နူကဵုတိုက်ဩန်တအ် ဗပဵုကဵုအိက်ဩန်လေဝ် မၞိဟ်ပၠောပ်ဩန်ဂိုၚ်စွံပ္ဍဲတိုက်ဩန် အောန်စှ်ေကၠုၚ်မံၚ်ရောၚ် တၠကမၠောန်ဆေၚ်ဓမာတ်ထဝ် ပံက်လဝ်ရုၚ်ကမၠောန် လတူဍုၚ်မတ်မလီုမွဲတၠ ဟီုလဴထ္ၜးရ။
တုဲကၠုၚ်တေံ ပၠောပ်ဩန်ဂိုၚ်စွံပ္ဍဲတိုက်ဩန်မ္ဂး အိက်ဩန် ဒ္စာံစှော်ဂတှ်ေဟေၚ် နူကဵုတိုက်ဩန်တအ် ကဵုမံၚ်ဂှ် လၟုဟ်ဏံ အိက်ဩန်မွဲဒ္ကေဝ်ထပ်ဗပဵုကၠုၚ်ကီုလေဝ် မၞိဟ်ပၠောပ်ဩန်ဂိုၚ်စွံပ္ဍဲတိုက်ဩန် အောန်ကွေံကွေံရောၚ် တၠဆေၚ်ဓမာတ်ထဝ်ဂှ် ဟီုရ။
“တၠကမၠောန်တအ် တၠဓနပိုန်ဒြပ်တအ် ကၠာကၠာတေံ ဂွံသှ်ေအာ ဂိုၚ်စွံလဝ်ပ္ဍဲဗေန်ရ၊ ဠ တေံတှ်ေ အိက်ဩန်တိုက်ဩန်ဂှ် ဒ္စာံစှော်ဂတှ်ေရ၊ လၟုဟ်နူကဵုတိုက်ဩန်ဗေန်တအ် ဗပဵုကဵု ဒှ်အာ မွဲဒ္ကေဝ် ဆဂး မၞိဟ်စွံအောန်ဂှ်ရ၊ ဓဝ်ပတှ်ေတိုက်ဩန်တအ်ဂှ် လီုအာ လ္ပာ်ပၠောပ်ဂှ် အောန်ကွေံကွေံ အာပ္ဍဲတိုက်ဩန်တှ်ေ ပိုဲဂွံဆဵုရ မၞိဟ်လ္ပာ်ပတိတ်ဩန်သၟးရဂၠိုၚ်” သာ်ဝွံ ညးဟီုရ။
ပ္ဍဲကဵုတိုက်ဩန်ဂမၠိုၚ်ဂှ် ဟိုတ်နူမၞိဟ်ပၠောပ်ဂိုၚ်စွံဩန်အောန် မၞိဟ်လ္ပာ်ပတိတ်ဩန်ဂှ်ဟေၚ် ဂၠိုၚ်တုဲ ပတိတ်ဩန်မ္ဂး အတိုၚ်နွံပၟိက်မိက်ဂွံပတိတ်ဂှ် ပတိတ်ဟွံဂွံရဂှ်လေဝ် ညးဆက်ဟီုရ။
“တၠကမၠောန်တအ် ဒးပတိတ်ဩန် (၁၀၀) ကိုဋ်ပြၚ်ပြၚ်တှ်ေ ပတိတ်ဟွံဂွံရ၊ ပတိတ်မွဲတ္ၚဲတှ်ေ (၃၀) ကိုဋ် (၄၀) ကိုဋ် ဍေံချိၚ်တုဲ ကဵုပတိတ်မံၚ်၊ တ္ၚဲဂှ် မၞိဟ်ပတိတ်အောန်တှ်ေ ဂွံဂၠိုၚ်၊ တ္ၚဲဂှ် မၞိဟ်ပတိတ်ဂၠိုၚ်တှ်ေ ဂွံအောန် အဵုဗီုဂှ်၊ နူကဵုဍုၚ်ဒှ်ရုသံၚ်တုဲတှ်ေ မၞိဟ်ဂိုၚ်စွံဩန်ပ္ဍဲတိုက်ဩန်ဂှ် အောန်စှ်ေကၠုၚ်၊ ဟီုဟဏံတှ်ေ ဓဝ်ပတှ်ေ လတူတိုက်ဩန်တအ် အောန်စှ်ေကၠုၚ်၊ ဟိုတ်နူဂှ်ရ မၞိဟ်တအ် ဟွံအာဂိုၚ်စွံဩန်ပ္ဍဲတိုက်ဩန်ဂှ်” သ္ဂးရ။
တၠကမၠောန် တၠဓနပရေၚ်ပိုန်ဒြပ်နာနာတအ် ဩန်ကလိဂွံနူတမ်ကမၠောန်တအ်ဂှ် စၞးဒးဂိုၚ်စွံဩန်ပ္ဍဲတိုက်ဩန်ဂှ် ရာန်ဂိုၚ်စွံကၠုၚ်ထဝ်ဂၠိုၚ်ဂှ်ရ ၚုဟ်ထဝ်ဂှ် က္ဍၚ်သၠုၚ်ကၠုၚ်မွဲသာ်ရောၚ်ဂှ်လေဝ် ညးဆက်ဟီုထ္ၜးရ။
တၠကမၠောန် တၠဓနညးဍုၚ်ကွာန်တအ် ဒၟာနူဓဝ်ပတှ်ေ လတူတိုက်ဩန်တအ်အောန်ဂှ်တုဲ တၠကမၠောန် တၠဓန ပရေၚ်ပိုန်ဒြပ်နာနာတအ် ရာန်ဂိုၚ်စွံထဝ်ဂၠိုၚ်ဂှ်ရ လၟုဟ်မ္ဂး ထဝ် (၁၆) ၜဲ လျိုၚ်မွဲဒ္ကေဝ် နူကဵု (၈၀) ကိုဋ်ဂှ် ဒှ်အာ (၉၀) ကိုဋ်ပြၚ်မံၚ်ရောၚ် ဂွံတီကေတ်ရ။
