ပ္ဍဲပွိုၚ်ဍုၚ်ရေဝ်ကဵု ဇြပ်ဗု၊ တွဵုရးဍုၚ်မန်ဂှ်ဝွံ ဗဒိုပ်ဗၠာဲသၟိၚ်ကမ္မယှေန်ပၞာန်မွဲဗဒိုပ်ကီု သီုကရောၚ်ပၞာန်ကမ္မယှေန်ပၞာန်ထ္ပက်ကၠုၚ်တံဂှ် ဒပ်ပၠန်ဂတးဍုၚ်မန် MSRF ဗ္တိုက်လဝ် (၃) တ္ၚဲအဆက်ဆက်ရောၚ်ဂှ် MSRF လလောၚ်ပ္တိတ်လဝ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၁) တုဲကၠုၚ်ဏံ ဂကောံဒပ်ပံၚ်ကောံကောဒေံဒရုၚ် MSRF ပါလုပ်ဂှ် ဗ္တို်က်ထောံဖျေံမခတိုဟ် (၂) မ ပ္ဍဲဗဒိုပ်ဗၠာဲသၟိၚ်ကွာန်အနၚ်၊ ပွိုၚ်ဍုၚ်ဇြပ်ဗုဂှ်တုဲ အကာဲအရာ ဒးဘဲဇီုကပိုက်ဂှ် လ္ပာ်ကမ္မယှေန်ပၞာန်တံ ဓမံက်ထ္ၜးလဝ်ဟွံမွဲရ။
တုဲပၠန် ဂိတုဖေဖဝ်ဝါရဳ (၂၂) ကဵု (၂၃) ဏံဝွံ ဒပ်ကမ္မယှေန်ပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ် (၁၅၀)၊ အပ္ဍဲပွိုၚ်ဍုၚ်ရေဝ်ဂှ် ဒပ်ပံၚ်ကောံမဟာမိတ်ပၠန်ဂတးတံ ဗ္တိုက်ဏာနဲဒမၠုက် ပ္ဍဲဗဒဲါကွာန်သၞေဟ်ကရေၚ်ကဵု အံၚ်တပျေဂှ်တုဲ ပေဲါဗ္တိုက်သ္ကာတ်မြဟ် မံၚ်ရောၚ် ချူဓမံက်လဝ် ပ္ဍဲလိက်လလောၚ်ဂှ်ရ။
ပေဲါဗ္တိုက်ၜါလ္ပာ် ပ္ဍဲကွာန်အံၚ်တပျေဂှ်ဝွံ ပေဲါဗ္တိုက်သ္ကာတ်မြဟ် ပွိုၚ် (၄၅) မိနေတ်တုဲ လ္ပာ်ဒပ်ကမ္မယှေန်ပၞာန်တံ သၟာၚ်နူက္လေၚ်ဒုၚ်ဗ္တိုက်တဝ်စၞေဟ် နကဵုဇြဟတ်လွဟ်၊ ဇြဟတ်ပၞာန်ဂှ်မ္ဂး နကဵုလွဟ်ဇၞော်လေဝ် ပန်ပှော်ကၠုၚ်ဗွဲမဂၠိုၚ်ရောၚ် ညးမၞုံအခေါၚ်ဟီုဂး MSRF မိတၠညာဏ် ဟီုကဵု IMNA ရ။
“ကရောၚ်ပၞာန်ဍေံတံဂှ် ပါ်လဝ်ၜါဂကောံရ။ မွဲဂှ် ပၞုက်လဝ်ရ။ ဍေံတံပၞုက်လဝ်တုဲတှေ် ဒးဒုၚ်ဍံက်သ္ဍာံပန်ကဵု ဒပ်မဟာမိတ်တုဲ ဒှ်ပေဲါဗ္တိုက်ရ။ ပ္ဍဲကဵုကရောၚ်ပၞာန်ဍေံဂှ်တှေ် သၟာသဏာ်ပါလေဝ် ပါကၠုၚ်မံၚ်ဏောၚ် ဂွံမိၚ်ကေတ်ပရိုၚ်ရ” သာ်ဝွံ ညးဟီုရ။
အပ္ဍဲပေဲါဗ္တိုက်ဂှ်ဝွံ လ္ပာ်ဒပ်ကမ္မယှေန်ပၞာန်တံ ပြဟ်လလုဲ (၅) တၠတုဲ လ္ပာ်ဒပ်ပၠန်ဂတးဍုၚ်မန် MSRF လေဝ် ကောန်သ္ဂံၚ်ပြဟ်လလုဲအာ (၂) တၠကီု ဂွံတီကေတ်ရ။
ပ္ဍဲဒပ်ပံၚ်ကောံမဟာမိတ်ပၠန်ဂတးတံဂှ်ဝွံ ဒပ်ပၠန်ဂတးဍုၚ်မန် MSRF ၊ ဒပ်စဵုဒၞာညး ဍုၚ်ကွာန်ရေဝ် YPDF ၊ ဒပ်ဒမၠုက်ရေဝ် YGF ၊ တမ်ဒပ် KNLA (၂၇) ဒပ်ပါ် (၁) ၊ ဒပ်ပါ်တဝ်စၞေဟ်ဒေါန ဗျူဟာ (၃၃) ကဵု ဒပ်တဗေန်ယှိုဲထဳတံ ပံၚ်ကောံတုဲ ဗ္တိုက်လဝ်ရောၚ် ဂွံတီကေတ်ရ။
အကြာပယျဵုရေဝ် – ဇြပ်ဗုကဵု သ္ကုတ်ရေဝ်သၟဝ်ကျာ၊ တွဵုရးဍုၚ်မန်ဂှ်ဝွံ ပ္ဍဲသၞာံ (၂၀၂၆) မံက်ဏံ ဒပ်ကမ္မယှေန်ပၞာန်တံ ထ္ပက်လုပ်ကၠုၚ်ကရောၚ်ပၞာန် ဗွဲမသ္ကာတ်မြဟ်တုဲ ကတဵုဒှ်မံၚ်ပေဲါဗ္တိုက်ကဵု ဒပ်ပံၚ်ကောံမဟာမိတ်ပၠန်ဂတးတံ မွဲနှေံမွဲနှေံရ။
