ဂိတုအေဗရဴ (၂၆)၊ နူတနေံဏံ အခိၚ်နူဂယး ၜိုတ် (၁၀) နာဍဳကဝက်၊ အခိၚ်ကၠောန်သ္ပဒၟံၚ် သဘၚ်ပ္တိုန်က္ဍိုၚ်ကျာ် ပ္ဍဲကွာန်ကအ်ဇမၠိၚ်၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် သ္ၚိဒၟံၚ် (၂) မ တူပၟတ်ဆောံလေၚ်အာလဝ်နွံရောၚ် ဂွံတီကေတ် နူကောန်ကွာန်တံရ။
နူတနေံဏံ အဃောညးဂမၠိုၚ်စိုပ်ဒၟံၚ် ပ္ဍဲသဘၚ်ပ္တိုန်က္ဍိုၚ်ကျာ် မ္ၚးကွာန်ကအ်ဇမၠိၚ်ဂှ်ဝွံ ပ္ဍဲသ္ၚိဒၟံၚ်မၞိဟ်ဟွံမွဲ မွဲသ္ၚိဏံ နူကဵုဒၞာဲတောဲလဝ်ပၟတ်သိုဝ်လာမွဲတဆံၚ်ဂှ် ပၟတ်စတူတုဲ သ္ၚိမၞုံဗဒဲါဂှ်မွဲမလေဝ် ပၟတ်ကၠောံအာကီုရောၚ် ညးတြုံနူဒေသဂှ်မွဲတၠ ဟီုရ။
“တ္ၚဲဂှ်တှေ် ကျာလေဝ်ပိုက်၊ က္တဴလေဝ်က္တဴ၊ သ္ၚိၜါမဂှ် မုဟွံသှေ် ပါအာပၟတ်အိုတ်ရ။ ပၟတ်စတူ နူကဵုသိုဝ်လာရ။ ပ္ဍဲကွာန်ဂှ် သဘၚ်ပ္တိုန်က္ဍိုၚ်ကျာ်လေဝ်နွံတုဲ ပ္ဍဲသ္ၚိ မၞိဟ်ဟွံမွဲပုဟ်။ လ္ပာ်ဂှ်ဂှ် သ္ၚိသိၚ်မံၚ်တှေ် ကာပၠိုတ်ပၟတ်လေဝ်ဟွံစိုပ်မွဲသာ် နကဵုဇြဟတ်သၟတ်တံဟေၚ် ဟပၠိုတ်ပၟတ်မာန်ရ” သာ်ဝွံ ညးတြုံဂှ် ဟီုရ။
အခိၚ်ပၟတ်တူမံၚ်ဂှ်ဝွံ ကွဳစက်ပၠိုတ်ပၟတ် နူကဵုဗဒဲါကွာန်ဂှ်မွဲဖ္ဍိုက်ဟေၚ်စိုပ်တုဲ ဟိုတ်နူတၟာတ်လဝ် ဂၠံၚ်တတ်ကၠောံ ကအ်ဇမၠိၚ်ကဵု ဓမ္မသဂှ်ရ ကွဳစက်ပၠိုတ်ပၟတ် နူကွာန်ဓမ္မသ သွက်ဂွံကၠုၚ်စိုပ်ဂှ် ဟွံပြေပြံၚ်ရောၚ် ညးတြုံနူကွာန်ကအ်ဇမၠိၚ်မွဲတၠဂှ် ဟီုရ။
ပၟတ်တူအာ ပွိုၚ်ကဝက်နာဍဳပြၚ်တုဲ နကဵုအရီုဗၚ်ညးဇၞော်၊ ညးသၟတ်နူကွာန်တံဂှ် ပၠိုတ်ပၟတ်မာန်တုဲ ညးသ္ၚိဒၟံၚ်ဒးအာဘဲပၟတ်ၜါမတံဂှ် ဒၟံၚ်တန်တဴမံၚ် ပ္ဍဲသ္ၚိမသမကြပ်တံဂှ် ဗွဲယာယဳရောၚ် ဂွံတီကေတ်ရ။
“ဂအုံချံက်တံ ဒၞာဲစွံအှော်တံဟေၚ် ပၟတ်ကၠောံရ။ ကဵုသ္ၚိတၞဟ်တံဂှ် ပၟတ်ဟွံကၠောံပုဟ်။ လ္ပာ်ဂှ်ဂှ် ဒပ်ၜါလ္ပာ်တံ လ္ပာ်တေံ လ္ပာ်ဏံဂှ်ရ အကာဲအရာ ကာပၠိုတ်ပၟတ်ဂွံကၠုၚ်ဂှ် ဟွံပြေပြံၚ်နွံရ။ ဟွံသေၚ်တှေ် ကာတၞဟ်တၞဟ်တံလေဝ်ကၠုၚ်ဏောၚ်။ လ္ပာ်ဓမ္မသဂှ် ကာပၠိုတ်ပၟတ်နွံရ။ ကဵုကအ်ကျာ်(ကော့ကျိုက်ကုန်း) ဓမ္မသဂှ် ဂၠံၚ်တတ်ကၠောံနွံရ။ ဆဂး ဒပ်ပၞာန်ကၟာတ်လဝ် တၟာလအ်ရ” သာ်ဝွံ ဟီုရ။
နူကဵုသ္ၚိဒၟံၚ်တူအာပၟတ်ၜါမဂှ်ဝွံ လၟိဟ်သြန်ကဵုကၠံကိုဋ် တူပၟတ်ဆောံလေၚ်အာနွံရောၚ် ဂးရ။
ဂိတုအေဗရဴ စၟတ်တ္ၚဲ (၂၁) တုဲကၠုၚ်ဏံဂှ်လေဝ် ဒၞာဲခြိုၚ်စွံကၠေၚ်စက် မၞုံအပ္ဍဲရုၚ်စက်ဆု (အထပ်သား)၊ ပ္ဍဲကွာန်လတက်၊ ပွိုၚ်ဍုၚ်မုဟ်ဍုၚ်ဂှ် ခတိုဟ်အာလဝ်ကီုရောၚ် ဂွံတီကေတ်ရ။
