အပ္ဍဲပွိုၚ်ဍုၚ်ၜဳက္လေၚ်၊ တွဵုရးဍုၚ်မန်ဝွံ ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ကဵု လွဟ်ဇၞော်၊ က္ၜၚ်ကျာတုဲ သ္ၚိဒၟံၚ်ညးဍုၚ်ကွာန်ဗွဲမဂၠိုၚ် လီုလာ်အာနွံရောၚ် ဂွံတီကေတ် နူဗော်သွးကရေၚ် ကေအေန်ယူ ခရိုၚ်သဓီုရ။
ဒပ်ကမ္မယှေန်ပၞာန်တံ ဟိုတ်နူပန်ကဵု လွဟ်ဇၞော်/က္ၜၚ်ကျာ၊ ထောံဖျေံဗမ် နကဵု (ပါရာမော်တာ) အဆက်ဆက်ဂှ်ရ ဒၞာဲပွန်ပၞာန်ဟွံသေၚ် မပ္တံသ္ၚိဒၟံၚ်ဂမၠိုၚ်၊ စမြိုၚ် ပရေၚ်ဘာသာ ကေုာံ ပရေၚ်ပညာတံ လီုလာ်အာနွံရောၚ် ဂးရ။
အပ္ဍဲဂိတုအေဗရဴ (၁၉၊ ၂၂၊ ၂၃၊ ၂၅) တုဲကၠုၚ်ဏံ ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜၚ်ကျာတုဲ ပ္ဍဲကွာန်ကျံက်ဖျာကဵု ဗဒဲါဗဒဲါဂှ်ကီု သီုကွာန်ဝေန်တာပါန်၊ ဝေန်တာပါန်လ္တူ၊ ပွိုၚ်ဍုၚ်ၜဳက္လေၚ်ဂှ် သၟာၚ်နူသ္ၚိဒၟံၚ် (၂၇) မဂှ်မ္ဂး ဘာဗ္တောန်လိက်၊ ဇြပ်သဘၚ်ဓရ်၊ ဆေၚ်သွံကၠေၚ်စက် ကေုာံ ဇြပ်သုသာန်တံ ဒးလီုလာ်အာနွံရ။
ဟိုတ်နူဗ္တိုက်ကဵုက္ၜၚ်ကျာတုဲ သၟာၚ်နူဂၠဴချိုတ်အာ (၅) ဂှ်မ္ဂး ဗွိုၚ်ကမၠောန်ညးဍုၚ်ကွာန်တံလေဝ် ဒးလီုလာ်အာနွံရ။
တုဲပၠန် ဂိတုအေဗရဴ (၂၇၊ ၂၈) ဂှ်လေဝ် ဒပ်ကမ္မယှေန်ပၞာန်တံ သၟာၚ်နူဗ္တိုက်ကဵု က္ၜၚ်ကျာဂှ်မ္ဂး ကရောၚ်ပၞာန်ရီုဂမၠိုၚ် လုပ်စိုပ်ကၠုၚ် လ္ပာ်ကွာန်ဝေန်တာပါန်တုဲ စံၚ်ပလီုပလာ် သ္ၚိဒၟံၚ်ညးဍုၚ်ကွာန်ကီု ပန်ဗ္တိုက်ကဵု (ပါရာမော်တာ) ကီုဂှ်ရ သ္ၚိဒၟံၚ်ဗွဲမဂၠိုၚ် တူပၟတ်လီုလာ်အာနွံရောၚ် ခရိုၚ်သဓီု ကေအေန်ယူ လလောၚ်ပ္တိတ်လဝ်ရ။
ဒပ်ကမ္မယှေန်ပၞာန်တံဝွံ စွံပွန်ကဵု ဗွိုၚ်ကမၠောန်၊ ကွာန်၊ ဒၞာဲသ္ၚိဒၟံၚ်ညးဍုၚ်ကွာန် ဟွံဆေၚ်စပ်ကဵု ပရေၚ်ကတဵုဒှ်ပေဲါဗ္တိုက်တုဲ ပန်ဗ္တိုက်မံၚ်အဆက်ဆက်ရဂှ်လေဝ် ခရိုၚ်သဓီု ကေအေန်ယူ လလောၚ်ပ္တိတ်လဝ်ရ။
