ပ္ဍဲဂိတုမေ စၟတ်တ္ၚဲ (၁၇) တုဲကၠုၚ်ဏအ်ဝွံ အပ္ဍဲခရိုၚ်ဇျောမ်ဘန်၊ ကၟိန်ဍုၚ်သေံဂှ် ကမၠတ်ဒမၠ (၄) တၠ လုပ်ဗ္တိုက်ဏာ ပ္ဍဲကဵုသ္ၚိဒၟံၚ် သၟာကမၠောန်ကောန်ဍုၚ်ဗၟာတအ်နွံရောၚ် ဂွံတီကေတ်ရ။
ကမၠတ်ဒမၠတဏအ်ဝွံ အခိၚ်မလုပ်စိုပ်ကၠုၚ်ဂတမုက်သ္ၚိ သၟာကမၠောန်ကောန်ဍုၚ်ဗၟာဂှ် ဗွိုၚ်လ္တက်လဝ် ကယျိုၚ်အရံၚ်ဗ္စံက် သီုကဵုရပ်လဝ်လွဟ်တုဲ ကမၠတ်ဒမၠတအ်ဂှ် သ္ပလဝ်ညံၚ်ရဴ ဗၠာဲသၟိၚ်တုဲ ကဵုညးတၠသ္ၚိ (၅) တၠ တိတ်အာမ္ၚးလက်ကြဴသ္ၚိဂှ်တုဲ လုပ်ဂၠာဲကပှ်မံၚ် ကပေါတ်မၞုံကဵုၚုဟ်မး ထဝ်၊ ဩန် ပ္ဍဲကဵုသ္ၚိဂှ်ရ။
ကမၠတ်ဒမၠတအ်ဂှ်ဝွံ “လုပ်ဂၠာဲကပှ် ပ္ဍဲကဵုဗဳဒိုဝ် ဒၞါဲတိက် လုပ်ဂၟာဲပ္ဍဲကဵုကလာ၊ ထိုၚ်ဂမၠိုၚ်တုဲ သီုကေတ်ဏာ ကပေါတ်မၞုံကဵုၚုဟ်မး ထဝ်၊ ဩန်သေံ ဗၞတ် (၁) ကိုဋ်ၝာတ်ကဵု တၞးလိက်သက်သဳ ပၟိက်ဇၞော်တအ်ဂှ်လေဝ် ကေတ်ဏာကီုဏောၚ်”သာ်ဝွံ ညးတၠသ္ၚိ သၟာကမၠောန်ကောန်ဍုၚ်ဗၟာဂှ် ဟီုရ။
ဒှ်သာ်ဂှ်ရ သၟာကမၠောန်ကောန်ဍုၚ်ဗၟာ ညးဒးဒုၚ်ကမၠတ်ဒမၠဗ္တိုက်လဝ်တုဲဂှ်ဝွံ အာတေၚ်စိုပ်လဝ် ပ္ဍဲကဵုရုၚ်ဗၠာဲသၟိၚ်သေံတုဲ ပ္ဍဲကဵုဂိတုမေ စၟတ်တ္ၚဲ (၂၀) နူတနေံဏအ်ဂှ် ဗၠာဲသၟိၚ်သေံတအ် ရပ်စပ်ဂွံဏာ ညးလုတ်လောန်ဒုဟ်ကမၠတ်ဒမၠ (၄) တၠဂှ်တုဲ ညး (၄) တၠဏအ်ဂှ် အာယုက်ဇၞော်မံၚ် သီု (၄) တၠရ။
ပြဟ်ဟ်ဏအ် ဒြပ်ရတ်ထဝ်ဩန်ဂမၠိုၚ်ဂှ် ကလေၚ်ပအပ်ကဵု ညးတၠသ္ၚိကောန်ဍုၚ်ဗၟာဂှ် တုဲဒှ်ဣရတုဲ ညးလုတ်လောန်ဒုဟ် ကမၠတ်ဒမၠ (၄) တၠဏအ်ဂှ် ဗၠာဲသၟိၚ်သေံတအ် ရပ်ထိၚ်ကေတ်လဝ်အရေဝ်နွံရ။
အပ္ဍဲကၟိန်ဍုၚ်သေံ လ္ပါ်ဒေသခရိုၚ်ဇျောမ်ဘန်ဂှ်ဝွံ သၟာကမၠောန်ကောန်ဍုၚ်မန်ဗၟာ နွံတန်တဴမံၚ်ဗွဲမဂၠိုၚ်တုဲ ပ္ဍဲကဵုဂှ်မ္ဂး ကၠောန်မံၚ်ကမၠောန်ခွာတ်ထ္ၜိုတ်၊ သွံဖျာ၊ ကမၠောန်သိုၚ်ခၞံ (ကအ်သၚ်) လေဝ်နွံရ။ နကဵုသၟာကမၠောန် ကောန်ဍုၚ်မန်ဗၟာတအ်ဝွံ ဟိုတ်နူက္တဵုဒှ်အာ ပရေၚ်ပရူကၠတ်ဂၠံက်သာ်ဏအ်ဂှ်ရ စွံသတိကဵု ပရေၚ်မံၚ်စံၚ်အာကၠုၚ်ညိဂှ် နူကဵုဌာန်ပရိုၚ်ပိုယ်ဏအ် ဖ္တိုက်ဖ္အောဝ်ကဵုဏာသတိရ။
