ဒုသ္ကိုပ်တမ်ဒပ် နူတမ်ဒပ် (ခလရ – ၁၀၆) ဖျေံသဇိုၚ်တၟံကၞေၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန် မွဲတၠဂှ်ဝွံ ဂိတုမေ (၁၁) ၊ နူတနေံဏံ ဒးဒုၚ်ပန်တုဲ ပြဟ်လလုဲအာလဝ်ရောၚ် နူဂကောံလကိုဟ်ရေဝ် လလောၚ်ပ္တိတ်လဝ်ဂှ် ဂွံတီကေတ်ရ။

ဒုသ္ကိုပ်တမ်ဒပ် ထောန်ယာကျဝ်ဂှ်ဝွံ ဂိတုမေ (၁၁) ၊ နူတနေံဏံ အခိၚ်သဝ်တ္ၚဲ ၜိုတ် (၆း၃၀) နာဍဳ အဃောအာရာန်ဖျာ ပ္ဍဲဍုၚ်လၟိုၚ် မွဲကရောံကဵုပၟၚ်မၚ်လမျီုညး (၃) တၠဂှ် နူဂကောံလကိုဟ်ရေဝ် ဖျေံသဇိုၚ်အပ္ဍဲဒေသတံ ကြတ်ဗ္တိုက်ဏာလဝ်ရောၚ် ဂွံတီကေတ်ရ။

က္ဍိုပ်သ္ကိုပ်လကိုဟ်ရေဝ်ဂှ် “ညးဂှ်တှေ် ကၠုၚ်ကဵုကာ၊ ဒုသ္ကိုပ်တမ်ဒပ်ဏောၚ်ဟီုတှေ် BA ညး ပါကၠုၚ်ပိတၠရ။ အခိၚ် BA ပိတၠ စှေ်ရာန်ဖျာ၊ အဃောညးတက်မံၚ်ကျာဖုၚ်လ္တူကာဂှ် ပိုဲတံ နကဵုမေတ်ယှေန် လုပ်ပန်ရ” သာ်ဝွံ ဟီုရ။

ဒၞာဲပန်ပှော်ဂှ်ဝွံ ကတဵုဒှ်အာ ဗဒဲါဗဒိုပ်ဗၠာဲသၟိၚ်ဍုၚ်လၟိုၚ် မသ္ၚောဲခြာ (၁၀၀) မဳတာဂှ်ရောၚ် နူဂကောံလကိုဟ်ရေဝ် ဟီုရ။

ဒုသ္ကိုပ်တမ်ဒပ် ထောန်ယာကျဝ်ဂှ်ဝွံ ဒးအာဘဲဝပ်လွဟ် (၅) တဲတုဲ အဃောပလံၚ်ဏာရုၚ်ဂဥုဲဂှ် ချိုတ်အာလဝ်ရောၚ် ဂွံတီကေတ်ရ။

အတိုၚ်ညးဒေသတံဟီုဂှ်မ္ဂး ကၠာတေံ ညးဒေသလၟိုၚ်မွဲတၠ ဒးဒုၚ်ၜုၚ်တက်ကဵု ဒုသ္ကိုပ်တမ်ဒပ်ထောန်ယာကျဝ်နွံတုဲ ညးဒးဒုၚ်သ္ပမာန်ဍဵုဍိုက်လေဝ် နွံမံၚ်ကီုရောၚ် ဂးရ။

ပ္ဍဲဂိတုအေဗရဴတုဲကၠုၚ်ဏံ ပျူသဝ်ထဳမွဲတၠ နကဵုယၟုပရေံပရေံ ဒယှ်ဒၟံၚ်လ္တူဒဒန်ကၠောံၜဳ၊ ကွာန် (ချောၚ်းတောၚ်) ဂှ်ကဵု က္ဍိုပ်သ္ကိုပ်ဒဳကေဗဳအေမွဲတၠ ပံၚ်တောဲမံၚ်ကဵု ကမ္မယှေန်ပၞာန်ဂှ် နူဂကောံလကိုဟ်ရေဝ်တံ ပန်ဂစိုတ်ပသောၚ်ဏာလဝ်ဏီရ။