သၞေဟ်ကၚ်စၟဳစၟတ် မၞုံဂတတမ်ဒပ်အမၠံက် (၃၁၆) ဖျေံသဇိုၚ်ကွာန်ကလအ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ နူတနေံဏံ ဂိတုမာတ် (၁၅) ၊ အခိၚ်နူဂယးဂှ် ဂကောံလကိုဟ်ရေဝ်တံ လုပ်စိုပ်ဗ္တိုက်လဝ်တုဲ လ္ပာ်ဒပ်ကမ္မယှေန်ပၞာန် ပြဟ်လလုဲအာ (၃) တၠရဂှ် က္ဍိုပ်သ္ကိုပ်ဂကောံလကိုဟ်ရေဝ် ဟီုကဵု IMNA ရ။
သၟာၚ်နူကောန်သဂံၚ် နူတမ်ဒပ်အမၠံက် (၃၁၆) ဖျေံသဇိုၚ်ကွာန်ကလအ်ဂှ်မ္ဂး ဂကောံပျူသဝ်ထဳတံလေဝ် ပံၚ်ကောံတုဲ ပ္ဍဲကဵုသၞေဟ်ကၚ်စၟဳစၟတ်ကံက်သြန် မၞုံဇြဟတ် အကြာ (၃၀) ဂှ် ကောန်သဂံၚ်ဂကောံလကိုဟ်ရေဝ်တံ လုပ်စိုပ်ဗ္တိုက်ဏာတုဲ ဒှ်ပန်ပှော်ညးသ္ကံ ၜိုတ်ကဝက်နာဍဳရ။
ဟိုတ်နူဒှ်ပေဲါဗ္တိုက်ပန်ပှော်ညးသ္ကံဂှ်ရ လ္ပာ်ဒပ်ကမ္မယှေန်ပၞာန်တံ ပြဟ်လလုဲအာ (၃) တၠတုဲ ကောန်က္ဍိုပ်သ္ကိုပ်ပျူသဝ်ထဳဠေန်ဥူဂှ်လေဝ် ဒးအာဘဲဝပ်ကီုရောၚ် က္ဍိုပ်သ္ကိုပ်ဂကောံ လကိုဟ်ရေဝ် ဟီုရ။
“ဂကောံပိုဲတံ လုပ်ကြတ်ဗ္တိုက်ဏာရ။ ဇြဟတ်ဍေံတံဂှ် နွံၜိုတ် (၃၀) ရ။ မၞိဟ်နွံမ္ၚးသၞေဟ်ကၚ်ဂှ်တှေ် ပသောၚ်လဝ်မာန်ရ။ မၞိဟ်နွံပ္ဍဲဂှ်တှေ် ပသောၚ်ဟွံမာန်ပုဟ်။ လ္ပာ်ဍေံတံ သွက်ဂွံဒုၚ်တဝ်စၞေဟ်ဂှ် ဒှ်မံၚ်ဒတုဲဒတုဲရ။ သွက်ဂွံသီလွဟ်ဍေံတံဂှ်လေဝ် ဟွံဂွံအခေါၚ်ပုဟ်” သာ်ဝွံ ညးဟီုရ။
ပ္ဍဲကဵုပရေၚ်ပန်ပှော်ဂှ်ဝွံ ဂကောံလကိုဟ်ရေဝ်တံ ဟွံဒးဘဲဇီုကပိုက်မွဲသာ် က္လေၚ်ဆုတ်တိတ်ကၠုၚ်ဗွဲအံၚ်ဇၞးမာန်တုဲ နူလ္ပာ်ဒပ်ကမ္မယှေန်ပၞာန်တံ က္လေၚ်ပန်ပှော်ကဵုလွဟ်ဇၞော် (၃) ဝါဏီရ။
ဗွဲကြဴနူကတဵုဒှ်ပရေၚ်ပန်ပှော်ၜါလ္ပာ်တုဲဂှ် လ္ပာ်ဒပ်ကမ္မယှေန်ပၞာန်တံ ကၠောန်သ္ပပရေၚ်စၟဳစၟတ် ပ္ဍဲသ္ကုတ်ဂၠံၚ်ဂှ်တုဲ ရပ်လဝ်ညးဒေသအာကၠုၚ် ၜိုတ် (၂၀) တၠပြၚ် နွံရဂှ်လေဝ် က္ဍိုပ်သ္ကိုပ် ဂကောံလကိုဟ်ရေဝ် ဟီုရ။
“လ္ပာ်ပိုဲတံ ဟွံဒးဘဲဇီုကပိုက်မွဲသာ် ဆုတ်တိတ်ကၠုၚ်မာန်ရ။ လ္ပာ်သၞဂှ်တှေ် ပန်လွဟ်ဇၞော် (၃) ဝါရ။ ကၠောန်သ္ပပရေၚ်စၟဳစၟတ်ရ။ ညးဒေသ ၜိုတ် (၂၀) တၠ ဍေံတံဒှ်သံသယတုဲ ရပ်လဝ်နွံရ။ စဵုကဵုလၟုဟ် ဟွံဗလးဏီပုဟ်။ မၞိဟ်ဇၞော်ကီု မၞိဟ်ဍောတ်ကီု ပါသီုဖအိုတ်ရ” သာ်ဝွံ က္ဍိုပ်သ္ကိုပ်ဂကောံလကိုဟ်ရေဝ် ဆက်ဟီုလဝ်ရ။
ဂိတုမာတ် စၟတ်တ္ၚဲ (၉) တုဲကၠုၚ်ဏံဂှ်လေဝ် ပ္ဍဲကဵုကွာန်အံၚ်တာယာတြေံ၊ ပွိုၚ်ဍုၚ်ရေဝ်သၟဝ်ကျာဂှ် အကြာကရောၚ်ပၞာန်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ ဒှ်ပေဲါဗ္တိုက်ၜါလ္ပာ် စဵုကဵု (၃) ဝါတုဲ ကောန်သဂံၚ်လ္ပာ်ဒပ်ပၠန်ဂတးတံ ပြဟ်လလုဲအာ (၃) တၠရ။
ဗွဲကြဴနူကၠောန်ဗဒှ်ပေဲါရုဲမာဲတုဲဂှ်ဝွံ အပ္ဍဲဂိတုဖေဖဝ်ဝါရဳမံက် သွက်သ္ဂောံထိၚ်ဒဝ် ဂၠံၚ်ဇၞော်စၟတ် (၈) မာန်ဂှ်မ္ဂး ပ္ဍဲအကြာပယျဵုရေဝ်-ဇြပ်ဗုကဵု သ္ကုတ်ရေဝ်သၟဝ်ကျာဂှ် နူဂကောံကမ္မယှေန် ပၞာန် ထ္ပက်လုပ်ကရောၚ်ပၞာန်၊ ဂလိုၚ်ပ္တိုန်သၞေဟ်ကၚ်စၟဳစၟတ်ဂမၠိုၚ်တုဲ ဒှ်ပေဲါဗ္တိုက်ၜါလ္ပာ်ကဵု ဒပ်ပံၚ်ကောံမဟာမိတ်ပၠန်ဂတးတံ မွဲနှေံမွဲနှေံရ။
