ဒၞါဲခြိုင်စွံကပေါတ် မၞုံအရာပ်အုံကရေင် (ကရင်စု) ဂၠံင် (၉) လ္တူဍုၚ်ကျာ်ပိဂှ် နူတဏေံတေံ (မေ ၁၂) အခိင်သဝ်တ္ရဲ အကြာ (၄) နာဍဳ ပၟတ်တူအာတုဲ ဒးဆောံလေင်အာ င္ရုဟ်မး ဗ္ဒါဲ (၁၀၀) ကိုဋ်ၝာတ်နွံရောင် ဂွံတီကေတ် နူညးစုက်လုက်ကဵု တၠရုင်ခြိုင်ကပေါတ်ဂှ် ဟီုရ။
ဟိုတ်နူပၟတ်တူအာသာ်ဂှ်တုဲ ကပေါတ်ဗၞိက် ခြိုင်စွံလဝ် မပ္တံကဵု သၠာကွဳစက်ယာဥ်၊ ကၠေင်စက်၊ ဝါဲဓါတ်၊ ဂဥုဲဂစိုတ်စၟ၊ ဗဳယျာ၊ ဍာ်ဍာတ်တ် ကေုာံ စၞဒကှ်နာနာဂမၠိုင် တူလေင်အာအိုတ်ရ။
“အကာဲအရာခိုဟ်မွဲဟီုဂှ် ဒၞာဲရုၚ်ခြိုၚ်ကပေါတ် ပၟတ်တူဂှ်တှ်ေ နွံသ္ၚောဲဒၟံၚ်ကဵု သ္ၚိညးဍုၚ်ကွာန်တံတုဲ ဆောံလေၚ်အာ ရုၚ်စွံကပေါတ်ဂှ်မွဲမဟေၚ်ရ” သာ်ဝွံ ရဲဍုၚ်ကျာပိမွဲတၠဂှ် ဟီုရ။
ရုင်ခြိုင်စွံကပေါတ် ပၟတ်ဂွံတူအာဂှ်ဝွံ လ္ရဵုဂှ်ဟီု ဟိုတ်နူကၠဟ်ထဝေင်စုတ်ဍုတ်ၜံက် ဗ္ဒါဲတိုင်ကဳကၠေင်ဒဳဇြေဝ်လေဝ်နွံ၊ လ္ရဵုဂှ်ပၠန် ဟိုတ်နူပၟတ်သဵုဠာဒှ်ယှအ်လေဝ်နွံရောင် ဂွံတီကေတ်ရ။
ဆဂး ကွဳစက်ပၠိုတ်ပၟတ် နွံလ္တူဍုင်ကျာ်ပိကဵု ညးဍုင်ကွာန်ဂမၠိုင် ဗိုင်ကရိုင်ကဵုအိုတ်တုဲ စိုပ်အခိင်သဝ်တ္ရဲ ၜိုတ် (၆) နာဍဳပြင်ဂှ် ပၟတ်တူဂွံသာစှ်ေအာရောင် ဂးရ။
တုဲပၠန် ပ္ဍဲကဵုပၟတ်တူအာဂှ်ဝွံ သၟာကမၠောန်မင်ရုင်ခြိုင်ကပေါတ်မွဲတၠ ဂြိပ်တိတ်ဟွံဂတာပ်တုဲ ဒးချိုတ်အာလဝ်နွံရောင် ဂးကၠာလေဝ် နူဌာန်ပရိုၚ်ဗၠးၜးမန် သ္ပဒတန်တၞဟ်ခြာဟွံမာန်ဏီရ။
