ပ္ဍဲအရာပ် (ဂုံညှၚ်းတန်း)၊ ဍုၚ်ကၟာဝက်၊ တွဵုရးဍုၚ်မန်ဂှ် ကောန်ဂကောံပၞာန်ကွာန်မွဲတၠ ဒးဒုၚ်ပန်ဂစိုတ်တုဲ ချိုတ်အာလဝ်ရောၚ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသရ။
ဂိတုမေ (၂၅) ၊ နူတနေံဏံ အခိၚ်ဗ္တံ ၜိုတ် (၈) နာဍဳဂှ် ဥူကျဝ်မေန် ကောန်ဂကောံပၞာန်မၚ်ကွာန် အဃောနွံမံၚ်ပ္ဍဲသ္ၚိဒၟံၚ် အရာပ် (ဂုံညှၚ်းတန်း) ဂှ် သၟာရပ်လွဟ်ဟွံတီယၟုၜါတၠ ကၠုၚ်စိုပ်နကဵုကွဳလိုန်ဓာတ်တုဲ ပန်ဂစိုတ်ဏာလဝ်ကဵု လွဟ်ဍောတ်ဍောတ်ရ။
ဟိုတ်နူဒးဒုၚ်ပန်ဂှ်ရ ဥူကျဝ်မေန် အာယုက် ၜိုတ် (၅၀) သၞာံဂှ် ဒးအာလွဟ်ပ္ဍဲသြိုဟ် ပလံၚ်ဗစိုပ်ဏာ ဇရေၚ်ရုၚ်ဂဥုဲပွိုၚ်တိုက်ကၟာဝက်တုဲ အဃောလွဳလွတ်မံၚ်ဂှ်ရ ချိုတ်အာလဝ်ရောၚ် ဂွံတီကေတ်ရ။
“ညးဂှ်တှေ် ပ္ဍဲအကြာကွာန်၊ အကြာအရာပ်ဂှ် ဗက်ကေတ်မံၚ်လှုဲ နူညးဒေသတံ ဗွဲအဓမ္မဏောၚ် ဂွံမိၚ်ရ။ ကောန်ဂကောံပၞာန်ကွာန်ဟီုတှေ်လေဝ် ပံၚ်ကဵုဒပ်ပၞာန်တုဲ ကြမ်ကြမံၚ် လ္တူညးဒေသတံရ” သာ်ဝွံ ညးဒေသမွဲတၠ ဟီုရ။
ဗွဲကြဴနူကောန်ဂကောံပၞာန်ကွာန် ဥူကျဝ်မေန် ဒးဒုၚ်ပန်ဂစိုတ်ဏာတုဲဂှ် ကၠောန်သ္ပဒၟံၚ်ပရေၚ်စၟဳစၟတ်ဂၠိုက်ဂၠာဲကီုရောၚ် ဂွံတီကေတ်ရ။
ဥူကျဝ်မေန် ချိုတ်အာဂှ်ဝွံ နူကၠာဒပ်ပၞာန်ဟွံဂွံသီအဝဵုဂှ်ရ ပံၚ်တောဲကဵု ညးတာလျိုၚ်ပွိုၚ်ဍုၚ်တံတုဲ ယိုက်ဂၠေၚ်မံၚ်တာလျိုၚ် နဒဒှ်ပၞာန်ကွာန် လၟိဟ်ကဵုသၞာံကီု ဂွံတီကေတ်ရ။
ဥူကျဝ်မေန်ဝွံ မုဟိုတ်သာ်လဵု ဂကောံရပ်လွဟ်ဟွံတီယၟုတံ ကၠုၚ်စိုပ်ပန်ဏာဂှ် နကဵုဌာန်ပရိုၚ်ဗၠးၜးမန် ဆက်ဂၠိုက်ဂၠာဲမံၚ်ဖိုဟ်ရ။
ပ္ဍဲတွဵုရးဍုၚ်မန်ဝွံ ဗွဲကြဴနူဒပ်ပၞာန်သီအဝဵုတုဲဂှ် သၞာဲဒဴသၟဝ်တဲကမ္မယှေန်ပၞာန်ဂမၠိုၚ်၊ သ္ကိုပ်အုပ်ဓုပ်ကွာန်/အရာပ်ဂမၠိုၚ်၊ ကောန်ဂကောံပၞာန်ကွာန်ဂမၠိုၚ်၊ ဒလာန်ဂမၠိုၚ် ဒးဒုၚ်ပန်ဂစိုတ်ဒၟံၚ် မွဲနှေံမွဲနှေံနွံရောၚ် ဂွံတီကေတ်ရ။
