ကိစ္စ နာဲဟလာ နူကွာန်ဘာဒေါဝ် ပွိုၚ်ဍုၚ်မုဟ်ဍုၚ် ဒးဒုၚ်ဂစိုတ်လဝ် တုဲကၠုၚ်ဟွံလအ်မွဲသာ်ဏံဂှ် ဟိုတ်နူဒးဒုၚ်ဘပဠတုဲ မၞိဟ်သှေ်ဒၟံၚ်အလုံအတိုၚ်မွဲသ္ၚိကၟိန်ဂှ် ဒဂြိပ်ပါဲဒၟံၚ်နွံရောၚ် ညးဒေသမွဲတၠ ဟီုလဴထ္ၜးကဵုရ။
ဗွဲကြဴနူ နာဲဟလာ ဒးဒုၚ်ဂစိုတ်ဏာတုဲဂှ် ဂကောံရပ်လွဟ်ဂစိုတ်လဝ်တအ် ဂစိုတ်ဏာ နာဲဟလာတုဲ သီုကဵုကေတ်ဏာ ဩန် (၄၀၀) ကိုဋ်ရောၚ် ဂကောံသ္ၚိကၟိန်တအ် ဟီုဓမံက်ပတိတ်ကဵု ဌာန်ပရိုၚ်လ္ၚဵုဂှ် ဂကောံရပ်လွဟ်တအ် ဟွံပေၚ်စိုတ်တုဲ ဘပဠဒၟံၚ် သ္ၚိကၟိန်တအ်ညးတအ်ဂှ်ရ အလုံမွဲသ္ၚိကၟိန်မွဲ ဒးဂြိပ်ပါဲဒၟံၚ်ရောၚ် သ္ဂးရ။
“နာဲဟလာ ဒးပန်ဂစိုတ်ဏာတုဲဂှ် နူကဵုအဆက်အဆေန် သ္ၚိကၟိန်နာဲဟလာဂှ် ဟီုဓမံက်လဝ်ကဵု ပရိုၚ်ဂှ် ဂစိုတ်ဏာ နာဲဟလာတုဲ သီုကဵုကေတ်ဏာ ဩန် (၄၀၀) ကိုဋ် ပရိုၚ်တအ်ချူတြးလဝ်ဂှ် ဂကောံရပ်လွဟ်တအ် ဟွံပေၚ်စိုတ်၊ ဇှ်ရ ဘပဠဒၟံၚ် သမ္ဘာ ညးတေံ သီုကောန်ဇာတ်ညးတေံတုဲ ညးမွဲလေဝ် ဟွံဂွံမံၚ်ပ္ဍဲကွာန်ပုဟ်၊ ဂြိပ်ပါဲဒၟံၚ်ဖအိုတ်ရောၚ်” သာ်ဝွံ ညးဒေသကွာန်ဘာဒေါဝ်မွဲတၠ ဟီုထ္ၜးရ။
သတ္တာဟတုဲကၠုၚ်ဂှ် မၞိဟ်ရပ်လွဟ်တြဴတၠ နကဵုကွဳလိုန်ဓာတ်ပိဖ္ဍိုက်ဂှ် လုပ်ကၠုၚ်သ္ၚိနာဲဟလာဂှ်တုဲ ပန်ဂစိုတ်ထောံ နာဲဟလာ ပ္ဍဲသ္ၚိ ထပ်လတူဂှ်ရ။ တုဲဂှ် ဂကောံသ္ၚိကၟိန်ညးတအ် ဟီုဓမံက်လဝ်ကဵု ဌာန်ပရိုၚ်တအ် ဒဒှ်ရနာဲဟလာ ဒးဒုၚ်ပန်ဂစိုတ်ဏာဂှ် သီုကေတ်ဏာဩန် (၄၀၀) ကိုဋ်ဂှ်နွံရောၚ် သ္ဂးရ။
သ္ပဟိုတ်နူကဵု ဟီုဓမံက်ပ္တိတ်ဏာ ပရိုၚ်သာ်ဝွံတုဲဂှ် ဂကောံရပ်လွဟ်တအ် ဟွံပေၚ်စိုတ်တုဲ ဘပဠဒၟံၚ် ကုသမ္ဘာ ကောန်ဇာတ် နာဲဟလာဂှ်တုဲ လၟုဟ်မ္ဂး အလုံမွဲသ္ၚိကၟိန်ဂှ် ဒးဂြိပ်ပါဲဒၟံၚ်ရ။
ဂကောံသ္ၚိကၟိန် နာဲဟလာတအ် ညံၚ်ဂွံဒၟံၚ်ပ္ဍဲကွာန်ဂွံဂှ် ကောန်ဇာတ် နာဲဟလာ ပတိုန်ထ္ၜးလဝ် ပ္ဍဲရုၚ်ဗော်ဍုၚ်မန်တၟိ လတူဍုၚ်မတ်မလီုနွံကီုလေဝ် ဒဵုကဵုတ္ၚဲချူပရိုၚ်ဏံ ဂကောံသ္ၚိကၟိန် နာဲဟလာတအ် ဟွံဂံၚ်စဴကွာန်ဏီရ။
ပ္ဍဲပွိုၚ်ဍုၚ်မုဟ်ဍုၚ် ဒေသသကုတ်သၠုၚ်ကျာဝွံ နကဵုညးဍုၚ်ကွာန်တအ် ဒးဒုၚ်စောတ်စောဲ မၞိဟ်ဒစုက်ဇလ ဆက်ဆောံကဵု သၞဂးတုဲ ဒးဒုၚ်ဂစိုတ်ဒၟံၚ် ကု ဂကောံပၠန်ဂတး ရပ်လွဟ်တအ် မွဲဏှေအ်မွဲဏှေအ်နွံရောၚ် ဂွံတီကေတ်ရ။
