သၞာံ (၂၀၂၆) စနူဂိတုမာတ် စၟတ်တ္ၚဲ (၁၈) တ္ၚဲဏအ်ဝွံ ပ္ဍဲကၟိန်ဍုၚ်သေံ ၚုဟ်ကၠေၚ်စက် ဒဳဇြေဝ်၊ ကၠေၚ်ဓါတ်တအ် သ္ဂောံသၠုၚ်တိုန်ကၠုၚ်မာန်ရောၚ် ဒုသ္ကိုပ်ဝန်ဇၞော် ကေုာံ ဝန်ဇၞော်ပရေၚ်ပလံၚ်ပစိုပ် နာဲဖဳဖါတ် ရာတ်ချကေတ်ပရကာန်ဂှ် ဟီုလလောၚ်ကၠုၚ်ရ။
ပြဟ်ဟ်ဏအ် ပ္ဍဲကၟိန်ဍုၚ်သေံဝွံ ကၠေၚ်ဒဳဇြေဝ် မွဲလဳတာဂှ် ၚုဟ်နွံမံၚ် (၂၉.၉၄) ၝာတ်တုဲ စနူဂိတုမာတ် စၟတ်တ္ၚဲ (၁၈) တ္ၚဲဏအ်မ္ဂး ၚုဟ်ကၠေၚ်ဒဳဇြေဝ် မွဲလဳတာဂှ် တိုန်အာ စဵုကဵု (၃၃) ၝာတ်ရောၚ် ဝန်ဇၞော်ပရေၚ်ပလံၚ်ပစိုပ် နာဲဖဳဖါတ် ရာတ်ချကေတ်ပရကာန် ဂှ် ဟီုရ။
တုဲပၠန် သွက်ပရေၚ်ပိုန်ဒြပ်၊ ကမၠောန်ဗ္ဂေတ်စက်ကဵု ကဏ္ဍပရေၚ်ပလံၚ်ပစိုပ်ဂမၠိုၚ်တအ်ဂှ် နကဵုအလဵုအသဳသေံတအ် ထံက်ပၚ်ကဵုအာကၠေၚ်စက် ဒဳဇြေဝ် (B20) နွံတုဲ ပ္ဍဲကဵုဒဳဇြေဝ် (B20) ဂှ်မ္ဂး ၚုဟ်သက်သာနူ ဒဳဇြေဝ် (B7) မွဲလဳတာ အကြာ (၄) ၝာတ် ကဵု (၅) ၝာတ် နွံမာန်ရောၚ် ဂွံတီကေတ်ရ။
အကာဲအရာလၟုဟ်ဝွံ ပ္ဍဲကဵုဆေၚ်ကၠေၚ်လ္ၚဵု ကၠေၚ်စက်ပိုတ်သ္ကုတ်ကီု ကွဳစက်၊ ကွဳလိုန်ဓါတ်တအ် အကာဲအရာ သ္ဒးပြေၚ်ရေၚ်မံၚ်နွံတုဲ ညးဍုၚ်ကွာန်တအ် ဒှ်ဓဝိၚ်ကဵု ကၠေၚ်စက်ပိုတ်သ္ကုတ်အိုတ်ရ။
ဟိုတ်နူကၠေၚ်စက်ပိုတ်သ္ကုတ်သာ်ဏအ်ဂှ်ရ သွက်ညးကွာ်တရဴ၊ ညးပလံၚ်ပစိုပ်တအ် အခိၚ်သ္ဒးလဇုဲလဇကၠုၚ်နွံမာန်ရ။
အလုံကၟိန်ဍုၚ်သေံဝွံ တၟော်လဝ် ဆေၚ်ကၠေၚ်အပံၚ် ဗၞတ် (၂၀,၀၀၀) ဒၞာဲတုဲ ဟိုတ်နူဆေၚ်ဍောတ်ဍောတ် တအ် ကၠေၚ်ပိုတ်သ္ကုတ်ကၠုၚ်ဂှ်ရ ပ္ဍဲကဵုဆေၚ်ကၠေၚ်ဇၞော်ဇၞော်တအ် အသိၚ်ရာန်သၠုၚ်တိုန်မံၚ်ဂှ် ဂွံဆဵုကေတ်ရ။
ပ္ဍဲကၟိန်ဍုၚ်သေံဝွံ ကၠေၚ်စက်ခြိုၚ်စွံလဝ် နွံဗၞတ် (၉၆) တ္ၚဲ၊ ပွိုၚ် (၃) ဂိတုပြၚ်ဂှ် သွက်ညးဍုၚ်ကွာန်တအ် စကာရုမ်ဂပ်မာန်ရောၚ် နာဲဖဳဖါတ် ရာတ်ချကေတ်ပရကာန်ဂှ် ဂးရ။
နူကဵုအလဵုအသဳသေံတအ် ပ္တိတ်ကဵုလဝ် ဩန်ဂအုံကၠေၚ်ပ္ဍေန်ဂှ်ဝွံ ဗၞတ် (၁၂) ပဳလဳယာန်ၝာတ် မံက်ဒၟံၚ်လ္ပာ်ကျတုဲ ပ္ဍဲသၟဝ်တဲအလဵုအသဳယာယဳလၟုဟ်ဏအ် ဩန်ဂအုံကၠေၚ်ပ္ဍေန် သှေ် (၄၀) ပဳလဳယာန်ၝာတ်ဂှ် သၞောတ်ဗ္ၜတ်စွံလဝ်ရောၚ် ဂွံတီကေတ်ရ။
လက်ထက်အလဵုအသဳကၠာတေံဝွံ ဒဳဇြေဝ် မွဲလဳတာဂှ် (၃၄.၉၄) ၝာတ် ၚုဟ်တိုန်ကၠုၚ်လဝ်တုဲ ကၟိန်ဍုၚ်သေံဂှ် ရံၚ်ကဵုအကာဲအရာလၟုဟ်မ္ဂး ၚုဟ်ကၠေၚ်ဒဳဇြေဝ် သွက်ဂွံသၠုၚ်တိုန်အာ ဗီုကဵုကၠာတေံမာန်ပၠန် ရောၚ် ဝန်ဇၞော်ပရေၚ်ပလံၚ်ပစိုပ် နာဲဖဳဖါတ် ရာတ်ချကေတ်ပရကာန် ဂှ် ဂးလဝ်ပၠန်ရ။
ပ္ဍဲကၟိန်ဍုၚ်သေံဝွံ ညံၚ်ဟွံဂွံဆဵုဂဗပြဿနာ ပရေၚ်ကၠေၚ်စက်ပိုတ်သ္ကုတ်မာန်ဂှ် နွံပၟိက်မ္ဂး ရာန်ကေတ် ကၠေၚ်စက် လ္ပာ်ဍုၚ်ရတ်ယှာတေံမာန်တုဲ ကၠေၚ်စက်တအ် ညံၚ်သ္ဂောံရုမ်ဂပ်မာန်ဂှ် အလဵုအသဳသေံတအ် စဳဇန်လဝ်နွံရောၚ် ဂွံတီကေတ်ရ။
