ပေဲါရုဲစှ်သ္ကိုပ်အုပ်ဓုပ်ကွာန် / အရာပ်တၟိ၊ ကမ္မယှေန်ပၞာန် မကၠောန်ဗဒှ် အပ္ဍဲဂိတုမေဏံဂှ် ညးဍုၚ်ကွာန် / ညးဒေသတံ စိုတ်လုပ်စအောန်မံၚ်ရောၚ် ညးစုက်လုက်ကဵု သ္ကိုပ်အုပ်ဓုပ်ကွာန်တံ ဟီုရ။
အပ္ဍဲတွဵုရးဍုၚ်မန်ဝွံ သွက်သ္ဂောံရုဲစှ်ပ္တိုန် သ္ကိုပ်အုပ်ဓုပ်ကွာန် / အရာပ်တၟိဂှ် ရုဲစှ်ဒက်ပ္တန်ဒၟံၚ် ကမ္မတဳကောပ်ကာဲတုဲ နူဂှ်မွဲတဆံၚ် နကဵုဆန္ဒမာဲညးဍုၚ်ကွာန်တံ ဆက်ရုဲစှ်အာ သ္ကိုပ်အုပ်ဓုပ်ကွာန် / အရာပ်ရောၚ် စဳဇန်ဒၟံၚ်နွံရ။
အပ္ဍဲကာလသီအဝဵု ပွိုၚ် (၅) သၞာံဏံ သ္ကိုပ်အုပ်ဓုပ်ဂမၠိုၚ်တံ လ္တူနူကဵုကမၠောန်ဒးရေၚ်တၠုၚ် ကုညးဍုၚ်ကွာန်တံဂှ် အမိၚ်ကမ္မယှေန်ပၞာန်တံဟေၚ် ဒးဓမံက်ဒၟံၚ်ရုပ်ရဴတုဲ ဟိုတ်နူအကာဲအရာ ပါလုပ်ရေၚ်တၠုၚ်ဒၟံၚ် ပ္ဍဲကိစ္စယိုက်ဂၠေၚ်ပၞာန်ဂှ်ရ နကဵုညးဍုၚ်ကွာန်တံ ဓဝ်ပတှေ်အောန်စှေ်တုဲ ပ္ဍဲကဵုပရေၚ်ရုဲစှ်လၟုဟ်ဏံဂှ် စိုတ်လုပ်စအောန်မံၚ်ရောၚ် ညးစုက်လုက်ကဵု ဂကောံအုပ်ဓုပ်ရေဝ်မွဲတၠ ဟီုရ။
“ပ္ဍဲကဵုပေဲါရုဲစှ်သ္ကိုပ်အုပ်ဓုပ်ကွာန် / အရာပ် လၟုဟ်ဏံဂှ်လေဝ် ညးမိက်ဂွံလုပ်ပြိုၚ်အောန်ရ။ ညးစိုတ်လုပ်စအောန်ရ။ ညးလုပ်ဒုၚ်ရုဲ သ္ကိုပ်အုပ်ဓုပ်တၟိ ပိုဲတံဂှ် မွဲလေဝ်ဟၟဲဏီပုဟ်။ ညးလုပ်ဒုၚ်ရုဲတၟိဟၟဲတှေ် သ္ကိုပ်အုပ်ဓုပ်တြေံတံလေဝ် လ္ၚဵုတံ မိက်ဂွံတိတ်ကီုလေဝ် အကာဲအရာတိတ်ဟွံဂွံ ဒှ်မံၚ်ရ” သာ်ဝွံ ဟီုရ။
အကာဲအရာပရေၚ်ပၞာန် ဟွံညိၚ်ဝတ်ဏီဂှ်ရ စက်ယန်အုပ်ဓုပ်ကမ္မယှေန်ပၞာန်တံ ဟွံစိုပ်တရဴတုဲ နကဵုညးဍုၚ်ကွာန်ဂမၠိုၚ်တံလေဝ် ပါလုပ်ကတိုၚ်ကတိုၚ်ကၟိုဟ်ကၟိုဟ် ဟွံသေၚ်ရောၚ် ဂးရ။
အတိုၚ်အကာဲအရာလၟုဟ်ဏံမ္ဂး သ္ကိုပ်အုပ်ဓုပ်ကွာန် / အရာပ် ပံၚ်တောဲကဵု ကမ္မယှေန်ပၞာန်တံဂှ် နူကဵုဂကောံပၠန်ဂတးတံ ကေတ်မံၚ်အရေဝ်နွံဂှ်ရ ညးယိုက်ဂၠေၚ်တာလျိုၚ်သ္ကိုပ်အုပ်ဓုပ် ကြပ်ဟွံမွဲ၊ အောန်မံၚ်ရောၚ် ဂွံတီကေတ်ရ။
