ပ္ဍဲကဵုပေဲါသၟာန်သွဟ်လိက်ပတ်မန်ဥတုက္ညၚ် ဆေၚ်စပ်ကဵုအလုံဒေသရးမန်ဂှ် ကွးဘာ (၅၀၀၀) ပြၚ် သွက်ဂွံလုပ်သွဟ်အာနွံရောၚ် အတိုၚ်ညးတာလျိုၚ် ဂကောံလိက်ပတ်ယေန်သၞာၚ်မန် အလုံဒေသရးမန်တံ ဟီုဂးလဝ်ဂှ် ဂွံတီကေတ်ရ။
ပေဲါသၟာန်သွဟ်လိက်ပတ်မန်ဥတုက္ညၚ် မရနုက်ကဵု (၂၇) ဝါဏံဂှ် နူဂကောံလိက်ပတ်ယေန်သၞာၚ်မန် အလုံဒေသရးမန်တံ က္ဍိုက်က္ဍိုပ်တုဲ ပ္ဍဲဂိတုမေ (၂၁) ဏံ သွက်ဂွံကၠောန်ဗဒှ်အာ ပ္ဍဲဘာကျာ်လ္ဒောဝ်သာသနာ (၂၅၀၀) လ္တူဍုၚ်မတ်မလီုဂှ်နွံရ။
ပေဲါသၟာန်သွဟ်လိက်ပတ်မန်ဥတုက္ညၚ် သၞာံဏံဝွံ ကောန်ကွးဘာ မစိုပ်ကၟိန်ဍုၚ်သေံ ကေုာံ မလေဝ်ယှာပါလုပ်ကီု သီုဖအိုတ် ကွးဘာနူ (၁၉) ပွိုၚ်ဍုၚ် သွက်ဂွံလုပ်သွဟ်အာနွံရောၚ် ညးတာလျိုၚ်ဂကောံ ကျာ်ဇၞော်အ္စာ ဘဒ္ဒန္တသဳလဝန္တ ဟီုမြော်ရ။
“အပ္ဍဲဍုၚ် (၁၇) ပွိုၚ်ဍုၚ်ကဵု သေံ၊ မလေဝ်ယှာ ပါကီုတှေ် ကွးဘာနူ (၁၉) ပွိုၚ်ဍုၚ်တံ လုပ်သွဟ်အာဏောၚ်။ ဟိုတ်ဂှ်ရ သၞာံဏံ ညးလုပ်သွဟ် သာတုဲဂၠိုၚ်ကၠုၚ်ရ။ သၞာံတုဲတေံတှေ် (၄၀၀၀) ပြၚ်ရ။ သၞာံဏံဂှ်တှေ် ၜိုတ် (၅၄၃၄) တၠ နွံကၠုၚ်ရ”သာ်ဝွံ ကျာ်ဇၞော်အ္စာဂှ် ဟီုမြော်ရ။
အတိုၚ်စရၚ် ဂကောံယေန်သၞာၚ် ကေုာံ လိက်ပတ်မန်ဥတုက္ညၚ် အလုံဒေသရးမန်ဂှ်မ္ဂး ပ္ဍဲကဵုတန်အဘိဓမ္မာဂှ် (၂၆၁၈) တၠ၊ တန်ဝၚ်ဟံသာဝတဳ (၁၁၉၀) တၠ၊ တန်ဝၚ်မုတ္တမ (၆၈၇) တၠ၊ တန်ဝၚ်သုဝဏ္ဏဘုံမိ (၃၇၇) တၠ၊ တန်ဝၚ်လိက်ပတ်မန် (၃၀၄) တၠ၊ တန်ယေန်သၞာၚ်မန် (၁၄၀) တၠ ကေုာံ တန်လိက်တၟံမန် (၁၁၈) တၠ ပါလုပ်ရ။
တုဲပၠန် ကွးဘာတန်ဝၚ်တုဲဒှ်အာ (၁၃၈) တၠတံဂှ်လေဝ် သွက်ဂွံဇိုန်နှၚ်ကဵုလာဘ်တၟေၚ်နွံရောၚ် ကျာ်ဇၞော်အ္စာဂှ် ဆက်ဟီုမြော်လဝ်ရ။
“သၞာံဏံဂှ်တှေ် ကွးဘာ တန်ဝၚ်တုဲဒှ်အာ အလုံ (၆) တန် (၁၃၈) တၠဂှ်လေဝ် သွက်ဂွံပ္တိုန်စရာဲ ကဵုလာဘ်တၟေၚ်နွံရ။ ကဵုအာ ဗီုကဵုတဆိပ်ကြာဏောၚ်။ ဍေံတံဂှ်လေဝ် ပ္ဍဲကဵုအသေအဟာန်စှေ်တန်ဗ္တောန်ဂှ်ဟေၚ် ပ္တိုန်စရာဲကဵုအာလာဘ်ဏောၚ်” သာ်ဝွံ ဟီုမြော်ရ။
ကွးဘာတန်ဝၚ်တုဲဒှ်အာ ကေုာံ ကွးဘာအံၚ်ဇၞးဂမၠိုၚ်တံဂှ် ပ္တိုန်စရာဲကဵုအာလာဘ် ပ္ဍဲဘာကျာ်လ္ဒောဝ်သာသနာ (၂၅၀၀) ဍုၚ်မတ်မလီုတုဲ အသေအဟာန်ဂှ်ဝွံ ကၠောန်ဗဒှ်အာ ပ္ဍဲဂိတုမေ (၃၁) ဏံရ။
တန်ဗ္တောန်လိက်ပတ်မန်ဥတုက္ညၚ်ဝွံ ဒှ်တန်ဗ္တောန်တ္ၚဲဒမၠေံကီုလေဝ် ပ္ဍဲဂကောံလိက်ပတ်မန်မ္ဂး ဒှ်ဂကောံလိက်ပတ်ဇြဟတ်ဇၞော်အိုတ်မွဲဂှ်ရ နကဵုညးဍုၚ်ကွာန်မန်ဂမၠိုၚ်တံ လ္ပာ်ဇကုသ္ပမာန်ဂှ် ဘိုၚ်ရီုဗၚ်ဗပေၚ်အာဇြဟတ်ညိဂှ်လေဝ် ညးတာလျိုၚ်ဂကောံလိက်ပတ်ယေန်သၞာၚ်မန် အလုံဒေသရးမန်တံ ဟီုဂးဖ္တိုက်ဖၟောဝ်လဝ်ရ။
