ဒပ်ပၞာန်တံ သ္ဂောံက္လေၚ်ကလိဂွံ ဍုၚ်မဝ်တံၚ်၊ ဒၞာဲဗဒိုပ်သၞေဟ်ကၚ်လှာဲဗ္တးဗၞိက်ပယျဵုသေံ-ဗၟာ၊ ပွိုၚ်ဍုၚ်တၞၚ်သဳဂှ် ဓမံက်ရုပ်ရဴပြုပြေၚ်ဒၟံၚ် ပၞာန်ဗလးတိ၊ ပၞာန်ကျာရောၚ် ဂွံတီကေတ် နူဒပ်ပၞာန်ဗၠးၜးကရေၚ် (KNLA) ရ။
စပ္တံနူတမ်ဂိတုမေ ကရောၚ်ပၞာန်ဒပ်ပၞာန် ဇြဟတ်ၜိုတ် (၅၀၀) တံ ဇက်တိုန်ကၠုၚ် အတိုၚ်ဂၠံၚ်(မိုးတောၚ်) နူဍုၚ်ဗိက်တုဲ ပြုပြေၚ်ထ္ပက်မံၚ်ပၞာန် နကဵုပၞာန်ကျာပန်ရီုရောၚ် ဂွံတီကေတ်ရ။
“မဝ်တံၚ်ဂှ်တှေ် ဒပ်ပၞာန်တံ ပြုပြေၚ်မံၚ်ပၞာန်ဏောၚ်။ ချိုတ်ချိုတ်ပၠိုတ်ပၠိုတ်ဂှ်တှေ် ဟီုဟွံဂွံဏီပုဟ်။ သၞေဟ်ကၚ်လှာဲဗ္တးဗၞိက်ပယျဵုမဝ်တံၚ်ဂှ် ကြဴနူပိုဲတံသီဂွံမွဲဝါဂှ် ကၟာတ်ထောံရ။ ကၠာဟွံဂွံသီဂှ်လေဝ် ကၟာတ်ရ။ ဒဵုလၟုဟ် ကၟာတ်သၞေဟ်ကၚ်ရ။ ဇြဟတ်ဍေံတံဂှ်တှေ် ၜိုတ် (၅၀၀) ရ။ တမ်ဒပ်လဵု ၝောံဒပ်လဵုဟီုဂှ် ဟွံဂွံတီကေတ်ဏီပုဟ်” သာ်ဝွံ ညးမၞုံအခေါၚ်ဟီုဂး မဟာဒပ် (၄) ကေအေန်ယူ ပဒိုဝ်သဝ်အေဝ်ဏာ ဟီုရ။
ဍုၚ်လှာဲဗ္တးဗၞိက်ပယျဵုမဝ်တံၚ် မဆက်စၠောံမံၚ်ကဵု သၞေဟ်ကၚ်ပယျဵုသေန်ခေါန်ကၟိန်ဍုၚ်သေံဂှ် ပ္ဍဲဒေါဝ်ဂိတုနဝ်ဝေမ်ဗာ၊ သၞာံ (၂၀၂၅) တုဲကၠုၚ်ဏံ ကေအေန်ယူတံ ဗ္တိုက်သီလဝ်ရ။
ၜိုန်ဂှ်ကီုလေဝ် ပ္ဍဲကွာန်တုၚ်ခေါန် မၞုံသ္ၚောဲခြာ (၄၀) မိုၚ် လ္ပာ်ပလိုတ်ဍုၚ်မဝ်တံၚ်ဂှ် ဒပ်ပၞာန်တံ ဂဇံဖျေံလဝ်ဒပ်တုဲ ပရေၚ်ပန်ပှော်ဟွံမွဲဏီရောၚ် ဂွံတီကေတ်ရ။
“ပါမံၚ်ပ္ဍဲကိုန်စဳဇန် (၁၀၀) တ္ၚဲဏောၚ် ထေၚ်ကေတ်ရ။ လၟုဟ်မှ ဂွံက္လေၚ်မိၚ်ပန်ပှော်တံရ။ ပေဲါဗ္တိုက်ဂှ် စိုပ်မံၚ်ဗဒဲါဍုၚ်ယျ။ ပ္ဍဲဗဒဲါတေဝ်ဖျူ အကြာတၞၚ်သဳ – မဝ်တံၚ်ဂှ် ဒှ်ပေဲါဗ္တိုက်ရ။ လ္ပာ်(စကစ)ဂှ်တှေ် ၜၚ်ကျာတံ ပါကၠုၚ်ရ။ ပိုဲတံဂှ်တှေ် ဒဵုလၟုဟ် ဟွံဂွံပဲါဏီပုဟ်။ ဒှ်မွဲမွဲသာ်တှေ် ပလေဝ်ပလေတ်လဝ် သွက်ဂွံဂြိပ်လ္ပာ်သေံရ” သာ်ဝွံ ညးဒေသ ကိုဝ်မျိုဝ်လေဝ် ဟီုရ။
သၞေဟ်ကၚ်ပယျဵုဂှ်ဝွံ ဟိုတ်နူပေဲါဗ္တိုက်ဂမၠိုၚ်ဂှ်ရ နူပ္ဍဲသၞာံ (၂၀၂၅) ဂှ် တၟာတ်လဝ်တုဲ ပ္ဍဲဂိတုအေဗရဴ (၁၇) ဂှ် လ္ပာ်သေံတံ က္လေၚ်ပံက်ကဵုကီုလေဝ် လ္ပာ်ကေအေန်ယူ ဆက်တၟာတ်လဝ်ရောၚ် ဂွံတီကေတ်ရ။
ၜိုန်ဂှ်ကီုလေဝ် သွက်ပရေၚ်စသုၚ်မံၚ်စံၚ်အပ္ဍဲဒေသ ကေုာံ ကိစ္စရီုဗၚ်ဓဝ်ဗ္စာရဏာမၞိဟ်ဂှ် ပရေၚ်ဆက်စၠောံလှာဲဗ္တးဗၞိက် ဆက်နွံမံၚ်ရောၚ် ညးဒေသတံ ဟီုရ။