နူကဵုက္ဍိုပ်အရာပ် စဵုကဵုသ္ကိုပ်အုပ်ဓုပ် စၟတ်လဝ်အဆံၚ်ဆံၚ်ကီုလေဝ် နတဲဝွံ နူကဵုဌာနက္ဍိုက်က္ဍိုပ်ပရေၚ်အုပ်ဓုပ်ပွိုၚ်ဍုၚ်တံ အတိုၚ်ပၟိက်စိုတ် ရုဲစှ်ကၠောန်သ္ပမံၚ်ရောၚ် နူကဵုညးစုက်လုက်ကဵု ဂကောံအုပ်ဓုပ် ပွိုၚ်ဍုၚ်မုဟ်ဍုၚ်မွဲတၠ ဟီုဂးလဝ်ဂှ် ဂွံတီကေတ်ရ။
ဟိုတ်ဂှ်ရ ဒးကၠောန်သ္ပရုဲစှ် ပရေၚ်အုပ်ဓုပ်ကွာန် / အရာပ်တွဵုမ္ဂး ပရေၚ်ဗဗွဲဓဝ်ဒးနွံတုဲ နူကဵုညးဍုၚ်ကွာန်တံ ရုဲစှ်ခါက်ကၞက်လဝ်ဍာံဍာံဂှ် နွံပၟိက်မံၚ်ရောၚ် ညးဒေသၜါသွာၚ်မွဲတၠ ဟီုရ။
“သွက်ညးဍုၚ်ကွာန်တံတှေ် နကဵုဗဗွဲဓဝ်နွံနွံဂှ် မိက်ဂွံကဵုရုဲစှ်ရ။ မုဟိုတ်ရောဟီုတှေ် သၞာံတုဲတုဲကၠုၚ်တေံ ခိုဟ်ကီု ပရေံကီု ညးဍုၚ်ကွာန်တံ ဒးဒုၚ်ကၠုၚ်လဝ်ဂှ် ညးတံတီအိုတ်ရ။ ရုဲစှ်တၟိဏောၚ်ဟီုတှေ် ဗီုကဵု (ဆယ်အိမ်မှူး၊ ရာအိမ်မှူး) အာဆံၚ်ဆံၚ်တုဲ ဗီုကဵုနွံဗဗွဲဓဝ်ဂှ် မိက်ဂွံဆဵုရ” သာ်ဝွံ ဟီုရ။
ပ္ဍဲတွဵုရးဍုၚ်မန်ဝွံ ဗွဲကြဴနူဒပ်ပၞာန်သီအဝဵုတုဲဂှ် ကောန်ဗော်ကျဖောအ် မစုက်လုက်ကဵု ကမ္မယှေန်ပၞာန်တံဟေၚ် ကေတ်လဝ်ဒၞာဲဗွဲမဂၠိုၚ်တုဲ ပံၚ်တောဲကဵု ဂကောံဒပ်ဗၠာဲသၟိၚ်တံတုဲ ဝိုၚ်ဝေၚ်္ၚေၚ်လံၚ်သြန်ကီု ဂဥုဲၜူမာဲဂမၠိုၚ်ကီု ကဵုလဝ်အခေါၚ်ကၠောန်အပ္ဍဲကွာန် ဗီုကဵုဗဗွဲဓဝ်ရောၚ် ဂွံတီကေတ်ရ။
ပ္ဍဲကဵုပေဲါရုဲစှ်သ္ကိုပ်အုပ်ဓုပ်ကွာန် / အရာပ် လၟုဟ်ဏံဂှ်လေဝ် ညးမစုက်လုက်ကဵု ဒပ်ပၞာန်တံဟေၚ် ဂွံဒုၚ်ရုဲစှ်မာန်ရဂှ်လေဝ် ဟီုဂးသ္ၚဳဂၠိပ်မံၚ်အိုတ်ရ။
အာယုက်တာလျိုၚ် သ္ကိုပ်အုပ်ဓုပ်ကွာန် / အရာပ်တံဂှ်ဝွံ အတိုၚ်အာယုက်သမ္မတကၟိန်ဍုၚ် (ဓမ္မတာ ၅ သၞာံ) ရောၚ် စၟတ်လဝ်ရ။
အတိုၚ်သၞောဝ်ဥပဒေမ္ဂး မွဲအဆက်ဓဝ် ယိုက်ဂၠေၚ်တာလျိုၚ် ဂၠိုၚ်နူၜါဝါဟွံဂွံရောၚ် ဗၞတ်ဗ္ၜတ်လဝ်တုဲ ဂွံဒုၚ်ရုဲစှ်တုဲဟေၚ် ယိုက်ဂၠေၚ်တာလျိုၚ် နဒဒှ်သ္ကိုပ်အုပ်ဓုပ်တၟိဗဗွဲဓဝ်ရောၚ် ဂွံတီကေတ်ရ။
