နကဵုဇြဟတ်မန်စိုပ်ဍုၚ်သေၚ်ကာပေါဝ်ဂမၠိုၚ်တံဝွံ သွက်ကွးဘာကဝ်လိက်ကောန်ဂကူမန် ဒှ်မံၚ်ခက်ခုဲကဵု ပရေၚ်ပညာတံဂှ်မ္ဂး နူဂကောံဒက်မိတ်ကောန်ဂကူမန် “သဟာဲမန်” ဍုၚ်သေၚ်ကာပေါဝ် စပ္တံရေၚ်တၠုၚ်ဒၟံၚ် အစဳဇန်ထံက်ပၚ်လာဘ်ဗ္တောန်ပညာယျရောၚ် ဂွံတီကေတ်ရ။
လာဘ်ဗ္တောန်ပညာဏံဝွံ ရီုဗၚ်ထံက်ပၚ်အာ နဇြဟတ်ပံၚ်ကောံကောန်ဂကူမန်ဂှ်ရ ပ္ဍဲအစဳဇန်ထံက်ပၚ်လာဘ်ဗ္တောန်ပညာဏံ မိမညးဍုၚ်ကွာန်ဂမၠိုၚ် ပါလုပ်ညိဂှ်လေဝ် နူကဵု “သဟာဲမန်” ဖ္တိုက်ဖၟောဝ်လဝ်ရ။
ညးတၠဒါန်ဂမၠိုၚ်တံဝွံ ထံက်ပၚ်နကဵုညးမွဲကီု၊ ပံၚ်ကောံထံက်ပၚ်ကီု ကေုာံ ပ္ဍဲကဵုအစဳဇန်ထံက်ပၚ်လၟေၚ်ဂိတုဂှ်လေဝ် ပါလုပ်မာန်ရောၚ် ဂွံတီကေတ်ရ။
ပ္ဍဲကာလကဵုထံက်ပၚ်လာဘ်ဗ္တောန်ပညာဏံဂှ်လေဝ် ကွးဘာမန် ဒှ်ခက်ခုဲကဵုပရေၚ်ပညာတံ၊ ကွးဘာ ကတ်လ္ၚတ်မံၚ်လိက်ပတ်မန် နဘာသာအဓိက ပ္ဍဲကဝ်လိက်ကောန်ဂကူမန်တံဂှ် ကဵုဇြဟတ် (ကဵုဖျုန်) ရီုဗၚ်အာရောၚ်။
ၜိုန်ဂှ်ကီုလေဝ် သၞာံဗ္တောန်ပညာမွဲသၞာံမ္ဂး လၟိဟ်ကွးဘာဂလိုၚ်လဵု ထံက်ပၚ်အာရောဂှ် ဟွံဂွံကၠောန်သ္ပ ပရေၚ်ဆဵုဂဗသဳကၠဳဂကောံဏီဂှ်ရ ဟွံဂွံတီကေတ်ဏီဂှ်လေဝ် ညးတာလျိုၚ် နာဲလောကမန် ဟီုကဵုဌာန်ပရိုၚ်ဗၠးၜးမန် IMNA ရ။
ကွးဘာကဝ်လိက်ကောန်ဂကူမန်မွဲတၠဂှ် မွဲသၞာံမ္ဂး စရိတ်ဘာကီု သီုစရိတ်ဗ္တောန်ပညာဖအိုတ် အိုတ်ဒၟံၚ် (၃၀) ကိုဋ်ဒကေဝ်ပြၚ်တုဲ စပ္တံနူသၞာံဗ္တောန်ပညာ (၂၀၂၃ – ၂၀၂၄) တုဲကၠုၚ်ဏံ ကုကွးဘာဒှ်ခက်ခုဲကဵု စရိတ်ဘာတံဂှ် နကဵုအစဳဇန် (MNEC Scholarship) ဌာနပညာကောန်ဂကူမန် ကဵုလဝ်စရိတ်ထံက်ပၚ်ဏီရ။
သွက်ကွးဘာဒှ်ခက်ခုဲကဵု စရိတ်ဗ္တောန်ပညာသီုဖအိုတ်တံဂှ် ဟိုတ်နူကဵုဟွံမာန်ဂှ်ရ ကွးဘာဗွဲမဂၠိုၚ်တံ ဒှ်ခက်ခုဲကဵု စရိတ်ဘာနွံရဂှ် ကွးဘာတြေံ ကဝ်လိက်ကောန်ဂကူမန်မွဲတၠ ဟီုရ။
“ညးတံ “ဌာနပရေၚ်ပညာကောန်ဂကူမန်” ဂှ်တှေ် လှုဲအောန်မံၚ်၊ ၜိုတ်ညးတံပမာန်ဟေၚ် ကဵုရ။ ညးဝါတ်ဂါတ်ဇေတ်ဇေတ်တံဟေၚ် ကဵုရ။ တုဲတှေ် ကွးဘာကဝ်လိက်ဗွဲမဂၠိုၚ်ဂှ် ကၠုၚ်နူဘာကောန်ဂကူမန်ရ။ ညးဝါတ်ဂါတ်တံ ဂၠိုၚ်မံၚ်” သာ်ဝွံ ဟီုရ။
ဟိုတ်ဂှ်ရ သၟတ်မန် ညးမစိုတ်လုပ်စကဵု ပရေၚ်ပညာတံ သ္ဂောံဒှ်အထံက်အပၚ်ကီု၊ တၠပညာမန် သ္ဂောံဂၠိုၚ်ကၠုၚ်ကီုဂှ်ရ ကောဒေံမန် မစိုပ်ဍုၚ်သေၚ်ကာပေါဝ် သီုဖအိုတ်တံ နကဵုစိုတ်ဓာတ်ပရေၚ်ကောန်ဂကူ ဘိုၚ်ရီုဗၚ်ညိဂှ်လေဝ် နူဂကောံဒက်မိတ်ကောန်ဂကူမန် “သဟာဲမန်” ဖ္တိုက်ဖၟောဝ် လလောၚ်ပ္တိတ်လဝ်ရ။
ကဝ်လိက်ကောန်ဂကူမန်ဝွံ ပ္ဍဲသၞာံ (၂၀၂၂)၊ ဂိတုဂျောန်ဂှ် စပံက်လဝ် ပ္ဍဲဗဒိုပ်ညဳသာ၊ ဒၞာဲတိဍာ်ဗော်ဍုၚ်မန်တၟိ (NMSP) ထိၚ်ဒဝ်ရ။ ကဝ်လိက်ဝွံ မၞုံသၟဝ်ကမ္မတဳ ပရေၚ်ပညာကောန်ဂကူမန် (MNEC) တုဲ ပ္ဍဲကဵုအစဳဇန်ဒဳဂရဳဖက်ဆောဂှ် ဗ္တောန်မံၚ်ကဵု ဘာသာအဓိက (၇) ဘာသာနွံရ။
