ပေါဲသောၚ်ကလး နူအလံၚ်အမာတ် ဗော်ညဳသၟဟ်မန် ပွိုၚ်ဍုၚ်မုဟ်ဍုၚ်မွဲတၠဂှ် ဟီုရ။
“ဗီုဂွံစုတ်မာဲဂှ် ညးတအ်လဴကလးကဵုကီုရ၊ ဆဂး ကၠောန်ကွေံကွေံတေံဂှ် ကဵုစက် ဏောၚ်တှေ် စုတ်မာဲကဵုစက် (အဳလေက်ထရဝ်နေစ်) ဏံဂှ် မွဲအလန်လေဝ် ညးဍုၚ်ကွာန်တအ် ဟွံကေၚ်စုတ်လဝ်ပုဟ်တှေ် အလန်ဏံမှ ဒှ်အလန်ကၠာအိုတ် ပ္တိတ်လဝ် သွက်ညးဍုၚ်ကွာန်တအ် ဂွံဗဵုလေဝ် ဟွံမွဲပုဟ်၊ အလံၚ်အမာတ်တအ် သောၚ်ကလးမှ ကၠောန်ပတုပ်ကေတ်ကဵု တၞးစက္ခူတုဲ ဟီုလဴကေတ်ရတှေ် ညးဍုၚ်ကွာန်ဓမ္မတာရတှေ် ဟွံကၠိုဟ်ပုဟ်” သာ်ဝွံ ညးဟီုရ။
နဲကဵုမာဲကဵုစက်အဳလေက်ထရဝ်နေစ် (အီလက်ထရောနစ်မဲစနစ်) Electronic Voting Machine(EVM) ဂှ် ဂွံထ္ၜးကဵု ညးဍုၚ်ကွာန်တအ် နကဵုမတ်မာန်မှ ပြေပြံၚ်မာန်ရောၚ်ဂးတုဲ ညးစၞးအလံၚ်အမာတ်မန် ဗော်မန်တအ် ပ္တိုန်သဳကၠဳထ္ၜးကဵု ကမ္မယှေန်ပေါဲရုဲမာဲနွံကီုလေဝ် နကဵုကမ္မေယှန်ပေါဲရုဲမာဲတအ် ကၠောန်ပတိတ်လဝ်အပဵုဟွံမွဲရောၚ် ကလေၚ်ဟီုဏာရ။
ပေါဲရုဲမာဲ (၂၀၂၅) ဏံ ပရေၚ်ဍုၚ်ကွာန်ဟွံညိၚ်ဝတ်မွဲသာ် ကၠောန်ဏာဏံဂှ် နကဵုညးဍုၚ်ကွာန်တအ် စိုတ်လုပ်စအောန်မံၚ်ရရဂှ် ထပ်ပြံၚ်သၠာဲလဝ် နဲစုတ်မာဲ နကဵုစက် အဳလေက်ထရဝ်နေစ် (အီလက်ထရောနစ်မဲစနစ်) Electronic Voting Machine (EVM) ပၠန်မ္ဂး ညးဍုၚ်ကွာန်တအ် သာတုဲစိုတ်ဟွံလုပ်စခ္ဍၚ်ရောၚ် ညးဍုၚ်ကွာန်တိုန်စိုပ်လဝ် ပေါဲသောၚ်ကလးနဲစုတ်မာဲဂှ် ဟီုထ္ၜးတုဲ ဂွံတီကေတ်ရ။
